§ 1.

Alex. III. Conquestus2. Un ot enfanz de sa meschine ; il la prist à feme. Quant il fut morz, li coisin voloient tolir as enfanz l'éritage au père, comme as bâtarz : et l'en deffent qu'il ne le facent.

Note que enfanz sont amoilleré par le mariage fet enprès ; et pape se pot entremetre d'éritage por reson de péchié.

§ 2.

Idem. Cum inter3. Un se maria à une, et prist à bénoiçon ; enprès parenté fut prové entr'aus, et furent départi : l'en demende qu'en dit droit des fiz engendrez avant le département ? L'en dit qu'il devent estre mollerez, et avoir l'éritage.

Note que tens do concevement doit estre noté por le preu as enfanz ; et l'en croit plus ce qu'est en cuidence que ce qu'est en vérité. Et note [p. 210] que li enfant que yglise tient amollerez, que li père les devent norrir, et devent estre lor heir.

§ 3.

Idem. Transmisse4. Un qui avoit sa meschine, se maria, et norri un enfant que l'en cuidet qui fut lor fiz ; et il le niéent, et disoent qu'il le norrisoent por Dé. Et cum li autre enfant le vosissent metre hors de l'éritage, le pape dit que l'en en doit croire l'ome et la feme, si l'en ne pot prover qu'il ne soit lor fiz.

§ 4.

Idem, exonen. abbati Herefeidenen. Sator5. Cum N. eust tret H. son oncle en cause por sa partie de l'éritage, cil H. dist que le père N. n'avoit pas esté nez de mariage ; et cum il eussent plédié devant l'évêque, cil H. apela à la pape, et n'i vint, ne n'i envoia. Le pape mende à un juige qu'il oe la cause de la nessance N. dedanz deus mois ; et se cil H. ne prove ce qu'il dit, qu'il mende au juige devant qui la cause estoit, qu'il défine le plet.

Note que certain terme pot estre mis à cez qui plèdeent, dedenz que s'il ne provent lor intencion, il ne seront pas oïz. Et note qu'il appartient premièrement au juige estrange conoistre de la cause de la nessance.

§ 5.

Idem. episcop. Exonen. Tanta6. Se le fornicator se marie o la damoisele dont il a eu enfanz, li enfant sont molleré par le mariage qui vint enprès.

Note que fiz engendré en avotire ne pot estre molleré ; et ce que droit damne ne pot estre amendé d'iqui en avant.

§ 6.

Idem. Lud. et Will. episcop. Tamen7Le pape manda à un juiges que il feissent seisir R. de ses teneures, que sis aos avoit quant il se mist à la voie d'aler otre-mer. Et por ce que li rois estoit irez que le pape s'entremestoit de cause de possession, mande le pape qu'il lesse la cause de possession au roi ; à cui il apartient à juigier de la nativeté à la mère.

Note que la juridicion le pape et des princes est devisée. Et note que l'en pot quenoistre de l'estat d'aucun enprès ce qu'il est mort.

§ 7.

[p. 211] Idem. ep. et arch. Vincenen. Relatum8. Plet estoit entre un de parenté ; le mari ala hors do païs ; la feme ala devant l'évesque, et requist estre départie, que ele ne le poet plus atendre. Li évesques manda as parenz à la feme qu'il l'enveessent quérir ; et quant il ne vint, tot fust-il atendu longuement, li évesques les départi, et li dona congié de soi marier à autre. Ele se maria, et ot enfanz, que aucun disoent qu'il estoent bastart. Le pape disoit qu'il sont mollerez, et qu'il devent estre receuz à l'éritage.

Note que se par autorité de iglise sunt aucun départi, lor enfanz sont mollerez. Note que en cause de mariage doit l'en et pot l'en tesmoinz recevoir, et sentence doner, tot ne soit le plet entammé.

§ 8.

Celsus, Ebor. ar. Referente9. Se aucun se marie o la cosine sa feme, le mariage est nul, et doit estre départi ; ne li enfant ne devent pas estre receu à l'éritage.

§ 9.

Idem. Pervenit10. Une feme disoit que entre son père et sa mère avoit eu léau mariage, et furent en bel estat dusque à la mort ; lor mariage fut acusé enprès la mort : et qu'ele doit estre heir.

§ 10.

Inno. III. Per tuas11. Un ot un fiz d'une qu'il tenoit si comme sa damoisele ; il la lessa, et prist une autre, dont il ot enfanz ; et reconu qu'il avoit la premère feme ; et quant il se mori, il apela celui enfant son heir. Et comme contanz fut entr'aus de la léauté à celi enfant, la pape dit que l'en en doit croire l'ome et la feme. Et com cil fiz prove que sis pères avoit sa mère espossée, li officiau do leu le juiga à léau. Et cum la cause envoié au pape, il dit que, de ce que sis pères se maria o l'autre, mariage ne fu pas entre lui et la premère feme ; et por ce que l'espossalle fut provée par garenz, il furent overz léaument ; tot furent les esposalles de présent ou de futur, le pape loe la sentence, et commende qu'el soit gardée.

Note que aucun est prové fiz par le nomemant do père. Et note une merveille, que aucun pot dire : Ge sui fiz celui ; et la règle dit que plus [p. 212] vaut ce qu'est en vérité que ce que est en opinion ; et se emprès esposalles f... aucun la feme, le mariage est achevez.

§ 11.

Idem nobili viro Montispessu. Per venerabilem12. Li sires de Montpallier requéroit le pape qu'il li aléautast ses fiz por estre ses heirs, et provoit à la pape qu'il le poet fere : car il aléautet cez qui estoient nez d'avotire et de parenté, qui séent clers ; plus tost pot-il fere qu'il séent receu à causes séculères, et mesmement de cez qui sont soz li. Et ce li prove par l'essemple au roi de France, à qui le pape aléauta ses fiz, qu'il avoit eu de la segonde feme au vivent à l'autre. Enprès dit le pape que ce n'est pas senz cause : car li rois fut départiz de la première par juigement d'iglise, et avant qu'il se mariast o la segonde, et avant que l'en li deffendist ; et disoit qu'il avoit parenté entre lui et la premère, et ce prova par garenz, et por ce fust départi ; et com le plet fut comenciez do premer mariage, li enfant qu'il avoit eu de la segonde devent estre molleré, se la premère estoit sa cosine. Et cum li rois n'eust pas plus haut de soi en tenporés choses, l'en l'a fet en espérités ; et autant de poer a un pape comme ot saint Père.

Note que trois menières de causes sunt : criminel, espéritel, et citéenne ; et la quarte est meslée, si comme cause de mariage et patronage. Et note quel poine ont cil qui sont nez en avotire, qu'il ne poent estre ordenez, ne avoir héritage, ne les pères ne les devent pas norrir.

§ 12.

Idem. H. et R. can. Benenonen. Ex tenore13. Une demendoit l'éritage son mari par la reson de un enfant qu'ele avoit eu de lui. L'en disoit contre lui que son mari avoit esté nez en mariage, car sis pères l'avoit eu de la seconde feme, au vivent de la première. Encontre disoit l'en que la segonde ne savoit rien que cil eust autre. Le pape dist qu'il doit estre léaus.

Note que feme est heir à son mari en héritage ; et feme qui plèdee est receue por ses enfans ; et cil ne sont pas avotre qui ne nessent pas de avotre conscience ; et mariage est juigé à léau por l'amor des enfanz, qui autrement seréent desléaus.

§ 13.

[p. 213] Idem Tiberensi episcop. Gaudemus14. Enfanz nez de mescréanz en mariage joint en trois ou en deux genou, enprès ce qu'il sont converti, por le preu de l'iglise, devent estre tenu por franchi et por léaus.