§ 1.

Alex. III. Utrum2. Ticius tient sor fonz la fille Berte : ceste fille ne se pot marier o nul des filz. Ces autres fiz et cez autres filles Berte et Ticius se poent marier, se aucune costume d'aucune iglise n'est encontre ce.

Note que la derrenière costitucion fet tort à la première, tot n'en face-ele nule mencion ; et costume fet léaus ou desléaus aucuns à soi marier.

§ 2.

[p. 199] Idem eidem. Si vir3. L'en dit ci que se hom ou feme lèvent enfanz de fonz, qui sont lor propres, l'en ne la doit pas départir por ce, mès l'en doit amener à pénitence de continence ; tot dient autres autrement, que s'il le font par ignorance, il sont excusez ; se escient, il ne devent rien gaagnier.

Note que ce qu'est establi généraument, si cum compérage, n'empeeche pas mariage à fere solement, mès il dépièce le fet ; et folie et ignorance excuse.

§ 3.

Idem. Vigilien. Episcopo. Super eo4. L'en dit ci que de commun droit fiz ou filles de compères se poent marier, for cil par qui le compérage est fez. Mès cele ou nule des autres ne se doit marier, se ele le fet, ele doit estre départie, se costume d'yglise non donne que fiz de compères ne s'entrepregnent par mariages. Et si tel costume n'est gardée, li prélat porra lesser assemble en manière d'oblience.

Note que costume est gardée en joindre mariage et en dépécier. Note que l'en doit recorre à la costume des veisines iglises, non pas de l'iglyse de Rome ; et qui se test, ne n'otroie ne ne désotroie.

§ 4.

Clemens III. Martinus5. Martin avoit Berte à feme, et Lohier, Teberge ; Lohier tint le fiz Berte et Martin ; quant Lohier et Berte furent mort, Martin prist Teberge à feme : l'en demende se tel mariage tient ? L'en dit que non, car ele estoit sa commère par la reson dou mari.

Note que par un des mariz est aquis compérage ; et home et feme sont une char par mariage.

§ 5.

Idem. Contracto6. P. se maria o A. ; et quant il orent esté ensemble deus anz, li cosin à la feme distrent que ele, avent que ele se mariast, estoit commère P., et le fiz son mari, que il avoit eu de mechie avoit cele A. doné le sel bénoit : et por ce li évesque lor défendit que l'un ne f.... l'autre. L'en dit ci que li hom retort à sa feme, car tel empêchement ne nuist pas à marier ; s'il est fet, il ne pot départir.

[p. 200] Note que por ce qui est avant batesme fet, n'enpêche pas, ne n'est pas fet compérage ; et la niceté au juige ne nuist pas as parties.

§ 6.

Inno.III, episcopo et ar. linconen. Veniens7. Cum un eust f.... une ribaude, que ce fet ne fut seuz, la feme prist le fiz son ami qu'il avoit eu d'une autre, et le tint sor fonz. Cil hom emprès cele feme esposa ; et quant il n'en pot avoir nul enfant, il prist une autre, et la lessa. Le pape dist que, se la première feme, avant qu'ele se mariast o lui, tint son fiz, qu'il séent départiz.

Note que compérage despièce mariage et destorbe.

§ 7.

Idem. Magist. s. ca. herefodenen. Tua8. L'en demende se cil qui est nez devant compérage se pot marier o la fille son compère ou de la commère ; ou s'il sunt commerz, s'il devent estre désevrez ; et savoir se cil qui tel mariage sevent, le devent acuser apertement ? Et l'en dit qu'il devent estre départiz ; et cil qui rien en sevent le devent dire à l'iglyse.

Note que l'en ne doit pas solement dénoncier le péchié de mariage, mès l'empeechement ; et chascun est tenuz au dire.

§ 8.

Gregorius IX. Ex litteris9. Com une feme demendast un home à mari, et deist que il l'avoit fiencée, et enprès l'avoit f...., le plet entamé, li tesmoing receu et overt, li hom dist qu'il ne la poet avoir à feme, por ce que le père à la feme, qui avoit esté prestre, l'avoit banie. Le juige ne reçust pas ceste barre, et ala ostre en la cause. Li hom por ce apela. Le pape mende, que s'il est issi, que quantque a esté fet soit dépecié.