§ 1.

Alex. III. De diacono2. Un diacre se maria o une feme, et fist plere à un diacre. Le pape dit que, s'il retorne à s'iglise ou humilité, l'en li porra fere grâce, et fere son office, et porra estre ordené ; et li soz-diacre ne se pot marier.

§ 2.

Idem. Cenomen. Episcopo. EX litterarum3. Un soz-diacre se maria ; le évesque le efforça forjurer sa feme : l'en dist que il fist bien ; et s'il no volt otroier, et il viot entrer en religion, il ne porra fere son office, ne avoir autres ordres.

Note que cil qui se marient contre droit devent forjurer l'un l'autre ; et souz-diacre qui se marie ne doit d'iqui en avant amenistrer en ordre de soz-diacre.

§ 3.

Idem. Wg. Episcopo. Neminimus4. Un fit profession en la main d'un abé ou d'un évesque : l'en dit que s'il se marie, l'en le doit forcer de retorner à religion, se le vou est sollempné ; s'il est simple, non.

Note que habit fet moine ; et qui est profès ne se pot marier ; et simple vou ne tost pas mariage, mès il tost à marier.

§ 4.

Idem. Luc. episcopo. Consuluit5. Une dame prist robe de religion, ne n'i entra pas, ne ne fist profession ; et puis geta l'abit, et se maria. L'en dit ci qu'ele remaingne à son mari ; car habit sans profession empêche mariage, mès ele no dépièce pas.

Note que l'en puet bien recevoir veil de main de prestre.

§ 5.

Idem. Veniens6. Une feme esposa un home par futur ; ele oït dire que il estoit trop cruel, et par devant un hermite fist vou. Cil se maria o une autre ; quant ele l'oï, ele se maria. Le pape dit que bien le pot fere.

Note que l'en puet fere esposailles entre cez qui ne sont pas présenz ; [p. 194] et se aucun fet vou par peor il n'est pas tenuz ; et simple vou ne lie pas.

§ 6.

Idem, Rursus7. Un voa chastée par simples paroles, et jura enprès que il l'aposeroit une feme : l'en demende qu'en dit droiz ? Que il gart son vou, et qu'il face sa pénitence do serement ; et s'il se marie, le mariage tient ; car simple vou empeeche mariage à fere, mès il ne la dépièce pas.

Note deus relles : que simple vou et sollempnié lie maeme quant à Deu ; et simple vou empêche à marier, mès il ne tost pas ce qui est fet ; et note que vou, de la nature de soi, ne dépièce pas mariage, mès c'est de constitucion d'yglise.

§ 7.

Inno.III, Visconen. ET Col. episcopo. Insinuente8. Une feme disoit que, cum son mari fust mort, ele cremoit que l'en ne la forçât marier à un de la cort le roi, et fist vou de chastée, et prist habit de religion, et remest en sa meson o ce que ele avoit. Li rois oï ce, et deffendi que l'en ne li feist rien. Enprès un de la cort le roi aporta unes letres por la avoir à feme ; cele ne le volt fere, et s'en défoï, et se maria à un autre, et en ot enfanz. Or demende l'en s'ele pot o cetui remanoir ? Le pape dist que en fere ce n'ot point de force ; et s'ele i fut, tote fut oblié par si lonc tens, et doit tenir son vou ; et commende, que s'il est issi, que ele soit forcée à prandre l'abit et à garder son vou.

Note que aucun pot prendre habit en sa meson et estre religios ; et salu de l'âme doit estre mis avant totes choses terrienes.