I. [41rB] De juigemenz et qui puet juigier et qui doit estre au juigement et plante convenable et de force de juigemenz et de semonses [rubr.]

Se aucun se metent sor la juridiction d’aucun juge qui a juridicion et que il soit en cort, se s’i acordent les parties, c’est juridiction.

Cil sunt veü acorder soi qui se consentent en aucun, et bien sevent que il ne sont pas sor lui ; et s’il cuident que il et juridicion et il n’an n’i a point, ¶ l’error à pledeors, ausit comme Julian dit, ne fet pas consentement ; ou s’il cuiderent un officiau por autre, ceste error ne done pas juridiction ; ou se aucun des pledeors contrata à droiz de la provosté et fu forciez, il n’i a nule juridiction. ¶ {1} Acort sofist antre privees persones ou li consentement au prevost ? Et Julien le dit, qui ne mut pas l’acort des privez, et donc sofist l’acor des privez. ¶ Et s’il se consentent et li prevoz n’en sache rien et cuide que ce soit sa juridiction, l’an doit voer s’i fet asez à la loi ; et je cuit que l’en puet bien dire que il a juridiction. ¶ {2} Et se le juige est doné en certain tens et tuit li pledeor s’i acordent à alongier le tens, se prince ne le deffant, li tans puet estre alongié dedanz cui il termine le plet. {3} Li legaz, de ce que il furent avant que il fussent legat, et cil qui sont apelé por estre garanz et cil qui sont apelé por juger ou sont envoié en la province, ont droit d’estre semons à lor meson. Et cil qui apele por soi n’est pas tenuz à respondre à ses averseres dedanz l’apel que il a fet à Rome ou en autre leu, car cels dit que tel doit avoir congié de retorner à sa meson por ce que il vint la por autre afere ; [41vA] et ceste sentence est verae et resonable. Et issit dit l’enpereor que cil qui estoit semons à Rome por conter dou ban que il avoit eu, il ne devoit pas respondre d’autre ban que de celi por quoi il avoit esté citez. ¶ Et si dit il de celui qui n’avoit .xxv. anz qui voloit estre restabliz contre Tybert, qui estoit1 venu por autre cause à Rome, que cil menor ne doit pas estre oïz. {4} Et toz ceus ont droit d’estre semons en lor meson, s’il ne font aucun marchié la où l’en les veaut citer. Et ‹s’›il i ffont aucun marchié, il convient que il respondent, fors que li legaz, que tot eent il fet aucunne chose ne mes que ce soit avant que il fussent2 legaz, l’en ne les puet forcer de deffendre soi à Rome, tant comme il sont en la legacion; et ausit le dit Julien. Et se lor legacion faut, divus Pius dit que l’en les puet trere en plet. {5} Et s’il font marchié hors de la province et non pas en Lonbardie, l’an demande s’il puent estre tret en plet à Rome. Et Marcellus dit que il ont cel previlege d’estre semons en lor meson comme il ont en la cité ou s’il font marchié en la province ; et c’est voir. ¶ Et s’il pledoient, il sont forcié de deffendre soi contre toz, non pas s’i volent venger injure ou domage ou larrecin que l’an lor a fet ; si que non, si comme dit Julien, et bien, i avront domage et despit sanz poine, et issi porra chascun travaller les et metre les sor sa juridiction. {6} Et s’il an dote si aucun puet de droit retorner à sa meson por i estre semons ou non, li prevoz doit deffendre lou quant il avra oï la cause ; et s’il set que il i ait droit, ‹...› por le commandemant au prevost an cui il se met. Mes Marcellus dote s’il doit doner nue caucion, ou autre plus grant. Et il est aparissant que sole promesse i sofist, et issit le dit Mola, se que non il est plus tenuz dou prandre le plet que de doner caucion à cels qui font satisfacion por li {7}, et par tot la où amonestement est alongié sanz que li creancer [41vB] i ait domage à ja. ¶ {8} Et cil a poer de dire droit de poine qui s’entramet des communs jugemanz, et nul autre n’i a poer se l’en ne li mande especiaument.

Cil ne s’atapist pas por aucion deneent qui ne fust pas tenuz de prandre sor soi le jugement s’il fust en present.

Nos ne poons avoir nul plet à cez qui sont en nostre poer se n’est de lor chatel.

Se aucuns d’autrui juridiction es‹t› trez en plet, il i doit venir ; ausi comme Ponponius dit et Judius. Li prevoz doit voir se la juridiction est soe, si que cil qui sont devant lui semons ne se moquent de lui ; et li legat et li autre qui ont poer et droit d’estre semons à lor meson sont en tel cause que, s’il sont semons, il devent venir à cort por aleguier lor privileges.

Orb puet estre jugiez.

Se aucuns qui est semons commaince à estre d’autre juridiction, il ne sera pas semons à sa meson, ne d’i retorner por estre semons, car il est desavanciez de la semonse.

Se aucuns fet en sa legacion ce que il dit avant, il ne puet pas estre forciez de prandre plet sor soi la où il fist le fet.

Cil lesse le plet non pas de tot qui le plet porloigne mes qui de tot le lesse, car de lessier c’est entendu que il lesse ce que il avoit commencé par haine. Et se aucun set l’amende de son afere et lesse à ja son afere, ne ne veaut pas mauvés plez maintenir, cil ne lesse pas son plet de tot.

Quant li prevoz defant à un de pluisors jugier, il est aparissent que il voille que cil autre jugent. ¶ {1} Cil puent doner juge qui en ont poer de par loi ou par constitucion ou par senator, si comme conte. Et cil meismes à qui l’en a doné juridiction puent doner juige, si comme legat et contes ; ¶ et cil qui l’ont de costume par la force de l’ampire, si comme li prevoz de la cité et li autres metres de Rome. ¶ {2} Tuit ne puent estre doné juiges [42rA] de celx qui ont poer de doner juiges. Li un sont deneé por loi que il ne soient juge, ¶ li autre por nature, si comme sort et mu et desvez toz tens, et cil qui n’a .xiiii. anz por ce que il n’a pas mout de reson an soi, ne li desvé. Et cil n’i pet estre por deffanse de loi qui est osté hors d’estre senator, ne femes par lor folie, et serf por ce que il n’ont pas poer d’estre juiges ne d’autres offices de citez. ¶ {3} Ne monte rien que il puent estre juges s’il sunt en lor poer ou an autrui.

An cez .ii. plez, si comme4 ‹…› commune departir et de mestre bonnes, l’an demande qui est autor. Et por ce que la cause est à toz ivel, acordé est que cil soit autor qui par jugement5 se plaint.

Et quant il se pleingnent dui, la chose doit estre departie par sort cest jugement.

{1} Lors dit l’en que li juiges fet la cause soe quant il dit par boidie et par tricherie sentence contre la loi. Il apert que il face ce par tricherie ‹s’›il est aparissant que il le fet par haine, ou par amor ou par loer de aucunne des parties, et est lors tenuz de randre la value dou plet.

Julien cuide que l’en ait aucion contre celui juige qui fist la cause soie ; ce n’est mie voir et plusors l’ont issi noté.

Julien dit : se l’un de cex qui pledent fet le juige son heir de tot ou de partie, à force convient prandre autre juge ; car delaiauté seroit que aucun fust juge en sa cause moismes, aceté le roi.

L’an doit cuider que tote obligacion soit marchié, an queque leu que aucun se oblige que il face le marchié, tout n’i et il rien de cause de creance.

Se je vuel à mon detor dire ma demande, l’en doit voir s’il reconoit que il die ; et que s’il dit que il soit prez de randre, l’an le doit oïr et li doet l’en doner jor dedanz quant il rende ; car l’an n’a pas grant domage en demore de pou de tens. Et l’en entent ci «  petit tens  » celui que l’en done à detors aprés ce que il [42rB] sont condempnez la nuit.

Cil qui n’est pas forcez an aucun leu de prandre plet sor soi, s’il le demande, il convient que il li responde par devant s’i li plet.

Ce que avient anprés jugemant ne vient pas avant an jugemant, et autre demande i convient.

Se aucun achete un serf ou autres choses au tens que il est legat ou s’il les tient par autre cause, droiz est que il pregne le plet sor soi par la reson de celui marchié. Autrement porroient li legat par tel meniere autrui choses anporter en lor mesons.

Qui premers se plaint, premier doit estre oïz.

La où li plez est commenciez une foiz, la doit estre determinez.

N’est pas aparissant que, se l’en demande avoir la demande, que por ce se mete l’en an la juridiction au juge.

Se cil qui prist sor soi à Rome plet muert, li ers à celui doit estre deffandu à Rome tot eit il sa meson outremer, car li hers est remés ou leu au mort.

Jugement ne doit pas pandeller ausi comme plevine, ne n’an puet l’en joer de futur, ne des choses qui enprés sont à venir an obligacion ; car je ne cuit pas que l’en ne puisse prandre pleige avant que li marchez soit fez ; mes nus ne puet prandre plet de que il soit.

Se l’an fet plainte que l’an tiegne aucunne chose por force et anprés fet la plainte de sesine avoir, l’en doit avant conoistre de la force que de la seignorie de la chose ; et issi le dit li enpereor.

Non est pas besoing en quanque li juges fet que soit ballé ne comis an son poer. Se li juges lesse aucunne chose à fere de droit an son jugement de ce que la loi commande, il fet contre la loi.

Se aucun demande caucion, l’en doit fere condempnacion par droit en toz loiaus [42vA] jugemanz se li jorz des deners rendre n’est venuz.

Cil qui promist à fere une meson dedanz Paques et ne la fet pas an queque leu que il soit, il est tenu de fere la.

L’en doit garder que celui juge soit doné que l’autre partie demande par non, que li enpereor dit que c’est mauvés exemple se li juiges ne l’otrie, especiaument por oster la vergoigne au juige que l’an requiert.

Procurator doit estre et puet por son seignor mener7 la chose an juigement ; et c’est voir. Et se aucun qui n’estoit pas procurator entaime le plet, et li sires l’a enprés atable, li aferes vet bien.

Se l’an ne nome le leu où l’en doit jugier, il est aparissant que l’an doit juger là où l’en a a costume sanz le domage à cex qui pledoient ensenble.

Quant le juge est mort il convient que cil que vient enprés li face le jugement que cil devoit fere.

L’en ne puet antre les parties le plet autrement delivrer se l’un ne demande et li autres ne tient, car il doit estre aucun qui gart et sotiegne la partie au demandeor et autre qui sotiegne la partie à celui qui porsiet.

Se aucuns dit aucunne reson oustreement, l’an doit entendre et prandre ce qu’est plus profitable.

Se li prevoz commande à celui à qui l’en demande la dete venir à son jor par une semonse et puis por autre et il condampne celui qui n’est venuz à rendre la dete, li juiges qui conoit de cet marchié doit conoitre de la sentence au pr‹ev›ost, si que non les jugemanz au prevost seroient tenu à moqueis. ¶ Marcellus dit que se aucun allegue aucunne chose fausement et par ce veust tenir la sentence au prevost, je cuit li juges doit recevoir la complainte. Paulus dit que se cil est destorbez de maladie ou por la commune, je ne cuit pas que l’en doie doner contre lui aucion de chose jugie, ne que l’en ne doit pas fere randre le jugemant.

C’es‹t› commun donque [42vB] estre juiges.

Se l’en faut aucunne foiz à mestre lo non ou le sornon au juige, Servius dit que cil doit estre juige la où les parties s’acorderent, et s’il fust an leu par convenance et por acort.

Cil qui n’a juridiction de prince ne d’aucun poer, ne de celui qui a poer de juige doner, ne n’est arbitre ne confermez d’aucunne loi, ne puet estre juige.

L’en doit savoir que moult i a pleinté de testamant qui ne vaut rien, et peranz et enfanz puent deputer de tel testemant. Et li pruchein chosin, qui sont hors de numbre à freres, fereent mau s’il travalleint l’un l’autre de despans quant il n’i puent rien gaagnier.