XXI. De mesures avoir.

§ 1.

L'en dit ci1 que nus ne doit avoir mesure en sa meson, où il vande ou achate, s'il ne la prant là ou il la doit prandre, selonc l'establissement de la ville : c'est à savoir chiés celui qui est establiz à ce fere ; ce doit estre fait par le juige. Et ce fut par mout grant léauté establi, et por le commun à cels qui achatent les choses que convient mesurer.

Anprès l'en deffant que nus ne mesure en celé, ne que nus ne face plus mesures, que le numbre tel comme il sera establiz ; et qui barat i fera et qui encontre ce ira, il sera en la merci le Roi.

Et se aucuns dit aissint : Cel home m'a ballié ce por tant et por ce numbre ; li numbre n'i est pas ; si voil avoir mon numbre. A ce respont li copables : Comme il emportast cele chose sanz contanz, je ne li en vuel respondre, se droiz n'est. L'e (l'en) demende ce qu'en dit droit ? [p. 146] Et l'en respont que, segont ce mot, l'en ne li doit pas respondre. Et s'il dit issint : Il m'a mesuré à fause mesure, comme fausoniers ; et s'il le veaut jurer, prez sui de motrier et de l'avérer par moi et par garanz, come cil qui siet ce de voir et de savoir ; et vez la mesure qui est ci. Et li autres fet encontre tel ni et tel deffanse comme il doit, et nie la mesure. L'en demende que dit droiz ? Et l'en respont que li copables est loisans de prandre la prove au demendeor et de son garant, et de quenoistre que ce est voir, ou d'escondire par gage de batalle.

Tel juigement comme il i a cil (ci), doivent à droit estre tenuz en totes les choses que l'en puet porter, départir, sanz apersever, si comme moble et vin, huile, vin et en tex choses semblables, et en dras entammez. Et en mesures de terre, en dras entiers et en tailes entières, cort autre juigement, c'est à savoir : vos me vendîtes terre por tel numbre, et ceste teille ou cel drap ; la vente est queneue, et li numbres ; s'il ne puet avoir champ ne bataille por mot que l'en i puisse metre ; ainz sera li numbres establiz. Et se la jotice veaut, cil qui la mesura, jurra sor sainz qu'il la mesura léalement et bien à son esciant ; et partant s'en passera. Mès se vos mesurez à fause mesure apenséement, l'en le devroit pandre comme faussoner.

Après l'en dit que un mesuror de terre ne deit estre, s'il ne siet mesurer, et s'il n'est assoiez, et s'il n'est jurez, et toz mesureors qui mesurent en commun.