VII. [45vA] De demande de chascune chose [rubr.]

Enprés les aucions que li prevoz dist de tot, enprés il parle de demande1 de chascunes choses ; {1} la quel demande a especiau leu en totes choses, en moeble, et en bestes et en autres choses qui ne vivent pas, et en ces choses qui sont en terre contenues. {2} Par ceste aucion ne puent estre demandé franche gent qui sont en nostre poer, si comme noz enfanz, donques aucun puet chalongier ou par especiaus demandes ou par devant le prevost ; et issit le dit Pomponius, «  s’il n’i ajoint autre cause  ». Se aucun demande issit son fiz por ce que il est encore en son bail segont la costume de Rome, il m’est avis – et Pomponius dit et s’i consant – que il demande bien, quar il dit que il puet bien chalongier par droit s’il mest et dit la cause por quoi il demande. ¶ {3} Par ceste demande non pas solement unes choses puent estre chalongies, mes tot un monciau [45vB] de bestes ; et issit le dit Pomponius. Et ausi dit il des bues et des vaches et de harmanz et de ces autres solaz de bestes. Et il nos sofira que li moncel soit nostre, tot ne soient il pas nostre chasque chief, et l’en chalongier tot et non pas par parties.

Et se li nombres est ivel, l’en ne demandera pas tot le moncel mes la moitié de tot. Et se l’un en a plus, et se l’autrui en est ostié, il ne laisse pas à chalongie‹r› le moncel ; autrui chiés de bestes n’avienent pas à estre randues.

Cil qui avoit un moncel de bestes en perdi .iii. cent et en rachata .c. et autretant chiés de celui qui en avoit la seignorie ou autres de celi qui la tenoit en bone foi ; et ces choses seront en la demande dou moncel des bestes. Et se cil chief remainent sol qui furent rachaté, il puet enchore chalongier le moncel. ¶ {1} Ausi porra l’en chalongier les aparez de la nef, et la nef porra l’en chalongier par soi. ¶ {2} Ponpeius dit : se aucunne chose qui est d’une nature est si mellee que l’an ne la puisse departir, l’en ne la demandera pas tote que une partie ; ausit comme mon argent et le tien2 est tot mis en une masse, il est commun à nos, et nos porron demander tant comme li pois se monte qui est en la masse, tot ne sache l’en conbien de pois il eit en cele masse.

Et en cest quas pourra l’en avoir aucion de departir communauté. Mes cil sera tenuz de larrecin et sera tenuz de monstrer la chose qui par sa tricherie fundit tot l’argent ensenble ; et à celui argent monstrer il convandra que il voie que il vaut en chalonge ou en aucion de partir la commune chose ; et cil qui le plus precios argent eü avra la plus grant part.

Ausi dit Ponponius que se li fromanz à .ii. homes est meslz ensenble, chascun puet avoir de demander la chose en ce qu’est aparissant combien chascunns i a au moncel. Et se cil fromant [46rA] est ensenble por lor volenté, lors sera il commun et avront aucion de partir la communauté. ¶ {1} Ausit dit il : si l’en fet de ton miel et de mon vin un bruvage, aucuns cuderoint que ce fust à communauté ; mes je cuit que il soit voir qu’i soit à celi qui le fist, pour ce que cele mellee n’a pas la force ne la senblance que ele avoit avant. Et se l’en melle plon o argent, por ce qui l’en puet departir l’un de l’autre, il ne sera pas à communauté ne n’avra l’en pas aucion de departir la chose commune. Mes se l’en ne puet la chose departir, ausi comme arein et or est mellee ensenble, l’en le porra demander en partie, ne n’an dira l’en pas ce que l’an dit dou bruvage, car l’une et l’autre matere, tot soit ele meslee, ele remoint. ¶ {2} Ausit dit il : se ton cheval enproigne ma jumant, ce polein qui nestra est mien. ¶ {3} Variis et Navra doient3 aucion en choses demander por l’arbre qui mena ses racines en autrui champ et s’i anorri ; car se cel arbre ne se norrist, il est encore mien. ¶ {4} Quant l’en demande chose et l’an ne la set nomer et l’en s’acorde en cors de li, l’en en pledoie à droit. ¶ {5} S’il i a sers plusors tot d’un non, ne il n’est pas aparissant de quil at le plet fet, Ponponius dit que ce n’est rien, ne que l’en ne puet doner certaine sentence.

Se aucun demande aucunne chose il doit dire combien il demande, ou tot, ou partie et combien ; car apel de chose ne senefie pas geunre mes espee. ¶ Octaveisus dit issit que de tel chose qui est fete doit l’en dire le pois, de contable le numbre, de chose fete la senblance ; et se c’est chose mesurable, l’en doit dire la mesure. ¶ {1} Et se nos demandon robe que nos dison que soit nostre, en diron nos le nombre et la color ? Et miauz est que nos dion ou l’une ou l’autre, car ce n’est mie cortoisie que l’en nos force à dire se sont viez ou nouveaus. ¶ {2} Et grieve chose a en verscex [46rB] deviser, quant l’en les demande savoir s’il convient dire ou escuele, ou quarree, ou reonde, ou tote sanz ovroigne ou ovragne ; et c’est grief chose de mestre ce en demandes ; et il ne sont pas si estroites. Tot conviegne il dire le non de home quant l’en le demande et convient dire s’il est enfant ou vallet et s’il en i a un ou plus. Et se je ne sai son non, je doi lui monstrer, ausi comme se je di «  cil qui fu nez de la  » ou «  li fiz à cel feme  ». ¶ Et cil qui demande teneure, il doit dire le non et le leu où il est.

Se cil qui demande la teneure la perdi, por ce ne remandra pas que il ne la puisse demander à celui qui la tient, ausint comme Pedius dit.

Se tu et Lucius Tucius devoez une teneure commune à moi et à toi par ives parties, ne ne doi pas à .ii. demander le quart, mes à Tybert, que n’en est pas sires, tote la moistié. Et se nos tenon tote ceste teneure à certaines devises et à certaines regions, et lors senz dote et à toi et à Tybert doi je demander les parties de la teneure. À totes les foiz que l’en tendra aucunne chose certainement, il convindra que aucunne part en soit meie ; et por ce doi je demander à toi et à Tebert le quart. Ce n’a leu ne demande de moble ne de teneure, quar l’en puet bien porseer chose devisement4.

En ceste demande doit li juges voer se cil à cui l’en demande tient la chose, que l’en n’a que fere de demander por quel cause il tient la. Où je prove que la chose est moie, il convient que cil qui la tient la me rande, qui n’i set mestre nulle barre, ausi si comme dit Pagasus, qui cuideroint que à ce demander eust l’en aucion de teneure. Anprés si dit que l’en puet demander à celui à qui l’en avoit bailliee la chose an garde ou prestee ou aloee ou en garde lessee, ou en feme [46vA] qui en estoit seissie par ce que ele estoit grosse, ou cil qui ne puet doner caucion de domage que l’en li metoit sus que il avoit fet, quar cez ne porsient5 mie. Je cuit que l’an puet demander à tot cex qui tienent et ont poer de randre.

Se l’en demande chose movable la où ele doit estre rendue, s’ele n’est presentee ce n’est mie mal se cil qui la tint en bone foi ou qui l’an plede et se cil qui l’en demande requiert que ele li soit rendue la où ele est ou la où li plez est, bien est que il la face aporter à ses couz ou par terre ou par eve.

Se cil qui la demande ne viaut miauz à ses despans et à son domage que la chose li soit rendue la où6 il l’a demandé, lors cil qui la tient donra caucion de rendre li la.

Se cil tient en male foi la chose que il a eue et conquise en autre leu, l’en doit establir ausi ; et s’il la porte en autre leu que la où li plez fust entammz, il la doit rendre à ses despenses de la où il la porta.

Il n’est pas tenuz de la chose solement rendre, mes l’enpirement, s’il i est, doit il amender de par le juige. Posé que li home que je demandoie soit afebliz ou batuz ou plaiez, li juiges en doit fere reson de l’enpirement ; et cil qui tient la chose en doit estre trez en plet par l’aucion de la loi Aquiliene. Don l’en demande se l’en doit autrement prisier le domage se l’an lesse l’aucion de la loie Aquiliene. Et Labeo cuide que cil qui demande doit doner caucion que il ne usera de cele aucion ; et cele sentence est veroe.

Et s’il l’erent batu, Labeo dit que cil a contre lui aucion et demande de injures. ¶ {1} Se aucun mest par besoing aucunne chose en autrui mein, li juiges par avainture le deffandra que il rendra sanz plus que l’argent que il en a eu ; et s’il a mis en autrui mein les fruiz que il a euz, il n’an rendra que les fruiz s’i le fist por ce que li fruit n’enpirassent. {2} Et se l’en demande un champ et il est donz à chevaliers par grace d’onnor [46vB] à celui qui le tient, l’en demande se cil le doit rendre. Et je croi que oïl. ¶ {3} Se serf que l’an demande ou autre beste est morte sanz tricherie et sanz cope de celui qui la tient, aucuns dient que il n’en doit pas rendre le pris. Mes il est voir que si les devoit mestre en autre mein se cil qui les demande n’en fust en cope, il dut amender à celui qui demora on avoir les, car s’i li eust baillees et il les eust rendues il eust l’argent gaingnié.

Et s’el est fuit par le conchiement à celui qu’i tient, il doit estre condempnz ausi comme s’il tenist.

Aucion avient à demander chose à celui qui a conquise la seignorie ou par droit de genz ou par costume de citez. ¶ {1} Choses d’eglises ne choses religioses nos ne les poon demander comme noz. ¶ {2} Se aucun aconpaingne autrui chose à la soie por avoir en sa part, ausi comme se aucun ajoint o un braz ou autrui pié à un ymage qui est mien, ou une anse à mon hanap ou un fonz, à un chandelier une ymage, ou un pié à une table, il doit estre sires de tote cele chose ; et que li ymages est siens et li bans, si comme aucunes genz dient. {3} Et ce qu’est escrit en mon parchemin ou an ma table est mien de maintenant, tot eent aucun cuidé encontre de la pointure par le coust que ele costa à fere ; mes il convient que l’en loet ce sanz qui cele chose ne puet estre. {4} Et en tot ce où ma chose vaut plus que autrui chose, et fete la moie, se ja la demande, mes il me convendra rendre le pris de li par barre de tricherie que l’an mestra avant. ¶ {5} Et quanque l’an joint à aucune chose, remaint à cele chose à qui ele est ajointe ; et tant comme cele chose se tient, li sires ne la puet chalongier, mes il puet fere en sa demande tant que l’en li monstre la chose por fere la chose fere, et lors sera la chose chalongie ; fors ce que Casius dit de ferrumee, car il dit : se li braz est joinz à s’image par fer et l’une des parties est gastee, ce qu’est mis en autrui mein une foiz, tot [47rA] soit il de tot en un jor, ne puet retorner au premier seignor. Ce n’est pas ausi en chose plommee, car ferrumee confont par autel cause la chose ou ele toche, et plommeure ne fet pas ce. Et la où aucion de chose monstrer ne à demander l’en a leu7, aucion de fet i est bone ; et la où chascun cors puet retenir sa propre senblance, ausi comme est home et une berbiz. Se j’en demande aucun qui soit en une assenblee, ausi comme de berbiz8, s’i sont ensenble je puis demander le moncel, ja soit ce que tis motons s’i soit feruz, et lors puis je demande le moton. Et ce n’avient pas en autres choses, car se tu mez à mon ymage autrui braz, l’en puet dire que cil braz n’est pas tien, car tote l’image se tient à un esperit. ¶ {6} Nus ne puet chalongier chevron mis en autrui meson, ne ne puet l’en requerre aucion à monstrier le, fors que contre lui qui li mist à escient en autrui meson. ¶ {7} Et se aucun fet edefice an sa terre d’autrui ciment, il porra chalongier la meson, et li premiers sires demandera son ciment qui est depeciez, et se la meson est depecee enprés .iii. anz puis que aucun achateor l’a tenu en bone foi ; car li mortier ne li cimanz ne sont pas mis en prescricion de .iii. anz, que l’en apele usucapion, se la meson nos remaint par espace de tens.

Cil qui propose à demander la chose doit regarder s’il porra avoir sa sesine par aucunne demande, car mout vaut sesine à l’aversaire contraindre à ce que l’en li demande que demande fere sus celui qui tient.

Cil qui s’offri à deffandre la chose sanz cause comme il ne porseist pas, ne ne feist pas chose par quoi il ne tenist, se li autors ne le set, il ne doit pas estre quités, ausit comme dit Marcellus ; et ce voir, mes9 c’est quant le plet est entemmez. Mes avant s’il ne deçoit, il ne deçoit pas celui qui demande qui nie que il ne porsiet pas por voir ; ne cil ne s’ofre pas à deffandre le plet qui se muert avant.

Car se li autors le fet, il n’est pas deceuz par autre que por soi moismes ; et por ce doit estre asos cil à cui l’an demande.

Li fruiz qui sont pris, non pas solement ore mes autre foiz, doivent estre prisez. Et se la chose que l’en demande perist par la tricherie ou par la cope de celui qui la tient, Ponponius cuide que la sentence Trebatius soit plus veroie, que il cuide que l’en rende reson des fruiz ausi bien comme se la chose ne fust pas perie jusqu’au tens de la sentence ; et à ce s’acorde Julien par ceste reson : se li sires de la proprieté demande nuemant, et entre tant li usages est perduz, l’en puet les fruiz conter de si to tens que li usages retorne à la proprieté.

Ausi est se une partie acroit à cele teneure par croissence d’eve.

Qui use de demande qui ne pledoit por noiant : il doit demander se cil o qui il pledoie est porseor ou s’il a lessié à tenir por barat. ¶ {1} Cil qui est tret en plet por chose est condampné en non de cele chose. Li porseor doit estre en cope qui envoia le serf par leus où il fu aguitié s’il i fut tuez, et s’il otroia son serf que l’en li demanda estre en la greve à soi conbatre se il i est tuez, et il ne garde pas le serf fuitif que l’en li demande s’il s’enfuist, et cil qui la nef que l’en li demande mist en mer par tempeste se ele i perist.

Julien dit : se je faz edefice en autrui ere que j’é achetee en bone foi, et se je fis l’edefice en celui tens que je savoie bien que ele estoit autrui, veon se barre me vaut rien s’ele ne me vaut par aventure por le domage que g’i é. Et je cuit que ele ne li vaut rien, car puis que il estoit certains que la chose estoit autrui, il n’i dut pas fere edefice, mes l’en li sofrera à oster son edefice que il i a fet sanz fere domage au segnor qui la chose est.

Tu feis edefice en autrui teneure que tu avoies achetee comme [47vA] fos om, plantas arbres, enprés l’en la te tost ; li bons juiges en fera droit diversement par les persones et par les causes. Posé que li sires eust fet ce que tu i fais, il te rendra ton despans por avoir sa teneure de tant comme il est enmandé celui leu ; et se la chose crieue, il rendra solemant ce que il i a despendu. Posé que il soit povre, se l’en le force à rendre, ce que il a mis en mesons en bone foi li sera il rendu ; il soffist à toi que l’en te soffre à oster ce que tu i as mis en tel meniere que la teneure ne soit enpiree plus que estoit avant que l’en i feist edefice. ¶ Nos establisons encore que se li sires est prez de doner autretant comme cil qui la tient en doit avoir quant les choses seront ostees, bien l’et s’il veaut, car l’en ne doit pas sostenir les malices es genz. Quar se tu veaus rere les pointures que as mises, ne tu ne les puez oster sanz enpirer la meson. Posé que li sires qui ara la meson la vende de maintenant, s’il ne rant tant comme nos dison que il convient rendre au commaincement, li plusor dient : quant ce sera osté, il sera condempné.

Cil qui rachatent et font edefices dou lor, la mesieres sunt de maintenant à celui en qui terre il sont fetes. ¶ {1} Julien dit à droit que fame qui engage sa teneure, ja set ce que li creancier l’et mis en autre mein, ele puet avoir aucion en la chose demander.

Quar il n’est pas apparissant que li creancier ait vendu nul gage.

Se aucun achate par tel convenance meillor que il lesse celi marchié, enprés la convenance ostee il ne puet user de aucion à demander la chose. ¶ Se teneure est baillie à aucun dusqu’à .i. jor avant que il soit issit baillie, il puet avoir aucion en la chose, mes enprés il ne porra. ¶ {1} Se ser ou fiz qui n’est pas hors dou poer an pere [47vB] me vent une teneure et m’an sesit comme cil qui poer en a, j’é aucion à la chose demander ; et s’il balle la chose par la volenté au seignor, ausit en doit l’en dire : comme dou procurator qui vent la chose par la volenté au seignor ou la baille, il m’a pareille aucion à la chose demander.

Se l’en demande aucune chose, ja set ce que li eir à celui qui tient soit asos s’il ne tient, se li morz fist aucun conchiement, li hers en sera condempné.

Ce que se tient à religion est lor ; et por ce les pierres qui sont oncore à mestre en ovre du quel soent ostees de leenz ne puent estre chalongees. L’en secort au demandeor par aucion de fet que cil que prist les pierres est tenuz de rendre les. Et se l’an met autrui perres en autrui teneure sanz la volenté au seignor, s’il en oste une partie sanz tot depecer por autres mestres, el porront estre chalengies ; et s’el sunt ostees por mestre arieres, li sires les puet ausi demander.

Li fruit qui pendent sont une partie de la teneure.

Despens que l’en voit que cil que tint en bone foi a fet en autrui teneure ne puent estre demandé de celui qui dona la teneure, ne de celui qui la demande ; ainz les garde par la reson de equité et de son office li juige, et par barre de tricherie que l’en met encontre, se li despens montent plus que li fruit qui ont esté pris avant que li plez fust entammz ; et li sires à qui est la teneure emendee est tenuz de randre le despens.

Je cuit que la terre est une partie des mesons ; et ausit est desoz comme la mer est soz les nés. {1} C’est mien qui remaint de ma chose de qui j’é poer de chalongier.

Se un champ apartient à aucun par cause d’achest, il ne por[48rA]ra user droitement de ceste aucion dusque il soit sesi dou champ. {1} Mes li hers puet droitement pledoier de ce qu’avint à l’eritage, tot ne soit il pas sesi.

Se l’en n’a chose demandee et sentence soit donee contre l’eir, la cope et la tricherie à l’oir vient en cest juigement.

Quant cil qui tient la teneure la lesse à tenir par tricherie avent que li plez soit entamnz, li heir à celui ne puent estre forciez de recevoir sus aus le plet par aucion de plet ; mes l’en puet avoir contre aus aucion de fet par qui il seront forciez de randre que il ont plus de celui plet et de cele chose.

Se cil qui tient malement la teneure la coutive et il seme et i ente, se l’en tost, il ne puet oster ce que il a enté ne semé.

Il a moult grant difference entre office de demandeor et de celui à qui l’en demande. Ne enprés ce, se aucuns set que cele chose li apartienge, il pert sa seignorie s’il la lesse comme esbahi à celi qui la demandoit.

Se cil qui tient la teneure muert avant que juigemant soit donez et lesse .ii. hers, et se l’en le demande à l’un de cez qui tot tenoit, l’en ne dote pas que il ne doie estre condampnez por le tot.

L’en ne chaloinge pas bestes comme chatel, mes cil à qui l’en a fet le lés demandera chascun chose.

Cil à qui l’en demandoit la teneure fu tret en plet d’une autre en non de cele teneure ; l’en demandoit s’il eust la teneure rendue à l’un et à l’autre par le comandement au juige, et enprés fu donee sentence segont ce que l’un demandoit, qui il n’i soffrist .ii. domages ; je di que il convient que il tenist le premier juigement à celi qui l’en demandoit, et doit l’en commander que il face gré au porseor ou dont caucion autel comme il eust fet s’il [48rB] eust le fié gagné.

Cil qui habite en autrui meson i fist fenestres et autres choses l’enz, li sires de la meson les osta. Je demande se cil qui les avoit mises les poet demander. Je di que oïl, car ce qui est ajoint à autrui edefice, tant comme il sont joint, at de l’edefice ; et puis que il en est osté ce qui est joint, il est ausint comme devant.

L’en demande à don Gaubert, se l’en li eust afetee sa nef d’autrui matire, savoir s’ele est por ce soie ; je di que ele li remoint. Mes s’il eust ce fet en fere la, Julien dit que il ne puit, quar la seignorie de tote la nef remoint au seignor.

Se cil qui demande la nef il doit ausi prisier et demander les fruiz qui solent estre venduz por le loage. Et ce n’est mie contraire en cest quas de celi qui ot la chose ou bail don li hers ne sot rien qui n’est pas tenu de rendre les osures ; car voiture moismes sont comme usure, qui n’est pas rendue par nature, est prisee et receue por droit. Totesvoes, puet l’en demander la voiture por ce que cil qui tient ne doit pas rendre au demandeor le peril de la nef ; car s’i le fet, il le fet à son peril. ¶ {1} Et generaument, quant plet est de celi, de celi qui tient en male foi, por les fruiz prisier, l’en ‹ne› doit garder s’il les tient en male foi, ou cil qui les tient les puet avoir, si li leus avoir le pris ; et ceste sentence loie Julien se il tint en bone foi11.

Quant l’en demande chose certaine, chose est que l’en doit rendre les fruiz en non de celes choses qui sont à usage12 non pas à fruit.

Nos ne dison pas que aucunne chose soit moins nostre s’ele se depart de nos se la condicion dou lés ou de la franchise nos remaint.

Je achate une meson dou tutor à l’orfelin, je an mene un menesterel [48vA] à refere la ; se li argent i est trovez, l’an demande à qui ele apartient. Je di : s’il n’a tresor, ou li argenz est perduz ou osté par error de cel à qui ele n’apartenoit pas, por ce ne remanoit pas que ele ne soit à celi à qui ele avoit esté devant.

Cil à qui li juiges commande que il rende et ne rent pas, par ce que il dit que il n’a de quoi, la chose que il a doit estre mise en main de chevalerie par l’ofice ou juige ; et est condenné à rendre la cause et les fruiz. Et s’il fist par tricherie que il ne poet rendre, il doit estre condempnez de tant com li averseres porra jurer por fere traïson. Et s’il ne puet rendre, ne ne fist pas por quoi il ne poist, il ne pot pas estre condampnz plus que la chose vaut, c’est à dire par combien li averseres n’on vossist. Ceste sentence est generau et a leu à totes choses en deffenses ou à demandes de choses ou de persones par quoi li juiges commande que l’en rende aucunne chose.

Qui fist par son barat que il ne tenist pas, il fust puniz en ce non, et li autors ne doit pas doner la caucion et que il et les aucions que il doit avoir en non de cele cause.

Ne il ne fu pas acordé que l’en li donast aucion. Ausi est cele que l’en done à celi qui achate aucunne chose de celui qui n’est pas seignor, que chascun met poer par sa rapine d’echeter chose de seignor à qui il ne plest mie doner por meindre pris que il ne vaut.

Et se cil qui tient fist ce par male tricherie et li autres ne veust pas jurer, ainz requiert que sis aversaires li soit condempnz por tant com il no vosist ou por tant comme la chose vaut, l’en doit fere mesure.

Se tu achetas de Tebert la teneure Samfroni et l’en te balle l’argent paié, et enprés Tebert est heirs Semfroni et il veust cele chose et balle à autre, droiz est que tu soies posseor, car se le vendeor te demandast cele chose tu [48vB] mestroies barre contre lui. Et s’i le porset et tu le demandes, tu uses de replicacion contre l’escepcion au seignor.

En aucion especiau n’est pas le porseor forciez dire quel part est soe de la chose ; ce apartient à celui qui demande, non pas à celui qui tient ; et c’est tenu en chose qui est vendue de tel qui vendre ne la puet. {1} Superficiario.

Li prevoz promet à doner aucion en chose demander quant il savra por quoi à celui de qui il est aparissant qui est en autrui chose qui l’en rende certaine pension ; et ce dit Ulpien.

Ce qu’est dit de tote la chose chalongier doit l’en entendre d’une partie, et c’est contenu en l’office au juige segont la partie que il a, segont ce doit il rendre. ¶ {1} L’en done certaine partie s’il i a juste cause. Et il i puet avoir droite cause se la loi falcidiene s’i acorde en testamant por aucion qui n’est pas certeine de lés ; et c’est à poine delivré par le juige. Et cil à qui l’en lesse a droite ignorance qui part il doit demander, et itel aucion li devra l’en ; et issi doit l’en entendre des autres choses.

Une feme dona sa teneure à son mari et le don li envoia par unes letres, et anprés la teneure ele prist de lui ; l’en disoit que il se devoit deffendre per aucion de chose, si comme cil qui l’avoit eue par la fame ; et que tot ce qui estoit au champ devoit estre sien au tens que les letres furent envoees, et ce soffisoit à baller la possession, tot n’eust ele la teneure aloee.

Se tu as tolluz les fruiz de la chose que tu tenoes, qui estoient à autrui, il ne te convient rien doner en non des fruiz de cele teneure. Ainz demande l’en, se cil fruiz est por ce fez, por ce que il les a prisés en son non. ¶ Nos devon entendre «  prise de fruiz  » s’il ne sont pas pris parfetemant mes conmoinciez à prandre, que li fruit ne sont plus en la terre, ausi comme s’il i a olives [49rA] ou grapes sont en la vigne ou en la terre et il n’i a point d’oile ne de vin tret ne fet ; s’il a ce, l’en atant que il a les fruiz.

Se tu me demandes un home et il est morz enprés ce que li plez est entamnz, il convient prisier les fruiz tant comme celui virra. ¶ Paulus dit : je cuit que c’est voir se cil hom ne chet en tel feblece par quoi ces ovres ne soent enpirees ; car s’il fust en cele feblece, il convenist que li fruiz fuissant prisiez en non de celui tens.

Nos ne somes pas forciez de user d’aucion en chose demander, car chascun puet dire que il ne tient pas ; issi que se li averseres puet l’autre contraindre que il tiegne, il avra la possession, ja sé ce que il ne prove pas que la chose soit soe.