XI. Quex genz devent respondre, quex non.

§ 1.

Enfes qui est en bail, qui a meins de quinze anz, ne doit respondre d'éritage, ne de meubles, devant que il ait quinze anz passez, ne ne puet fere serement ; mes à quinze anz, il doit respondre par le conseil de sa garde, et par le conseillier li juige, qui doit garder les orfelins. Mès il ne se combat pas devant qu'il ait vingt anz passez. De lédissement, s'il le fet, doit-il respondre ? Et l'en dit que oïl, segont ce que la jostice verra, et la jostice li doit aidier.

Serf ne doit pas respondre, ne l'en ne (li) doit pas respondre sanz l'autorité au seignor.

Desvez ne respont pas, ne l'en ne li doit respondre ; mès l'en doit respondre à sa garde : car il n'est pas mestiers que ses drois périsse.

L'en ne respont pas à feme qui a son seignor, se n'est par le commendement son seignor, ou ses sires ne li en done poer de fere aucune marcheandise. Et se ele fet lédissement à aucun, respondra-ele ? Oïl, de toz les lédissemanz qu'ele fet en cors. Et se ses sires est outre mer ou hors dou païs en lontaing leu, respondra-ele ? Oïl, de lédissement [p. 132] et de la chose de quoi sis sires li a doné poer ; et de héritages et de autre chose, non.

L'en respont à muet et muet respont par signe : car tot ne puisse-il parler, se consant-il bien par signe en ce que l'en dit por lui. L'en doit respondre à sort, et il doit respondre ; et à orb.

L'en ne doit pas respondre à aucun por communeté, s'il ne monstre privilége qu'il ait tel poir ; ne à chapitre, ne à religios, ne à évesque, ne à baron, ne à grant home qui a grant aministracion. Simple chevaliers, ne simple clers, ne borjois, ne maine persone, ne puet metre procurator por soi, se il ne sont empeschié de maledie reséente, et lors l'en doit respondre à son procurator.

L'en ne doit mie respondre à fame por mari, ne à mari por fame, ne au fiz por père, ne au père por filz, s'il n'est en son poir.

L'en doit respondre à toz procurators de roi et de chapitre et d'université.