II. De testamant qui ne vaut rien [rubr.]

L’en pledoie en ceste meniere de testamant qui rien ne vaut ausi com se cil fussent forsené cil qui firent le testamant. Et l’an dit ce non pas por ce que cil fust tex qui fist le testamant, mes por ce dit l’en que tex testamant ne valut rien por ce que il fu fet sanz pitié ; car s’il fu por voir desvez ou forsenez, li testamant ne valut rien.

Testamant qui n’a mester vaut autretant à dire comme se aucun des hers diseent qu’i ne porent estre par ce testamant obliez ne desheritez ; car aucunne foiz aviant que peres, par fauseté d’aucun qui les aguillone à ce, deseritent1 lor enfanz ou oblient en lor testemant.

L’a‹n› ne doit pas ostroier à peres que il facent injure à lor enfanz en lor testamanz, car il le font aucunne foiz par malice que il vont contre lor sanc ou par ataine ou par aticement de leur marratres.

Car cil qui pledoient dou testemant lor mere, que il dessandent2 lor fames, solent aucunne foiz gaigner. ¶ La force de ceste parole de testamant qui n’a mester est tele, comme j’é dit dessus, que l’an doit enseigner celui qui a tel testemant fet que, s’il trespasse ou oblie son heir ou desherite, que il soit mostrez au [43rA] juge, que l’an puisse dire que cil fust de noz qui tel testamant fist.

Veon comment l’en doit apareillier plet et envoier3 à l’oir. Et poson que aucun fust an son poer, il n’a mestier de sesine ne de demander le heritage ; et se cestui est somons et il vet avant en la cause dusqu’à demander ou dusque à denoncier que la chose est soe ou s’il balle sa demande, il anvoera à son heir la demande, et issi l’escrit l’enpereor. Et que dira l’en s’il n’est en poer ? L’an demande se cause passe à son heir. Il est bien de droit et aparissent que il a le plet aparellé s’il fet ce que nos avons dit desus.

Se une partie de cex qui juigent de mauvés testamenz donent sentence contre le testamant, si comme l’en fet aucunne foiz, miauz sera de tenir la sentence de cele partie qui est donee selon le testamant, s’il n’aperet apertement que le juige ait doné desloiaument sentence secont l’escrit heir. ¶ {1} Et c’est trop seu que celi qui a pris les lés ne se doit plaindre dou testemant se un autre n’a par avainture pris tot l’afere.

Et s’il ne gaagne en cele querele, je ne cuit pas que ce que il dona an sa vie doie estre rapelé ne ce que il avoit avant doné en doaire.

Se l’an establist heir par tel condiction «  s’il franchist Tebert  » et il franchist, et enprés ce que il franchi dit l’en que li testamanz est mauvés, l’an doit à cetui secorre que il et son loer de celui que il a franchi, que il ne perde son serf por noient.

Se l’en fet pez de plet qui estoit meü de testamant mauvés, et li hers n’otroie pas ceste pez par foi, acordé est que li plez core. ¶ {1} Cause de mauvés testamant remaint à celui qui dit que il est fiz au mort qui nia ce an testamant et le deserita.

Quant la mere oï dire fausement que sis fiz chevalers estoit morz et ot fet autres hers an son testamant, li enpereor dit que li eritages aparte[43rB]noit au fiz si que les franchises soient rendues. Et l’an doit noter ce que l’an dit ci de franchises et de lés, car quant l’en apele testamant mauvés et c’est voir, rien qui soit an celui testamant ne vaut rien.

Se ‹il› i ai aucun conchiement antre les gagiers, et la volenté au mort at sene, il puent apeler se mestier est se l’an done sentence contre le testamant. ¶ {1} Li fiz baptizez puent avoir aucion contre le testamant lor mere mauvés; {2} ja sé ce que li contanz dou testamant mauvés soit osté par pez, li testamanz remoint an son droit, et por ce les franchises et les lés ont lor poer, tant comme la loi falcidie ne l’ostroie. {3} Fame ne puet avoir fiz sanz la volenté au prince, ne ne puet pledoier de mauvés testamant à cele qui cudoit fausement estre sa mere. ¶ Il convient pledoier en cele province de mauvés testamant où li ers escrit ont meson.

Li peres naturel puet pledoier contre le testamant son fiz qui est avoé si li testamant est mauvés. Li enpereor escritent que li tutor puent pledier de mauvés ou de faus testamant an non de l’orfelin sanz le peril de ce que lor est doné an testamant.

Se cil qui est desheritez ostroie que cil qui demande le lés dou testamant le demant ou s’il prent procuracion, il ne doit pas estre oïz quar il senble que il ert veü le testamant et loé tel jugement.