III. De demande d’eritage [rubr.]

Heritage nos apartient ou par viel droit ou par noveau, ou par loi de .xii. tables, ou par testamant qui est fez à droit.

Tot seen nos fez hers an son non ou par soi ou par autre.

Ausi comme nos commandon à cele persone qui est en nostre poer de demander l’eritage. Et se nos somes hers dan Tebertt qui fut heir dan Gaubert, nos poons dire que le heritages est nostres, ausi [43vA] comme dan Tibert et ausi comme dan Gaubert, ou nos somes hers au mort sanz testamant, ou cosin, ou nos franchimes celui qui est mort, ou nostre pere le franchi. ¶ Cil sont tuit her par noveau droit qui sont apelé à heritage par senator ou par constitucion.

Se je demande heritage à celui qui tint une chose dont estoit li contenz, il me rendra ce que il a puis commencé à tenir.

Se l’en dit que li testemanz soit faus et l’en demande lé de celui: ou l’an le doit rendre, que l’en dont avant caucion, ou l’en2 doit demander se l’an le doit. Et se l’an dit que li testamanz est faus, l’en ne doit pas doner à celi qui acuse le lés, tot soit le plez est entamnez.

L’en ne deffent pas à cestui à chalonger lé an heritage qui sequi la volenté au mort por ce que il ne savoit pas meniere dou testamant.

L’e‹n› doit dire de usage que cil est tenuz de demande de heritage qui tient la droiture à l’oir, ou à celui qui doit estre sesi, ou la chose de l’eritage.

Tot soit ele petite. {1} Et se aucun est heir d’un as ou de partie, il entent que tot li heritages soit sien ou por une partie ; et cele li avient por l’ofice au juge ce que li averseres tient, ou tot s’il est heir d’un as, ou por la partie que il tient.

Cil tient por heir quil cuide qu’i soit heir. Et l’en demande se cil tient por heir qui set qui n’est pas heir, et Adrianus cuide que il est tenu, et nos le tenon issi ; et cil qui tient les biens est veü tenir por l’eir ; et le toleor est tenuz por le porseor.

Cil qui l’en demande por quoi il porsiet, s’il respont por ce que il tient, il n’atrive pas que il soit her ne mes que por ce que il tient.

Et ne puet [43vB] chaloir s’il est detor ou por forfet ou por marchié. Cil est entendu detor heritier cil qui promist aucunne chose au serf heritier, ou qui fist domage avant que l’en demandast l’eritage.

Ou s’il toli aucunne chose heritel.

{?} Se aucun demande heritage que aucun tient par garde d’aucun qui est ostremer, et il an demande por la reson de mort et il ne veaut prover la mort fors que par tens trespassé, l’en doit regarder conbien de tens il a que il mut et conbien il a que l’en n’en n’oï novele et comment il est anquis. Et doit regarder que li droiz aages d’ome est de .c. anz, et quant il mut quel aage il avoit, et l’estat de la persone. Et se li juiges voit que bien soit et .c. anz soent passee que l’an n’oï noveles de lui, li juges doit baller la sesine à l’eriter por la chose garder, adonant qu’à li mo‹i›n‹t› que se cil viaut dehors de païs qui li fruiz et li heritages li sera ballié sauf et delivré ; et la cuaucion dure jusqu’à l’aage de .c. anz et sera renovelee par mort ou par apeticement.

C’est perdu qui n’est pas trové ; c’est apeticé que l’en a par usage, et por ce ist ce de l’eritage.

{19} Cest atablissement que le senator a fet à demande d’eritage a leu an jugement des choses que l’en viaut partir, ausi comme l’en demande les fruiz quant l’an l’a demandé l’eritage. Ausint au partir que ce ne soit trufle à dire que ce que l’an demande que l’an ne pué partir. {20} Feons et de bestes et de bos et de vaches croissent l’eritage.

Et s’il nest3 oelles et de celes nessent autres, cestes doivent estre randues, ausi comme crois.

Et li enfanz aboesses et li enfanz qui en nessent, ja soit ce que l’en ne cuide pas que ce soent fruiz, car ce n’est mie folie de chastoer l'aboesses por avoir enfanz, il croissent l’eritage ; et tot est d’eritage, et n’est [44rA] pas dote que cil qui les tient anprés ce que l’an li a demandé l’eritage ou que il a lessié à tenir par tricherie, il doit tot randre. ¶ {1} Et ce que l’en a eu de loage des teneures et ce que l’en a eu de bordeau doit estre randu, car l’an a bordel aucunne foiz an teneures à prodomes.

L’en doit, enprés l’atablissemant au senator, l’en doit tolir tot le gaaing à celui qui tint en bone foi com à celi qui toli la chose à force.

Li leer que li gagneor ont eu sont en leu de fruiz et ausi les ovres que li serf font et voitures de nés et de jumenz.

Choses que serf aquierent doivent estre randues as hers qui vienent en l’eritage quant l’en pledoie de mauvés testamant, car la chose apartient à l’oir.

S’il ne fet promesse de la chose à l’oir escrit, {1} Julien dit : se cil qui tient le eritage vent les homes qui n’avoient mester à l’eritage, il an doit rendre l’argent ; l’en le blasmeroit s’i n’ostreit ce qui ne vaut riens à l’eritage ; il le doit rendre s’il vit, et s’il muert il ne rendra pas le pris ; ne li juiges ne doit pas sofrir que cil qui tient la chose est le pris de la vente, et c’est voir.

Je cuit que nos poons demander l’eritage au fiz au pere qui est chevaler, s’il nos aviant. ¶ {1} Se serf ou fiz qui est encore ou poer au pere tient l’eritage, l’en puet demander l’eritage au pere ou au segnor, s’il a poer de rendre les choses ; et fiz a le pris des choses de l’eritage vendue au chatel son serf.

Julien cuide que l’en puet demander l’eritage au seignor ausi comme à celui qui la chose tient à droit.

Despanses profitables et necessaires sont que l’an fet por refere les mesons ou por noveaus gaignages, ou quant l’en rent ce que l’en a despandu, au plet com il soent fetes à preu ; et autres despenses i a assez. {1} Or veon se barre de tricherie nos vaut rien se nos despandun an fere pointures [44rB] et en fere beles quareleures et autre choses por nostre delit. L’en dit que oïl se nos tenon la chose an bone foi, car à celi qui tient à force dit l’en que il ne dut pas fere despans de trufles an autrui choses que il eust poer d’oster cex que l’en puet oster sanz apeticement de la chose.

Cil est entendu en leu de dolor qui fet tant par sa desloiauté que cil veust l’eritage qui avoir le covetoit.

Lucius acusoit un autre de faus testamant et perdi la querele. Je demant s’il pué avoir aucion de testamant qui fu fete à tort ne n’é pas seelé. Je di que il doit estre oïz, tout est il perdu an l’acusement dou faus testamant.

En le fine de l’eritage vient le pris de l’eritage vendu, ausi que ce moismes i viaut qui plus fust vendu de l’eritage, se l’en le vandi par acheson de marcheandie ; et s’il est vendu par cause de lés, il n’i vient riens plus, fors ce que il prist en bone foi.

Se cil qui tient ot mauvés conquez de l’eritage, il est tenuz de rendre les, que cil qui tient n’est gaing par tel conqueste.

Quant li eritages est demandez, cil qui le tient est tenuz dou rendre toz les fruiz que il en a euz, tos n’el deust avoir cil qui demande l’eritage.