XIV. Quant le jor d'usaige cesse.
§ 1.
Jà sé (soit) ce que usages de fruiz soit establiz por user, par aucun servise que celi fet qui en use, tote voies avient le jor une foiz ; ausint comme se l'en lesse une chose à aucun, ou par mois, ou par jorz, ou par anz, li jorz de lès avient, dom il avient que l'en le puet demender. Et se usages est lessiez à chascun jor, l'en demende s'il doit ? Et je ne cuit pas qu'il doie avenir une foiz, mès par le tens qui est establiz, s'il i a plusheirs lès en celi à qui usages est lesiez à un jor et puis à autre. Et por ce, se usages est lessiez que ne puet pas estre pris chascun jor, li lès sera bons, et cil aront le lès qui porront user. Mès li usages ne puet avenir, dusques li héritages soit demendez. Lors est establiz usages, quant aucuns en puet user ; par ceste reson, se usage est lessiez à serf héritier, Adan dit que jà sé ce que ces autres lès soent [p. 134] coneuz à l'éritage, l'en i doit entendre la persone au seignor, que l'en ait l'usage et le fruit. Et dit l'en que cil qui demende avant le jor de l'usage, que li fet mal1.
§ 2.
Commun de pais se plaint de Gaubert qui a clos son pré à fossez, com li usages dou païs soit tex que les bêtes dou païs doivent aler partot, en tens qui n'est deffensables. A ce respont Gaubert que la chose est soe, et li communs riens n'i tient de lui. Les choses devant queneues, dit droiz que il puet clore son pré ; et quant bestes corront communémant par toz les prez, voie sera fete à corre ou pré clos ; et quant deffense vandra, cil cui est li prez porra atoper la voie dusque deffense soit passée.
