École des chartes » ELEC » LI QUARZ LIVRES » IX. D'usaige.
[p. 129]

IX. D'usaige.

§ 1.

Usages si a (est) un servise que aucun a sor aucune teneure. Usages a droit d'user d'autrui choses, sauve la seignorie des choses. Usages est en aucun cors, et quant il faut, li autres faut1.

Usages doit estre establiz en totes teneures por droit de lès, et par testament, et par don antre la vis, et puet estre achetez.

Usages au commencement puet estre establiz o devise o sanz devise, à tans ou à toz jors.

Hobligemant d'usage doit tost estre départiz au parties de l'éritage.

Se aucuns fet édefice en la terre où il a son usage, il ne l'en puet oster.

Se aucuns lesse issint toz les fruiz de la teneure, ceste parole est entandue ausint comme se li usages fust lessiez2.

Usagier n'use mie, s'il n'use ou un autre por lui, si comme cil qui achate ou qui aloe ou à qui l'en le done, ou cil qui fist son afere ; et ce iest que se je van usage, tot ne usse li acheterres, aparaissent est que je tieng l'usage ; et se je le done, je ne retieng pas la chose se cil n'en use3.

Li usagiers ne puet fere noveau édefice sus les paroiz de la meson ; et s'il est commoinciez, il ne le puet achever, tot ne s'en puisse cil soffrir. Ne li usages n'en est pas sien s'il ne li est lessié espéciaument ou establi que l'en puiche fere.

[p. 130] Aucion de loi Aquiline n'avient pas solement à l'usagier, mès aucion de serf corrumpu et de injures ; et se l'en ampire le serf, il le puet demender.

Celui à qui usages est lessiez, le puet vendre et à estrainge, maugré à l'oir, par droit et non par costume4.

Se usages d'ere m'est lesiez, je puis fere une borde por ardoir à la chose qui est.

Se usages est lessiez à Tibert ton serf, et à Gaubert mon serf, autex est li lés comme s'il fust lessiez à toi et à moi, et por ce n'est pas dote qu'il ne soit nostres ynéement5.


1 Dig., lib. 7, tit. 1, frag. 1, 2 : de Usufructu et quemadmodum quis utatur fruatur.
2 Dig., lib. 7, tit. 1, frag. 3, 5, 15, pr. ; frag. 20.
3 Ibid., frag. 38, 40.
4 Dig., lib. 7, tit. 1, frag. 61, 66, 67.
5 Ibid., frag. 73, 74.