École des chartes » ELEC » LI QUARZ LIVRES » XIX. De servises de ville.
[p. 141]

XIX. De servises de ville1.

§ 1.

Servise de teneures de vile sont itex : aler, mener charroi, voie, conduit d'eue. Il i a droiture d'aler et de venir à genz, et de mener sagement, et de mener sa charrete ; et qui a son aler, n'i a pas à mener ce qu'il veaut ; et qui puet mener ce qu'il veaut, il i pot aler et en puet user sanz véement. Voie est droiture d'aler et de venir, et contient en fiez (soi) aler et mener sa chose. Mènement de eue est droiture de mener eue par autrui chose.

L'en doit conter à droiture d'une teneure, puiser et abruver ses bêtes, et droiture de pestre là, si et de fere i la chous, et de sablon foïr. Et il le convient tot ce soffrir, et l'ofice au juige le commande issint2.

Les servises des teneures de vile sunt que l'en puet plus haut lever sa meson en son siége, ou sa couverture ; et conduit d'eue, ou puiser la par un meismes leu puet l'en, ou plusors, que l'en les i puisse mener an un meismes jor.

Et servise puet issint estre mis que li buef qui gaaigent les teneures pessent ou champ au veisin, et issit le dit l'en.

L'en dit que li fruiz doit estre asemblez en la moison son voisin, et que l'en pregne cherniers ou bois son voisin, et espoes ses vignes. Qui a droit de puisier, aparissant est qu'il i a sa voie à puisier ; et ausint dou commun droit. Et qui ne i a puisier, n'i est (ait) pas l'alier, et qui n'i a l'alier, n'i a pas le puissier3.

Servise de pestre bêtes et de mener les à l'eue, apartient plus à la servitute de la teneure que à la persone au seignor, se la servitut n'est donée plus por la persone que por la teneure4.

Qui a son erre, a son mènement solement, et puet mener char et jumanz, ne il ne puet ne l'un ne l'autre trere per erre, ne l'an n'i puet aler parmi : car s'il fesoit ce, il ne lo feroit pas par grâce d'aler parmi, et por ce meismes porroit le fruit ampirier. Et cil qui ont voie i ont [p. 142] droit d'aler et de venir parmi, et de mener lor choses, et d'aler lance levée, por qu'il n'ampire les fruiz5.

Lesse de charrière donée tient an atandu onze piez ; et de chemin fere, vingt-deus piez, et de santer, quatre piez. L'en puet establir servise, si comme eue corre et mener sagement, s'il i eust servitute à quérir eue à édefice qui n'est pas fet. J'é droit d'aler et de charrete mener par teneure qui est à plusors, et par le reson de toi puet-il estre desevréemant lessé6.

Antre aler et mener sa chose a aucune différence : aler est là où aucun ne puet aler à pié, c'est mainement ; et là ou aucun puet mener sa charrete, c'est meners et alers.

Champ ou vigne qui est enserrée en autres, doit avoir sa voe au plus près dou chemin, sanz le domage à voisin. S'il est contenz de voie, li arbitres le doit establir ; et s'ele est nomez sanz dire la lesse, ausint va par ma terre, la voie i est par tot au moins domage que l'en porra7.

Emprès l'en dit que n'est pas reson que l'en aille en ma terre contre ma volenté, ne sor mon deffens.

Servitute est perduz par x8 anz d'espace, se l'en n'en use an nule chose ; autrement, non.

Se je puis mener hiau par atrée, tu n'i puez édifier sanz ma volenté.

Servise ne puet estre naturelmant, quant il ne viant de nature.

Une fontene nest en mon champ ; je la met par mon champ et li done à boivre. Mi voisin desoz en grondent. Et l'en dit que je le puis fere : quar maus seroet se li chans où la fontoine croît muert de soi (soif), et li autre eusent à boivre9.

Je ne puis acompoigner autre en servise que j'é an la teneure.

Se ge te vant certaine partie de ma teneure ou li droiz de iau at (est), li don doit estre ausint en la vente : quar je ne puis pas vendre ce qui est autrui que autrui n'i et (ait) son usage10.

[p. 143] L'en ne puet usager oster, tot li face l'en autant de bonté  : quar se chose puet valoir miauz ; quar il est sires de l'usage, tout li donge l'en la value de l'usage.

Uns de deus compainz communs de champ, se il sofre à aucun qu'il aille et viegne parmi, il ne fet riens ; et por ce, se dui chams qui servent l'un et l'autre sont à communauté entre aus, por ce que acordable chose est que servise est tenuz en partie, li uns ne puet lessier à l'autre. Tot soit ou da conpenon (un des compagnons) sol à qui li servises est donez, por ce qui n'est pas deu à la persone qui a la teneure, ne franchise par un d'aus, ne servise n'i porra estre lessiez11.

Se fontaine sèche don li ruissiaus vient, et cil ruissiaus retornent après à sa fontaine, l'an demende se cil doiz estre perduz ? Et l'en respont que li rois avoit mandé itex paroles : Cil qui solent amener le ruisiau de la teneure de Flori, l'an dit qu'il ont oi (eu) aucun tens usage de la fontaine, et qu'il ne le puet ore avoir, par là qui la fontoine est séchie, et anprès sera comoincée à avoir son cors ; l'en requiéra droit contre qui n'ont pas perdu par lor négligence, ne par lor cope, lor soit randu. Et je cuit, por ce que lor requeste est droite, que l'en la secorre en ceste partie : ainsint que li droiz, que il lor eit avant, quant la fontene ne puet tenir à aus, si voil qui lor soit randuz12.

Se cil qui est sires de deus teneures, en baille une, par tel convant que cil qui ele est, la serve à celui qui la tient, ou li autres à celui qui est baillié, li servises est mis à droit. Se je sui heir à celi, laquel teneure me servoit, et je te vant l'éritage, le servise doit estre atabliz à l'aucion qui est : car cest fet que tu es hers est veue chose. Qui ostroie à aler ou à mener par certains leu, l'an le puet ostroier par celui leu à pluisors. Ausit comme se aucuns fit sa mesons serves à son voisin, por ce ne remoint pas qui ne puisse fere serves à qui il vodra13.


1 Dans le manuscrit, ce titre est réuni au précédent, et la rubrique transportée au titre suivant.
2 Dig., lib. 8, tit. 3, frag. 1 : de Servitutibus prœdiorum rusticorum.
3 Ibid., frag. 2, 3.
4 Ibid., frag. 4.
5 Dig., lib. 8, tit. 3, frag. 7.
6 Ibid., frag. 8, 10.
7 Ibid., frag. 12-13
8 Le chiffre est douteux dans le manuscrit.
9 Dig., frag. 16, 18, 20.
10 Ibid., frag. 24. 25.
11 Dig., lib. 8, tit. 3, frag. 34, pr.
12 Ibid., frag. 34, § 1 ; frag. 35.
13 Dig., tit. 4, frag 3, 9, 15 : Communia prœdiorum tam urbanorum quam rusticorum.