XV. De us sési ou perdu.

§ 1.

Certaine chose est que l'en ne pert pas usage par muement d'estat, solemant en pert l'en la demende. Et poi i a de regart se li usages est establiz en choses ou par la garde au prévost ; et issi qui vent ausi comme baillié ; et unsaages (usages) establi en teneure qui doit paage, est perdu par apeticement d'atat. Et issint est perdu se l'en i a (est) establi ; et se aucuns mue son estat avant qu'il ait demendé le éritage, ou avant que li jorz soit venuz, voirs est qu'il ne le pert pas1.

Acordé est que usages faut par une meson dechastée, ausint comme se usages de meson i m'est lessié, et ele déchiet ou art ; sanz dote lors et certaine chose est, se la meson ardet, l'en ne doit pas loage ne de l'aire ne des pareiz.

Se usages d'eue (d'ere) est lessiez, et atant, certaine chose est que la chose est muée. Et se li sires fet ce par tricherie, il i sera tenuz2.

Ne aler ne venir par une terre n'et perdu par muement de seignorie. Acordé est que usages de certaine partie ou qui n'est pas certaine, est perdu, quant l'en n'use.

La char et le cuir de la beste morte n'est pas conté au fruit ; li us faut menois que la beste est morte.

[p. 135] Se usages de deniers sont lessiez, l'en doit doner caucion et de mobles ausint3.

Usages ne (nu)) est establiz sanz fruiz, et est establiz en autre menière ou home, comme usage et fruiz est establiz.

Cil à qui usages est lessiez puet user ; mès il n'a point de fruit.

Il convient voer de chescun usage de meson : se ele est lessié au mari ou à la feme ; se ele est lessié au mari, il puet abiter solement et lui et sa mesnie et si serjanz, et il puet recevoir genz et habergier ; et sa fame puet recevoir ce que sis sires puet recevoir, ne il ne Ii loit pas à recevoir ôtes à qui il ne li loit pas à abiter honestemant4.

Se usage de teneure est lessiée, ce est men que de fruiz, et nus n'an dote ; et l'en doit voer qu'il a en celi plet, et l'en dit qu'il puet estre an la teneure, et en puet user trampéement, sanz déreson ; mès il ne puet vendre, ne doner, ne engagier, ne prêter son usage ; mès il le puet quiter au seignor.

Il doit avoir son plain usage, tot soit-il lessié à sa vie. Li sires doit venir à prandre les fruiz, et il doit demorer tant qu'il soit coilli. Et estre (outre) son mesage, il aura poer de esbargier iqui aucunes genz, et de qui puet avoir son usage iqui de chascun jor au cortiz, an pomes, an chos et en estrain, et autres menues choses, si qu'il n'en face desloi ; ne il ne usera pas ne au pur fust, n'à choses qui sont laborées por vendre, ne des fromenz ; et doit avoir son usages à choses qu'il set de la teneure, de ce qui apartient à son vivre, et lui et li sien. L'en doit avant une chose fere à l'usagier plus largemant comme por la désireté à celi à qui li usages est lessiez ; et puet porter l'usage an sa meson5.

Et se usages de bestes est lessiez, ausi comme de berbis ou de mostons, il aura les fiens por fumer le champ ; mès il n'aura pas l'usage de la laine, ne des aigneaus, ne do let ; car je cuit que ce est en fruit ; mès il doit avoir un poi dou let, car li don ne doivent pas estre si estréciez.

Se usages et (ès) bos est lessiez, il aura tot l'usage, à arer et à fere totes choses que bos devent fere.

[p. 136] Se usages de haraz est lessiez, l'en doit veer s'il le puet et doit danter (dompter) et metre le à fere bone. Et se cil est charetiers à qui l'usage de haraz est lessiez, je ne cuit pas qu'il en puisse user : car il est aparissant qu'il a loé. Mès se cil qui fist le testament set qu'il soit de tele vie, et tex menestères, il apert que il fist le testament qu'il pensa de tel usage6.

Se usage de meson est lessiez sanz fruiz, li refez de la meson est commune.

An meson amender ausint a l'er com l'usagier. Or veons se li ers prant solemant le fruit, si la doit refere ? Se la chose est tele, don li usages est lessiez, que li heirs n'en puisse pas avoir les fruiz, cil à qui li lès est, doit refere la meson.

Cil qui a la propriété de la chose ne puet muer la chose don l'an use, an autre forme, que il ne puet empirer la cause à l'usajuer ; il l'ampire quant il la mest en autre estat que ele n'estoit7.