IV. De péticions déritage1.
§ 1.
L'en puet demander héritage par reson d'eschoete, par achat, et par don, par engagement, par prest, par testament qui est fez d'aucun qui morz est ; et en totes ces choses puet avoir gage de batalle, se li héritages vaut plus de cinq sols.
Ci parlerons premièremant de chartres (d'eschoete).
Uns hons dit issit : P. tient une meson qui fut mon père, don mis pères mori seisiz et vestuz, n'a pas un an ; don li héritages doit estre [p. 126] miens : car s'il est nié ne mesqueneu qu'il ne soit issint com je di, je sui prez de monstrer et de avérer par moi et par garanz qui set ce de voir et de savoir. Il tret son garant qui l'offre à prover et avérer si comme il devra ; et li autre fet encontre tel ni et tel deffense comme il doit. L'en demende qu'an dit droit. Et l'en dit que cil à qui l'en demende est loisanz de prendre la prove de lui et de son garant, et de quenoître que c'est voirs ou d'escondire par la soe : car en héritage n'a point de batalle, mès prove de tesmoing.
Or parlons d'achat. P. dit que G. li a vendue une soe meson, par convenances acordées entre aux por vingt livres ; il est prez de paier et demende l'éritage : car s'il est nié ne mesqueneu que il tel convenance ne li eust, que il l'éritage auroit por vingt livres, il est prez de monstrer et de l'avérer par soi et par garanz. G. le nie et offre à fere contre lui et contre son garant tel ni et tel deffense comme il doit. Et nos dison que cil est loisanz de prendre la prueve de lui et de son garant, et dire que c'est voirs ou d'escondire par la soie : car en tel chose n'a point de gage, car il n'i a point de chatel por quoi il i ait gage de batalle. Mès il eust dit que il eust les deners paez, il i eust gage, porce que li chatex i fust. Tot ausi est-il de don comme d'achat, sans les deners avoir paiez.
L'en puet ausint apeler d'angagement, comme l'en puet de chatel, quant li denier sunt paié ou quant li denier ne sont pas paié. L'en puet ausint en tel meisme menière apeler de prest comme d'achat qui est fez sanz deners paier.
Emprès diron de testamenz. Testamanz si est provez par le provoire et par les preudes homes qui sont au testament fere : et par ce est estainz testamenz ; car il ne convient mie que en choses esperitex ait batalle.
