École des chartes » ELEC » LI QUARZ LIVRES » XVIII. De servises de citez.
[p. 138]

XVIII. De servises de citez.

§ 1.

Li droiz des teneures de citez est tel : d'élever sa meson plus haut, et de peticier la voiue (vue) son voisin ou non, ou de metre gotère en la meson son vesin ou non, ou de metre chevrons ou non an la mesière, ou de oster ou de recovrir, et de fere itex choses assez. Et cest servise est que l'en ne renuise la vée : là où servise de veue est establie, c'est establi que li voisin ne nos tole nostre veue ; et quant cil servises est mis en autre meson, que l'en ne nuise à la veue, nos avon ce que nostre voisins ne puitche, contre nostre volenté, sa meson plus haute lever, et qu'il ne puisse par ce apeticier la clarté de noz mesons1.

Nos devon entendre au servise celui à qui l'en fet contre sa volenté, non pas solemant celui qui contredit ; mès celi qui ne s'i consant ; et por ce dit l'en que li enfant et li desvé sont ausint ; et ces paroles ne sunt pas raportées an fet qui à droit.

La chose qui sont par natureles communes, li uns ou li autres des [p. 139] voisins ne a poer de la dépecier, ne de refere la : car li uns ne li autres n'en est sires. Mès se li juiges voit qu'il i ait reson en amender les, bien le puet commender par droit2.

L'en n'a nulle aucion contre celi qui tost la clarté de mesons son vesin, an fesant la soe plus haut, quant servise n'i est deuz. J'é (j'ai) deus mesons, je t'an lesse les unes, tu lièves l'autre : l'an demende se le puet fere, quant il tost la clarté à l'autre ? Et l'en dit que non, por quoi la clarté vienge de costé, qui post (vost) nuire à la clarté des mesons son et vesin. Por fere un édefice, il doit savoir qu'il doit garder et la forme l'estat des ancienes mesons. Se tu et tis voisins ne poez acorder an fere voz mesons, li juiges vos donra arbitres. Une chose et autre est gardée, que l'an ne nuise à clartez des mesons, et que l'uns n'et plus voie que l'autres ; et qui tole la clarté son voisin et quanquez a fet an nuissement de tolir la clarté, pot estre deffandu3.

Se l'an doit servise, l'en puet deffendre à cetui qui tost la clarté, qu'il face si son afere qu'il ne tole à l'autre la clarté, si qu'il voie sa lumère, c'est le ciel. Et il a defference entre veue et lumère : car veue est d'en bas et lumère d'an haut. Et se aucuns plante d'en bas por tolir la lumère, l'en dit qu'il fet tort : quar li umbres nuist que l'en ne puet voir le ciel ; me (mès) si tost le soloil sanz plus, et l'en voie le ciel, il ne tost mie la clarté4.

Usères d'esgoz est nécesseires, là où il est sanz meffet ; il ne porte pas tenue s'il n'est apertement seuz.

Se li conduiz par qui il viegne eue à ma meson, me sont estopé, g'é aucion contre toi de fet et de domage que tu m'as fet.

Gefroi de la Chapele dit que l'en ne puet avoir conduit joint à la meson commune qui reçoit l'aau, ou de ciel, ou de marois ; et l'en ne puet deffendre son voisin qu'il i ait son agot gote (joste) la paroi commune ; mès s'il voloit mener l'eau par conduit, et ele néust à la paroi, l'en la porroit deffendre5.

Se j'é mon chevron en ta paroi, et je jeuse, par ce doit l'en avoir commune au tré, ou se mon fust est en ta mesière. An quequez manière [ 140] que agos soit conquis, l'en le puet haucier, et de ce amende li agoz ; et quant il sera plus haut, il cherra plus légièrement et plus droit. Nos poon fere l'agot plus légier péant ; non ausint est de fluve qui chiet par agot6.

Nus de deus seignors, en chose de servise commune, ne puet rien fere contre la volenté à l'autre, ne deffandre que la chose ne soit à l'un ne à l'autre ; et por les granz contenz, fet l'en aucune foiz la chose partir ; et par aucion de ce aconsit aucune foiz le compaignon que l'ovre ne se face, ou que l'en oste l'ovre qui est fete, s'il est pro à la compaignie7.

Se ge et tu avons mesons communes, et aucune chose de ces mesons est mise à tort en ma meson, j'é contre toi aucion, et ausi sera se tu mez à tort aucune chose en ma meson.

Se tu veaus édefier en ere commune, li compainz le te pot deffendre, tot t'ait ton voisin doné congié de édefier ; mès tu n'as poer de édefier contre la volenté ton compaignon à chose commune. Qui a usé d'agot mestre, doit estre naturés et perdurable8.

Se aucuns a meson, por achat, qui servoit à soes mesons, li servises est mellez et ostez ; et s'il le veaut vendre de chief, li servise il doit estre mis noméement.

Se je aquier une partie de la teneure qui me servoit ou à qui je serf, li servises n'est pas meslez : car il est retenuz an partie. Et issint se mes teneures servent à tes teneures, et tu me balles une partie des tenues, et ge ausint des mois, li servises remaint. Et usages qui est aquis ou tenu, ou de çà ou de là, n'antre-ront (n'interrompt) pas l'usage. Nus ne pot emporter servise en propres édefices, fors cex qui sont ; et se aucuns à qui li édefice son sien a neveu, que l'un ne puisse nuire à l'autre, li doivent remenoir à l'ancien achat9.


1 Ibid., frag. 2-4.
2 Dig., lib. 8, tit. 2, frag. 5, 8.
3 Ibid., frag. 9, 10, 11, 15.
4 Dig., frag. 15, 16.
5 Ibid., frag. 17, § 3, frag. 18, 19.
6 Dig., lib. 8, tit. 2, frag. 20, pr. ; § 5.
7 Ibid., frag. 26.
8 Dig., frag. 27, 28, in fine.
9 Ibid., frag. 30-39.