VI. De retret de chalonge.

§ 1.

Qui demende héritage un home dit issi : Tybaut tient vignes, trois arpenz, qui sont en tel leu, et en tel censsive, qui moies sunt par la reson de mon père, qui cele chose estoit quant il ala de vie à mort ; et s'il veaut dire que ce ne soit voirs, je sui prez de monstrer par moi et par garanz, qui en jurront et feront loutie plus, si comme il devront. A ce respont Tibaut qu'il a en pluseurs leus vignes, et demende mostrée. L'en li done, et li met l'en jor. Enprès, le jor de la motrée, à la mostrée il ont esté. A l'autre jor, l'en li fïst ceste meisme demende. Et Tybaut nie que en cele chose n'a-il nul droit, ne que il ne tient nule rien del suen. Il offre à prover, et li autres à deffendre, si comme il doit. L'en demende qu'en dit droit. Et l'en respont que par tex moz n'est batalle, et qui vaincra, si enportera la querelle.

Se une feme a son héritage et a enfanz de son premier seignor, et li sires muert et a doné à un de ses enfanz son héritage la propriété, et s'en dessessist, li autre enfant poent demander en ce héritage lor léal partie.

Nier contre la demende que l'en fet si est plez entamez ; ne plez n'est entamez jusque l'en ait nié ou queneu : car barre metre ne replication ne fet pas plet entammer, et se reus ne demande mostrée et enteme le plet, et est condempnez, por ce n'est pas qu'il ne perde ce que sera trové par anqueste.

Entan : en queque menière aucun fera héritage por suen, et dira titre por quoi li héritages est suens. Et l'en deffende par tex paroles n'est pas batalle, et por ce est querele perdue ou gaagnié porquoi mostré ait esté fete de la chose : car avant motrée querele n'est pas perdue, se n'est par le grié as parties. Titre si at (est) tenir de senor.

En totes les choses qui ont cors que l'en demende en plet, se cil à qui l'en demende veaut montrée, il la doit avoir, se n'est de choses si comme de denier et d'autres choses qui sont desenavenciées par le vice de ceus qui ont tenu, si comme vin, uille, blé et itex choses semblables ; et robes et itex choses, se eles sont en estat, puet l'en demender montrée de fere les venir avant.

§ 2.

Une autre monstrée est qui est au seignor de la terre, por commun profist, que l'en apele motrée d'armes ; et tele motrée ne porte point d'amende, se ele n'est establie par le segnor de la terre et por le commun. Et se il establi que aucuns ait armeures, se il ne's a tant comme li establissemenz dure, il chiet en amende.