V. Se l’en demande une partie de l’eritage [rubr.]

Anprés l’an demande que li prevoz a mise avant de celui qui dit que li heritages li avient tot ; il convient aprés parler de celui qui n’en demande que une partie. ¶ {1} Cil qui demande [44vB] ne mesure pas son droit que autre a sesi mes il demande sa droiture, c’est à dire tot si li avient, et por ce demandera il tot s’il est heir establi d’un as, tot tienges tu une partie de la partie. {2} Et s’il i a .ii. qui dient que la partie lor avient, l’en ne doit pas demander à l’autre, il se doivent tenir apoé, comme li premer au premier, le segont au segont, et .ii. au premier, deus au segont ; car li uns ne tient pas la partie au premer ne la partie au segont, mes li dui tienent la partie à l’un et à l’autre. ¶ Et por ce, se li porseor et li demandeor tienent l’eritage, por ce que chascuns d’aus dit que une partie par la moité l’en avient, il doivent regarder antre aus que il soit partiz ; ou s’il n’i a sor ce contenz, il convendra que il i ait plet de partir. ¶ {3} Se je di que je soie heir d’une part et mis compainz tient l’eritage ou estrange, con cil n’en ait pas sa part, l’en demande se je doi demander le heritage à l’estrange solement ou à l’autre. Et l’en dit que Pagasus cuida que je le doie demander à l’atrange solement, et que cil me doit rendre quanque il en tint, et par aveinture l’en doit ce fere par l’ofice au juige ; mes droite reson fet et dit que je le doi demander a .ii. et cil face sa demande contre l’estrange teneor, mes la sentence Pegasus est meillor. ¶ {4} Et com je deisse que je fuisse heir de la moitié de l’eritage et je tenisse .iiii. unces de l’eritage, et enprés je voil demander .ii. unces, veons comment je doi demander. Et Labeo dit que je doi demander à chascun la moitié, et issi avendra que je avré .ii. unces de chascun, et je cuit que c’est voir ; mes je serai tenuz de rendre .ii. unces de .iiii. que je tenoie. Et fera l’en contrepois de ce que je tieng par la force au juige, se cil sont heir o moi à qui je demant l’eritage. ¶ {5} Aucun ostroie li prevoz demande d’eritage de partie que n’est pas certaine par causes [45rA] convenables qui i avienent ; ausi comme li fiz au frere qui est mort, et les femes à frere qui sont morz qui sont grosses, l’an ne siet quel partie li fiz doit demander de l’eritage, car l’en ne set pas se li enfant nestroit des femes as freres morz qui sont grosses. Droiz est donques que l’en li ostroit à demander partie qui n’est pas certaine, ne il ne la demandera pas hardiement ; et issi dira l’en que l’en doit ostroier chaloinge de partie qui n’est pas certaine la où aucun ne set quel partie il doit demander.

Se de plusors à qui un eritage apartient li un demandent l’eritage, li autre ne le demandent mie, s’il demandent l’eritage, il ne devent pas avoir plus grant partie que il eussent se tuit la demandeseint, ni ne lor vaut rien si li autre ne l’en demandent ; et se li autre ne la demandent, il porront lors demander lor parties si lor apartient.

Nos ne poons pas avoir par demande d’eritage ce que nous avons par juigement de partie quant nos departon ce qu’estoit communel, car il n’apartient pas à l’ofice au juige, mes que il commandera que ce que nos tenon communaument1 que l’en m’an rande ma partie.

L’en sofferra à celui qui tient l’eritage que il deffende la partie de l’eritage et l’autre lessier, ne il n’en deffant pas à aucun à tenir tot l’eritage ; et s’il siet que la moitié li apartienge, ne de l’autre partie il ne doit pas fere contenz.

Quant molz hers furent establi l’un d’aus estoit otremer, son procurator vendi et prist l’argent de la partie celi ; aprés s’en fu que cil qui estoit ostremer mort avant la vençon, et li procurator avoit vendu la moistié por celi heir, l’en demanda comment l’en porra demander l’argent de cele vençon. L’en dit que le puet demander à celui qui fu procurator tot l’eritage, por ce que cil de[45rB]nier furent de l’eritage que cil procurator avoit receu et que l’en la poet demander, et la moitié de l’eritage as autres hers ; se li procurator ot tot l’argent de la vençon que li juiges li feist tot rendre, ou si cist rendi la moitié à son heir, li juiges condampnast celui heir à rendre la moistié.