École des chartes » ELEC » LI QUARZ LIVRES » X. De jor de consoil et de jor de montrée.
[p. 130]

X. De jor de consoil et de jor de montrée.

§ 1.

A totes les foiz que l'en demande à home cors qui ne puet remuer, ne qui l'en ne puet remuer, l'en doit avoir jor de montrée à la requeste à celi à qui l'en demende ; et en choses que l'en puet remuer, non. Et doit l'en avoir jor, l'en doit avoir jor en leu certain et à ore nommée. Et se aucuns met sus défaut de montrée à celui à qui l'en demende, il s'en passera par son serement.

Or demende l'en quantes foiz il s'en passera par son serement ? Nos dissons en deus ; et s'il i a contenz, en la tierce foiz bones genz en seront creuz. Et se li demanderres est si povres qu'il ne puisse arme avoir, la jostice doit envoier sofisaument, et por le riche et por le povre, à la requeste au demendeor.

Enten : l'en ne doit avoir que deus proves à acuser montrée, et la tierce doit aler por enqueste et de montrée ; et por montrée ne nest point de batalle.

Se li sires requiert à son home que il li motre son fié, li hons doit avoir trois quinzeines de motré lou, se mestiers est, et non plus ; et de vilenage autant.

Jor de conseil est à demender à celui à qui l'en demende ; et il le doit avoir tenable, segont le leu où l'en demende et segont ce que l'en li demende, por encerchier la vérité de la chose et por venir [p. 131] garniz de garanz de soi deffendre et de demender. L'en doit avoir jor de conseil de la demende que l'en n'a pas oïe devant juige ; cele que l'en a oïe, non.

L'en ne doit pas avoir jor de conseil en tel cas : de murtre, de rat, de larrecin, d'omicide, de traïson, de membre tolu, de trêve demender, ne de chose où il a péril de doner le jor, comme se l'en a une feme ravie ou pris un home et mis en prison, ou se l'en tient aucune chose qui puet périr en dementres, ne de nul fet de cors.

Se aucuns se passe par son serement deus foiz qu'il a eu jor de conseil, et s'en vot passer la tierce, l'en ne li sofre pas, ainz sera atainz par tesmoinz qui virent le jor metre ; et tés airemanz sont en cort qui n'a pas recort, et an cort qui a recort, recort passe.

Un home copable demende jor de conseil. Li demenderes dit qu'il l'a eu et l'ofre à prover ; et copable fet ni sanz deffense. L'en demende qu'en dit droiz ? Et l'en respont, quant il n'ofre contre la prove deffense, qu'il pert sa querele, sanz avoir prove, ne autre chose.