École des chartes » ELEC » LI QUARZ LIVRES » XXII. D'aler et de venir en leu qui n'est pas commun.
[p. 146]

XXII. D'aler et de venir en leu qui n'est pas commun.

§ 1.

Servises de teneures sont perdues se un moismes sires deviant sires de l'une et de l'autre teneure. Ou il i a son aler et son venir (mener), s'il veust (va) solement au tans establiz, li servises dure ; car cil qui puet mener i puet aler. Voie à aler cors entarrer, qui est deue, se l'en n'an use, l'en ne la pert pas.

§ 2.

Nos avon et retenon nostre servise par les persones des sers et par le fruitier et par celui qui tient la chose en bone foi1.

Se ge et li orfelin avon commune teneure, tot n'en usons-nos, je retien la voie por l'orfelin.

§ 3.

[p. 147] Se cil qui a eu de nuiz servise, et n'an use aucune foiz por tans establi, il pert son servise de nuiz, por ce qu'il n'en a pas usé. Ausit est de celi qui avoit son usage à certaines hores, et an usa en autres2.

Se aucun vendi l'ostel pruchein de la teneure, qui estoit près dou champ qui devoit servises, à qui li voisins devet voie, et il n'ot point de servise mis sor celui champ, dedanz le tens que servises falloit, et il conquiert arières cel leu, il doit avoir le servise que li voisins devoit.

Se li leus par où l'en avoit son aler et son venir, est sorpris de cors d'eue li tens qu'il sofist à perdre servise, en rétablir, le servise retorne ausint comme davant ; et se cil tens passe, que li servises soit perduz, il doit estre forciet de renoveler lou.

Quant voie commune est perdue par force d'eue ou par fonture, li voisins prucheins doivent fere voie. Se cil qui a son aler à puisser eue, et en tans que li servise est perduz, il ne vet pas à la fonteine, ne n'i puisse aler, il i puet aler3.

§ 4.

Servise est retenu par usage quant cil en use à qui l'en le doit ; ou cil qui en est en sésine an nom de li, ou mercier ou oste ou ami ou mire, ou cil qui est venuz veoir le seignor, ou gaagneor, ou fruitier quant li fruitier en use an son nom, et quanques an hue (use) de une que l'an li doit, s'il apartient de nostre teneure ou s'il vient de nostre teneure. Le servises sera retenuz, tot tiegne cil la chose mauvèsement.

Cil n'usera pas dou servise s'il ne croit qu'il en doie user par droit ; et par cause, se aucuns use de voie ou d'autre servise, ne deffanse, ne aucion ne li a mestier4.


1 Dig., lib. 8, tit. 6, frag. 1-5 : Quemadmodum servitutes amittantur.
2 Dig., lib. 8, tit. 6, frag. 10
3 Ibid., frag. 13, 14, 17.
4 Ibid., frag. 20-25.