XXIII. De danrées taillies que l'en ne puet véer.

§ 1.

L'en ne puet véer vin, quant il est mis en taverne, que l'an n'en aist, por de l'argent, painblié que l'en vent à mesure ; comme avoine et blez autres qui sont à taverniez, as fenestres ouvertes ; comme pois, fèves.

Et se aucuns a vendu ou martroi dix muis de sègle et il en ait vingt [p. 148] en son grainier, puet-il véer que l'en ne pregne plus ? Oïl, s'il ne veaut plus vendre ; mès s'il en veaut plus vendre, il ne le puet dévéer au poure por doner au riche, ne au riche por doner au poure.

E (et) qui vée danrées tallies com pain, vin en tavernes, fet contre le ban commun.

Et se bochier a sa char tallie ou porc, la puet-il véer ? Oïl, qui ne la vodra achatier ce qu'il dira, se'l veust vendre à pois.

§ 2.

Totes les choses qui sont vendues à pois et à mesure, à feur nomé, l'en ne les puet véer, se l'en n'atanche sa taverne. Mès l'en peut bien ses choses estanchier por enchérissement, s'il veaut ; et les puet l'en bien vandre plus que achatier les vodra. Mès l'en ne puet pas danrées encharcir qui sont tallées, por metre fain en la terre et o païs. Et ne doit l'en pas sofrir que communeté face Herbaut de ce que l'en doit avoir convenable en lieu et en tens.

Et se aucuns se plaint que il aut vées ses danrées, et l'ofre à prover par soi et par garanz, et li autre face encontre tel ni et tel deffense comme il doit, en tel chose n'ot pas bataille, ainz vet par prove ; et li chois de la prove est à celui à qui l'en de mende.