XVII. De usaiges de fruiz et de sésine de cité.

§ 1.

Servises sont de gens, si comme usages et fruiz ; ou servises sont de choses, si comme de teneures de viles et de citez.

Li seignors des mesons communes n'i puet par soi sol metre servise. Li un sont en terre, li autre dehors.

Certaine chose est que l'en puet mestre mesure en servise. Ausit com l'en devise que chascun le ira por la teneure, ou ausi com l'en aille por un senter, et n'i portera l'en que certaine laece1.

Voie à aler puiser eue, et porquoi sont establies en ces menières et en autretex comme nos avons dit que usages est establiz.

Usage de servise puet estre establiz en tens, si comme aucuns a son usage en aucune chose de tierce jusque à none, ou de hui à por demain. Servise puet estre ou lessié ou establi sor certaine partie de la teneure. Se l'en ostroie à avoir aucun usage par autrui teneure, il ne doit mie aler parmi la costure, parmi les blez, ne par la meson, quant il puet aler alors sanz fere domage : quar tex choses sont acestés, tot non die l'en pas.

Se je lesse voie où l'en ne puet aler, l'an dit que l'en puet bien fere tant que l'en i puisse aler, et que l'en i et (ait) voie2.

Servise de voie à cemetire est de droit privé, et por ce le puet l'en chalongier au segnor cui la teneure est ; et cest servise puet estre aquis [p. 138] por la religion de l'enteremant. Se c'est commun leu ou commune voie, commun service d'aler où il puet estre mis ; mès l'en n'i puet fere droit, et l'en siaut demender au prince que l'en puisse mener eue par commune voie, sanz fere domage à la communauté.

Religios leu ne pot servise de voe avoir : quar nus ne doie aler par celi leu3.

Partie de voie, d'aler et de venir, et de mener eue, ne puet estre engagie : car lor usages n'est pas départiz ; et por ce, se li prometeor muert et lesse plusors heirs, chascun demende la voie toute, et s'il lesse un heir. L'en demende se l'en puet mestre servise à la teneure que aucun vant ? Et l'en dit que oïl4.

Se terre est commune ou voie commune, il n'enpeeche pas servise d'aler et de venir, et d'élever sa meson plus haut, ne de chevroner, ne de covrir, ne d'abatre ; et ele empêche servise de plue et d'agoz, et le ciel qui est desus doit estre délivre5.