VIII. De retret de chalonge.

§ 1.

Un home achate une meson ; l'en dit que cil qui sont parant au vendeor de lignage de cele partie don la chose muet, aura la chose par tant comme ele coste, dedanz l'an et le jor ; et se li acheterres dit que li an et li jor soit passez, porquoi ne li en veaut respondre, la chalongierres convindra qu'il enfraigne ce par guaranz, et qu'il fut à la vante fere, et as deniers paier. Et se batalle est vaincue, par ce ne perdra pas li acheterres son argent, et se il n'afraint la tenue, li acheterres tiendra la sésine, et sera jugemanz donez contre le chalengeor. Et s'il nie qui n'est pas del lignage, et s'il dit qu'il n'est pas de cel paroi dont la chose muet, en tel chose n'a point de batalle ; mès par bons tesmoinz qui sachent qu'il soent del lignage d'oïr et de savoir de cele partie don la chose muet.

A l'en motrée en chalonge ? Oïl et jor de conseil ; et doit l'en offrir les deners en la place ; et se aucuns empire la chose por que ele ne soit chalongié dedanz l'an, le puet-il fere ? L'en dit que nenil, et s'il amende, aura-il son commencement ? Et l'en dit que oïl.

Et se aucuns est en pèlerinage, comme à Rome ou outremer, ou en lontiengin païs, et li anz passe, puet-il chalongier quant il sera venuz  ? L'en dit que non : quar il fet ce por son preu. Et se il en est forspaïsiez por la force de jostice, il i puet chalongier, quant il revandra ? L'en dit que oïl, et se c'est sanz copes ; ou se c'est par ses copes, non. Et s'il n'ose venir avant por la force de ses enemis, puet-il chalongier quant il vendra, et li anz passé ? L'en dit que oïl, se ce n'est par ses copes.

[p. 129] Et se l'en li ostroiast, ou qu'il le prist por tant comme un autre vodroit doner et ne le vost fere, puet-il chalongier ? Et l'en dit que oïl, car plus est procheins que estranges, et porroit avenir que la chose li porroist eschoer.

Se aucuns vant et il requiert à son parant que il autroit la vande ; il ne l'otroera pas s'il ne veaut, henz ara s'année à retrere.

§ 2.

Li sires des choses qui sont soz li, se eles sont vendues, il la doit avoir s'il veaut, à l'argent paiant, avant que estranges.