Privilegium Philippi I regis pro abbatiola Sancti Christofori in Halata. Ex schedis dom. de Nulli, canonici Bellovacensis1.

In nomine sancte et individue Trinitatis, ego Philippus gratia Dei Francorum rex. Cum status sacre religionis maxime fulciatur multimodis bonorum studiis, magis tamen augmentari creditur sacrorum constructione locorum, ubi semper Deum exorent vota fidelium : unde remunerationis premium apud Deum habet repositum quisquis sacra loca vel edificaverit, vel terrenis opibus ditaverit. Innotescat igitur solertie omnium tam presentium quam futurorum, quod quidam miles noster nomine Walerannus, nostram adiit presentiam una cum fratribus, scilicet Waltero archidiacono et Hugone, necnon Balduino atque Rainaldo, petens ut abbatiolam quam constructam in memoriam Sancti Christofori martyris tenebat de beneficio S. Petri Belvacensis Ecclesie, annuente ejusdem Ecclesie Gausberto antistite, cum consensu clericorum suorum et militum, nostra manu firmam faceremus, ita ut nemo deinceps fratres ibidem Deo regulariter servientes, vel locum ipsum inquietare audeat, vel consuetudinem aliquam exigere, sed perpetualiter absque aliqua inquietudine vel contradictione sub nomine immunitatis permaneat. Dedit autem supradictus miles ipsi ecclesie de rebus sue proprietatis, ipsam scilicet villam nomine Hermene,3, ubi ea ecclesia sita est, et omnes consuetudines que sibi in eadem villa debebantur, et hospites, et servos et ancillas, et clausos vinearum, et terras arabiles, et prata ; silvam quoque eidem ville adjacentem, et milites de eadem villa beneficia tenentes ; villam similiter nuncupatam Florinas, cum omnibus ad eam pertinentibus ; in villa quoque Pomponensi partem altaris sancti Petri ecclesie que dicitur Cella4, cum sua decima et cum censu viginti solidorum, et servos et ancillas sui juris, clausos quoque vinearum, et terram arabilem, et prata et adjacentem silvam ; juxta suburbium Clarimontis, in villa que dicitur Rostolum5, unum clausum vinearum. Item in pago Belvacensi in villa que vocatur Reus6, tres arpennos vinearum et dimidium ; in villa que vocatur Pontis, ancillam quamdam nomine Richildem, cum infantibus suis. In civitate vero Silvanectensi, unum clausum vinearum et unum furnum ; in villa etiam Aminiacensi7, unum hospitem et terram arabilem. In territorio Meldensi villam que vocatur Sineverie8, omne hoc quod Walterus pater suus ibi in proprio jure tenuerat. Dono etiam ego ipse cum matre mea, censum vinearum, et de denariis et de vino quas habebat predicta ecclesia in villa que vocatur Reus, ob remedium anime patris nostri Henrici regis. Item in territorio Silvanectensi predictus Gualerannus dedit eidem abbatie duas partes de decima ejusdem ecclesie sancti Christofori, quam sub manu firma tenebat de canonicis sancte Marie Silvanect. Ecclesie, annuente Feodando9 episcopo cum clericis ad quos ipsa decima pertinebat. Ut igitur hec omnia inconvulsa et imperpetuum rata permaneant, petentibus supradictis fratribus, Gualeranno scilicet et aliis fratribus, manu nostra subterfirmavimus et principimus10 nostris firmandam tradidimus. Si quis vero, quod absit, hoc preceptum violare presumpserit, centum libras auri coactus regio fisco reddat. Actum Compendio anno incarnationis Domini nostri Jhesu Christi millesimo sexagesimo primo indictione xiiii^a regnante Philippo rege anno primo. Datum pridie calendas Maii... Balduinus cancellarius scripsit.