I. Ci commence li livres de Digeste nove. Cist titres est de chose1 juigie et de la force des sentences et des interlocutoires au juiges [rubr.]

[136rB] Modestinus dit : l’en apele « chose juigie » par quoi li plet son‹t› finé par le prononcement au juige ; et ce avient quant aucun est condempnez ou asoz.

Gaius dit : cil qui juige ne garde pas toz jorz le tens de la chose juigie ; ainz l’acorce aucunne foiz et l’alongue aucunne foiz selonc la qualité et selonc la quantité de la cause ou des persones, ou par lor obedience, ou par lor cotumance. Mes poe2 avient que sentence soient mandees à execucion devant le tens qui est establiz. Mes se est quant il convient doner norreture à aucun, ou quant l’en secort à celui qui a moins de .xv. anz.

Paulus dit : cil qui puet condempner a poer de sodre.

Ulpians dit : se li procurators n’a esté à oïr sentence, aucion de chose juigie n’avra pas leu contre lui, ainz sera doné contre son seignor ; et se il i fu, ele sera donee contre lui. Nos ne parlons pas tant solement qui est fez procurators en sa chose, car il a autre reson par quoi il ne puet pas refuser aucion de chose juigie ; car il n’est pas fez procurators en autrui chose, mes en la soe. ¶ {1} Li deffenderres et li procurators sont en tel condicion que il ne senble pas que il soffrent à recevoir juigement ; et por ce doit aucion de chose juigie estre nee contre aus. ¶ {2} Li metres d’aucunne garnison puet refuser aucion de chose juigie, mes ele sera donee contre cex qui sont en la garnison. ¶ {3} Li prevoz dit : cil qui est condempnez à poier deners por cause de chose juigee. Et que dirons nos donc s’il ne puet poier les deners et il est apareilliez de fere en satisfacion ? L’en dit donc que li prevoz ajote3 « ou il ‹n’› en face satisfacion » ; car il puet bien avenir que il ait avenant plege qui poera por lui. Mes la reson de demander deners fut que li prevoz ne vost pas que nus obligemenz venist d’autre ; et por ce dit li prevoz que li denier soient poiez. ¶ Neporquant, por grant cause ou por convenable, porra l’en venir à la sentence Labeo ; {4} si comme se les parties en ont fet convenant aprés la sentence. ¶ Et c’est por renoveler la dete que aucuns soit atornz à poier la ; et autrement non, et si gages4 ou plege en ont esté pris por la cause juigie. Por ce ne remoint pas le execucion de la sentence ; car por ce, se aucunne chose est ajointe à chose juigiee, ne se pert l’en pas de la sentence. ¶ Et ce moismes doit estre gardé [136vA] quant li procurators à aucun est condempnz. ¶ {5} Se aucuns est condempnez à poier deniers dedanz .i. certein terme, il convient voier des quant nos commoincerons à conter le terme ; ou desque la sentence est donee, ou quant li tens est passez qui est establiz es lois. Se li juiges done menor terme que celui qui est establi es lois, ce qui faut à la sentence au juige est acompli par la loi ; et s’il a donné plus dou terme, il sera gardez. ¶ {6} Nos devon tenir celui par condempné qui est condempnz à droit ; et se la sentence est malement donee, li condempnemenz ne vaut rien. {7} Nos entendon « que cil poie » non pas tant solement que il poie deners, mes que il se delivre en aucunne meniere de l’obligement qui descent de la chose juigie. {8} Celsus dit que se tu es condempnz abandoner un serf à sofrir poine, et tu abandones5 celui de qui uns autres a l’usaire, tu es encore tenuz par aucion de chose juigie ; mes se li usaires faut, tu es delivrez.

Gaius dit : ja sé ce que l’en ne puisse pas pledier de chose juigie dedanz le terme qui est establiz, neporquant cil qui est puet estre delivrez en plusors manieres ; car li termes qui est mis par la loi est establiz par celui qui est condempnz et ne mie contre lui.

Paulus dit : uns sers qui estoit demandez par convenance morut puis que li plez fu entamez ; il nos plet que cil à qui l’en demandoit soit asoz et que il rende les fruiz.

Ponponius dit : juiges ne arbitres ne puet doner sentence contre forsené.

{1} Celsus dit : se mis hom promet à un autre que il gardera que domages ne li soit fez, se il l’en garde, il6 fet ce que il promist ; et se il ne le fet, il doit estre condempnz ou deners7, si comme il avient en toz obligemanz de fere aucunne chose.

Cil moismes dit : aucun sont qui sont tret en cause por tant comme il puent fere, ce est sanz aquerre lor detes. ¶ Et aucun sont qui sont tret en cause por cex qui sont compoignons de toz lor biens.

Ulpianus dit : se li pledeor s’acordent que une cause soit juigie entre ous, ce ne sera pas sanz reson, li juiges donne tel sentence.

Cil moismes dit : si dui juige delegat donerent diverses sentences, Modestinus dit que l’une et l’autre doit estre en crole tant que plus haut juiges en ait une confermee.

Cil moismes dit : li termes qui est donz à celui qui est condempnz est donnez à ses heirs et as autres qui sont en son leu ci ; car tel termes est plus donz à la cause qu’à la persone.

Paulus dit : li juige donnent [136vB] diverses sentences, et il en a autretant d’une part comme d’autre. Se ce est en cause de franchise, la sentence qui est donee por franchise est tenable, si comme li enpereres Pius establi ; mes en autres causes est tenable la sentence qui est donee por le deffendeor, et il convient que ce soit tenu à communs juigemenz. Et se li juiges condempnent en diverses somnes, l’en se doit tenir à la menor, si comme Julians dit.

Celsus dit : se .iii. sont juige, li dui ne puent pas juigier sanz le tierz ; car il est commandé à trois que il juigent. Mes se il sont tuit presant, et li uns va contre la sentence as autres, li juigemanz as .ii. sera tenables ; car il est voirs que li .iii. ont juigié.

Cil moismes dit : Paulus escrit que cil qui sont condempné à une quantité de deners doivent estre en cause por aucion de chose juigie, li uns por autretant comme li autres. Et se la sentence fu donee contre trois et li uns en poie son avenant, il ne puet pas estre trez en cause por les autres.

Paulus dit : li juiges puet condempner s’il veust, et les parties s’i consentent, que li errement que eles sont soent aporté avant, se li plez n’est finez. ¶ {1} Puis que sentence est donnee, l’en ne doit rien establir sanz l’autorité au prince d’acroitre ou d’apeticier la poine à cex qui sont condempnez. ¶ {2} Nule sentence ne doit estre donee contre cex dedanz aage qui n’ont ne deffendeor ne procurator.

Hermogenes dit : il n’est pas deveé à amender les paroles des erremenz sanz müer la forme de la sentence.

Paulus dit : il convient donner sentence de chescunne besoigne par devant toz cex à qui la chose apartient. Et se l’en fet autrement, ce qui est juigié n’est tenable fors contre cex qui sont presanz. ¶ {1} Se aucuns sont semons plusors foiz et il despisent à deffendre lor cause par devant la borse l’enpereror, il doivent estre sormis as choses juigies.

Hermogenes dit : la contumance à celui qui n’obeist pas à juiges est punie par perdre tote la cause. ¶ {1} Cil est contumaux qui despit à venir avant quant il a eu trois somonses, ou une en leu des .iii., que l’en apele communaument perentoires. ¶ {2} Cil qui est escusez par maladie ou por greignor cause ne soffre pas poine de contumace. {3} Il n’apert que nus soit contumaus fors cil qui ne volent obeir où il doivent, et cil qui nient8 que il n’apartienent mie à la juridicion à lor juiges.

Ulpianus dit : desque li juiges a doné une foiz sentence, il lesse à estre juiges ; et de ce droit usons nos, que puis que li juiges a condempné aucun à plus ou à moins que il ne deust, il ne puet puis amender sa sentence [137rA] car il use de son office ou bien ou malemant.

Cil moismes dit : l’en ne doit riens enquerre puis que sentence est donee, ou que la cause est terminee par seremant, ou que la chose de quoi l’en pledoit a esté reconeue en droit ; car ce qui est reconeu en droit vaut autretant comme ce qui est juigié.

Cil moismes dit : ¶ Se gage sont pris et venduz sanz juigement, il puent estre recouvré.