XXV. D’amener avant franc home [rubr.]

Ulpianus dit : li prevoz dit : « tu amoignes avent le franc home que tu retienz par tricherie ». {1} Cist entrediz est proposez por cause de garentir franchise que franc home ne soient retenu par nul.

Renulcius dit : car cil qui n’ont pas poer d’aler la où il volent ne se devisent pas molt de servage.

Ulpianus dit : la loi que Favius fist porvit ce meismes«  ne cist entrediz ne tost pas que l’en ne puisse user de cele loi, car l’en puet pledier par cest entredit, et puis par la loi que Favius fist. Et encontre ce, cil qui a pledié par cele loi ne pert pas por ce que il ne puisse user de cest entredit. ¶ {1} Ce que li prevoz dit, « le franc home », apartient à toz frans homes de quel aage et de quele nature que il soient ; et combien que il an i ait, ou un ou pluseurs ; et comment que il soient, ou en bail ou ors de bail. {2} Nos ne regardons fors sanz plus savoir mon se il est frans«  neporquant, cil qui l’a en sa poeté ne sera pas tenuz par cest entredit, car il ne senble pas que cil face tricherie qui use de sa droiture. ¶ {3} Se aucuns retient celui que il a racheté de ses ennemis, il n’est pas tenuz de cest entredit, car il ne le fet pas par tricherie«  mes se l’en li offre le pris, li entrediz avra leu. Et se il l’en lessa aler sanz le pris et il le velt puis tenir, li entrediz avra leu. {4} Et se aucuns retient son fiz qui n’est pas en sa poeté, il senble que il le retient sanz tricherie, car la doble pitié li fet retenir sanz tricherie, se l’en n’i voit aperte tricherie. Et se aucuns retient celi que il franchi ou celui que il a norri [153vA], l’en dira ce moismes. Et generaument quiconques a droite cause de retenir franc home o lui, il n’apert pas que il le tiegne par tricherie. {5} Et se aucuns le retient par sa volenté meisme, neporquant i l’a deceu tant que il s’i acorde, ne il ne le tient pas par probable reson, l’en dira par droit que il le tient par tricherie. ¶ {6} Cil qui retient un franc home por ce que il cuide que il soit sers, ne le tient pas par tricherie. Mes se il le tient puis que il le set que il est frans, ce n’est pas sanz tricherie. {7} Et se il dote se il est frans ou serf, ou il plede o lui por son estat, il convient lessier cest entredit et tretier la cause de la franchise«  car li entrediz n’a leu fors quant l’en set certoinement que aucuns est frans. Et se l’en enquiert de son estat, il ne convient pas enpeechier la connoissence. ¶ {8} Li prevoz dit : « tu amoignes avant ». Amener avant est fere que l’en les puisse voier et atochier ; et ce est, proprement, « voier hors d’enfermeture ». ¶ {9} Cist entrediz apartient à toz, car l’en ne doit deffendre à nul que il ne plede por franchise. {10} Neporquant, les persones soupecenoses en doivent estre mises arriere par droite cause, se ce est par aventure tel persone de quoi il senble verité que ele acuse à tort à son escient. {11} Et se feme ou orfelins velt user de cest entredit por son coisin ou par son parent, l’en li doit otrier ; car il puent acuser en commun juigement quant il porsivent le tort qui est fet à aus ou à lor. {12} Et se il sont plusor qui en voillent pledier, li prevoz doit eslire au quel la chose apartient plus, et celui qui est plus convenables. Et il doit estre esleuz par lignage, ou par sa volenté, ou par sa dignité. {13} Et se uns a pledié par cest entredit et uns autres en velt pledier aprés, l’en doit dire que ce ne li doit pas estre ostroié legierement se il ne puet prover que cil qui en pledia avant i fist tricherie. ¶ Cist entrediz porra dons estre meulz donz plus d’une foiz quant la cause sera coneue. Et se cil qui tient le franc home est condempnz, et il velt melz paier le pris do plet que amener le avant, l’en porra à lui pledier de rechief par cest entredit. {14} Et Labeo dit que, se il se deffent, l’en sesira ses biens. ¶ {15} Cist entrediz est pardurables.

Renulcius dit : « se aucuns retient un franc home qui ne set pas son estat, se il le fet par tricherie, il sera contrainz de le amener avant ». ¶ {1} Trebacius dit que cil n’est pas tenuz par cest entredit qui a acheté [153vB] par bone foi franc home en leu de serf, si que il ne tient pas en nul tens par tricherie. ¶ {3} Cist entrediz n’apartient pas au creancier que ses detors soit amenz avant«  car nus n’est contrainz d’amener avant le detor qui se repont, mes l’en sesist ses biens par le commandemant au prevost.