III. [137rB] De cez qui reconnoissent [rubr.]

Paulus dit : cil qui reconoist estre autresi comme cil qui est convoincuz, car il est condempnz par sa sentence.

Ulpians dit : cil qui dit aucunne chose par error ne reconoist pas se il s’est ignoranz de droit.

Paulus dit : Juliens dit que cil qui reconoist un certein lés doit estre condempnz à poier le, s’il dure mes ; et s’il ne dure, il soit condempnez en tant comme il valoit ; car cil qui reconoist est autresi comme cil qui est convoincuz.

Cil moismes dit : se cil à qui l’en plede par loi qui fet restorer les domages reconoist que il ocist un serf, ja sé ce que il ne l’ocist pas, ne pour quant se li sers fu ocis, il est tenuz par sa reconoissence.

Ulpianus dit : cil qui reconoit que il doit un serf doit estre condempnz à rendre le1 comment que il soit, ou s’il estoit ja morz quant li plez commoinça, ‹ou› se il morut puis que plez li fu entamnz.

Cil moismes dit : cil qui reconoist certeine chose est autresi comme s’il en fust convoincuz. {1} Mes s’il reconoist chose qui n’est pas certeine, si comme se il dit que il doit doner .i. serf ou .i. champ, il doit estre condempnz de reconoistre le quel il doit. Et cil qui reconoist que il doit une partie d’une chose doit estre contrainz de reconoistre certeine quantité. {2} Et se je di que uns chans soit miens et tu le reconoiz, il sera autresi comme la sentence fust donnee que li chans est de ma seignorie2. ¶ Par quel aucion que aucuns soit trez en cause se il requenoist ce que l’en li demande, l’en doit dire que li prevoz doit sivre la volenté à l’enpereor Marc et tenir celi qui reconoist par convoincu. ¶ As aucions par quoi l’en done à celui qui est convoincuz terme de rendre la chose, sera il donnz à celui qui reconoist ; et se il ne rant la chose au terme, il convoindra que il en rendre le pris. ¶ {3} Se aucuns reconoist quant ses averseres n’est pas presenz, il convint voir se il doit estre autresi comme s’il fust condempnez ; car nus ne sost estre obligiez à celui qui n’est pas presenz, et sanz dote ce est assez se li deffenderres ou li procureres est presanz. {4} Veons donc se c’est assez se li deffendeor ou li procurator reconoissent ; et je croi que ce n’est pas assez. ¶ {5} Nos demandons en l’orfelin l’autorité à celui qui l’a en [137vA] garde. {6} Et se cil qui est dedanz aage, nos li donnons enterine restitucion. ¶ {7} Cil qui reconoissent avront terme autre, si comme cil qui sont convoincu.

Affriquens dit : quant uns lés est demandez, et li heirs reconoist que il le devoit, li arbitres qui fu donz por fere le rendre aprent que il n’estoit pas deuz ; l’en demande se il puet asodre l’oir. Et la response est que oïl bien, se nule chose ne fu lessie au demandeor, car se ce fu por ce que li lés ne fu mis par droit, il ne le deust pas assodre ; et se ce fu por ce que cil qui fist le testamant n’avoit de quoi poier ses detes, ou por ce que li heirs dit par devant le prevost que il avoit tot aquité, li arbitres le pot assodre par son office se il trove que li heritages soit si chargiez de detes qui ne sofisent pas à poier le lés. Car en cas il le puet assodre, mes en cel devant il le doit envier au prevost por assodre le.

Paulus dit : cil qui reconois ne doit pas estre toz jorz condempnez ou non de la chose de quoi l’en ne set pas que ele dure.

Mes Ulpianus dit : previleges de demander est donz au creancier qui a presté ses deniers por establir les edefiemenz.

Cil moismes dit : se li denier as dereners creanciers ont esté poié as premers, il sont en lor leu à persone‹l›s aucions.

Cil moismes : cil qui abandonet ses biens ne les pert pas devant que il soient vendu ; et por ce, se il est apareilliez de deffendre soi, il ne seront pas venduz.

Paulus dit : cil qui se repent que il abandone ses biens puet fere que il ne seront pas venduz, se il se deffont.

Ulpianus dit : se cil qui abandone ses biens aquis aucunne chose puis que il furent vendu, si bien ne seront pas vendu de rechief. Car se aucunne chose li est lessie ou donnee por vivre soi, il ne convient pas qui ele soit vendue, car l’en ne li doit pas tolir son vivre de chescun jor. Autresi est il se li usaires d’une chose li est donnz ou lessiez, de quoi il ne puet avoir fort tant comme il li convient à son vivre.

Modestinus dit : se li bien à un detor sont vendu par la requeste as creanciers, il est que li bien au detor soient vendu de rechief, tant que li creancier aient tot le lor se li detors a puis aquis tel chetel par quoi li prevoz puisse estre meüz à ostroier le.

Ulpians dit : cil qui abandone ses biens ainz que il reconoisse la dete ne doit pas estre oïz.

Ulpians dit : trois causes sont par quoi l’en seust mestre aucun en possession : por carder la chose [137vB], por garder le lés, et ou non à l’anfant qui est encore ou ventre sa mere. Car quant aucuns ne veust doner caucion que domages ne vendra pas par devers lui, ses averseres n’est pas mis en possession de toz ses biens, mes de cex sanz plus don il crient que domages li viegne.

Cil moismes dit : li prevoz dit : je commanderoi que l’en aille en possession des biens à celui qui dona plege de estre à droit se il ne done à son aversere poeté d’acuser le, ou s’il ne se fet deffendre. ¶ {1} Cil ne donne pas à son aversere poeté d’acuser le qui fet que ses averseres ne set où il est. Li prevoz commande donc que li bien à celui qui se cele soient porsis.{2} Et se il ne se cele pas, ainz se deffant et n’est pas deffenduz, donc apert il que il fet que ses averseires n’a pas poer d’acuser le. ¶ {3} Il apert que cil sont deffenduz qui par sa deffaute n’enpire de rien la cause à son aversere. {4} Cez paroles « se il ne se fet deffendre » sont issi entendues que il ne sofist pas que il soit deffanduz aucunne foiz se la deffense ne dure.

Paulus dit : li creancier solent estre mis en possession se li dener lor sont promis soz condicion. ¶ {1} Quant l’en dit « li bien qui sont porsis des creanciers seront vendu fors cil à l’orfelin et à celui qui est hors do poïs sanz tricherie par la cause la chose commune », nos entendons que li bien à cex qui sont hors do païs por tricherie puent estre vendu. {2} Et se il est pris de ses enemis, si creancier doivent estre mis en possession en tel meniere ; neporquant, il ne lor soit pas ostroié à vendre mointenant ses biens, mes uns procureres i soit mis.

Cil moismes dit : se l’en est longuement en dote se il avra en un heritage heir ou non, quant la cause sera conneue il convoindra à ostroier que li bien soient porsis por cause de garder la chose. Et se l’en voit que mestiers en soit, il sera bone chose que l’en ostroit que uns procurators i soit establiz.

Paulus dit : se uns des heirs se conseille de recevoir l’eritage dedanz le terme qui li est donnz, et li autres ne le reçoit pas, il convient ‹voir› que l’en dit fere as creanciers. Et il nos plest que il soient dedanz ce mis en possession por cause de garder l’eritage, tant que l’en sache se cil qui se consoille le recevra ou non.

Paulus dit : se uns lés est lessiez soz condicion à un fiz qui est soz la poeté son pere, l’en doit dire que li peres et li fiz doivent enbedui estre mis en possession, car le gaign est à anbedeus.

Ulpianus dit : cil qui a pris chose par eschange est senblables à acheteor, et cil qui prent une chose en solte3, et cil qui l’a por le pris d’un plet, et cil qui l’a par aucunne autre convenance [138rA] fors que par don.

Paulus dit : il convient que li bien soient vendu la où li sires doit estre deffenduz, {*42.5.2} ou la où il a sa meson {*42.5.3}, ou la où il a fet le marchié ; je n’entant pas la où li marchiez a esté convenenciez, mes la où li denier doivent estre poié.

Ulpianus dit : se aucuns qui a moins de .xxv. anz a procureors et il ne le deffendent pas, ne il ne trove nul autre qui le deffende, si bien sont vendue, ja sé ce que il ne se repont pas ; car cil qui n’a pas convenable deffendeor est autresi comme cil qui se repont por barater ses creanciers.

Paulus dit : se il ne plet pas à l’orfelin à retenir l’eritage son pere, li prevoz ostroie que li bien au mort soient vendu ; et ce que remoindra quant ses detes seront aquitez soit rendu à l’orfelin. ¶ {1} Se li orfelins fet aucunne chose en l’eritage ainz que il s’en atiegne, ele doit estre teneble se il la fist par bone foi. {2} S’il poia donc aucun des creanciers de l’eritage lor detes et li bien au mort en sont aprés vendu, se l’en demande se il puet demander arrieres ce que il poia. Juliens dit que il convient garder que la negligence ou la covoitise à aucun ne nuise4 au vendant lor detes. Et cil qui avoit l’orfelin en garde lor poia ; il est droiz que ce que il poia soit avant rendu à l’orfelin, et issi le dit Juliens. ¶ Il apert que il a parole de ce qui est poié des biens au pere. ¶ Si li orfelins poie d’autre part, veon se l’en li rendra ou non ; et se l’en li rent, qui li rendra, ou li creanciers ou le eritages. Et Scevola dit que tot li doit estre rendu de l’eritage se il i a de quoi, à la meniere de celui qui a fet autrui besoignes. Et se il n’a rien en l’eritage, ce n’est pas torz se il demande au creancier ce que il i a poié que il ne li devoit pas.

Gaius dit : l’en apele « dete de l’eritage » neïs cele de quoi l’en ne poet pledier o le mort ; si comme se il promist à doner aucunne chose quant il moroit, ou quant cil qui estoit plege por lui poia aprés sa mort.

Paulus dit : quant uns des creanciers requiert que il soit mis en possession des biens au detor, l’en demande se cil seus qui les requiert les puet porsoer. Ou quant li uns le requiert et li prevoz li ostroie, se tuit puent entrer en la possession. Et il est mieuz que, quant li prevoz l’otroie à l’un, il ne l’otroie pas à lui seul mes à toz les autres. Et Labeo cuide que franche persone ne puisse bien aquerre à autre que à lui ; ne ele n’aquiert rien à autre que à celui à qui li prevoz l’otroia, mes il fet aucunne chose par ordre, et par ce vant il as autres [138rB]. Et se cil requiert la possession qui n’est pas creanciers, l’e‹n› ne puet pas dire que li creanciers puisse porseer por ce que cil qui issi le demande ne fet rien. Mes il est autrement se li creanciers à qui la possession est baillie est poiez de sa dete, car li autre puent vendre de ses biens. ¶ {1} Cil à qui il est commandé que il porsie est mis en leu de quoi la cure apartient à celui qui le commande. ¶ {2} Se une chose ne puet estre porsisse por sa nature, si comme se .i. champ est coverz d’eve, ou por peor de larrons, l’en dira par droit que por ce ne lesse il pas à estre porsis.

Gaius dit : ja sé ce que li bien au detor ne soient pas porsis sanz contredit, neporquant li creanciers qui fu mis en possession est autresi comme s’il fusent porsis.

Marcus dit : quant li bien au detor sont vendu por ses detes, li creanciers qui est de son lignage doit estre poiez ainz que li estranges ; et de toz les creanciers doit estre poiez celui premerement à qui la greignor some des deners est deue.

Cil moismes dit : li prevoz dit : se aucuns marchiez fu fez puis que cil qui li bien estoient, qui sont vendu, ot pris consoil de barat, aucion n’en soit pas donee en ce non.

Papinians dit : Infidius reconte que quant une ymage est droicee5 en commun leu en l’ennor à aucun, et li bien à celui par qui ele i est dreicie sont vendu, ele n’est pas à celui qui l’achete ; ainz est commune se ele fu drecie por aorner le leu, ou ele est à celui en qui ennor ele fu mise, ne ne peut en nule meniere estre vendue.

Papirius dit : li enpereors Sevoirs et Antonius escritrent que cil qui nient que lor biens ne sont pas venduz par droit en doivent pledier, et il requierent por neant au prince que la vente soit depecie.

Marciaus dit : se aucuns demande ce que il presta por fere une nef ou por armer la, il a previlege aprés la borse l’e‹n›pereor.

Cil moismes dit : se li orfelins n’est deffenduz et si creancier soient mis en possession de ses biens, il li en doivent trover norreture tant que il ait acompli l’age de .xiiii. anz. ¶ Li bien à celui qui est pris de ses enemis ne puet estre vendu devant que il reviegne.