XXVII. De l’entredit de possession de chose movable [rubr.]

Ulpianus dit : li prevoz dit : « je deffant que force ne soit fete que cil n’en maint cest home o qui il a esté de greignor partie de l’an ». ¶ {1} Cist entrediz apartient à la possession des choses movables. Et sa force est oele à l’entredit de possession des choses movables, qui apartient as choses qui ne sont pas movables«  et en cest entrevainc cil qui a la possession de la chose que ses averseires demande, et ne l’a ne par force, ne en repost, ne par enprunt.

Ulpians dit : li prevoz dit : « se li hom de qui l’en plede n’est pas de chose de quoi convenanz fut fez entre toi et ton aversere, et se les choses qui furent aportees ou amenees, ou fetes ou nees, en l’abitacion de quoi l’en [154rB] plede ne te furent pas obligié et por le loer de l’abitacion, ou eles furent obligees mes li loiers t’en a esté paiez, ou satisfacion t’en a esté fete, ou il est remés en toi que il ne t’a esté paiez, je deffant que force ne soit fete à celui qui les i amena que il ne les en puisse mener ». ¶ {1-2} Cist entrediz est proposez à l’oste qui s’en velt aler quant a poié le loier de sa meson, et il apartient au coitiveor à qui l’en puet secorre hors d’ordre. {3} Et se habitacion a esté baillie à aucun sanz loer, cist entrediz li apartient desque il n’en doit loier. {4} Et Labeo dit que cist entrediz n’a pas leu se cil qui en velt user n’est apareilliez1 de poier le loier que il doit. Et por ce, se tu as poié le loier de .vi. mois et tu doiz encor celui d’autres .vi., tu ne puez pas user de cest entredit devant que tu aies tot poié de .vi. mois qui sont à venir. Se il fut mis especiaument en convenient que il ne liroit pas à l’oste2 de partir de la meson devant un an, ou devant un certein terme. Autressi est il se aucuns l’a loié à deus anz ou à trois et il ne sont pas encor passé«  car por ce que li gage sont obligié par tot le loage, li entrediz n’avra pas leu se il ne sont aquité. ¶ {5} L’en doit savoir que li prevoz ne demande pas que les choses soient à celui qui a pris la chose à loage, mes que il les i ait aportees par non de gage. Et por ce, se eles sont estranges, et eles sont teles que eles ne puet pas estre tenues en gage, neporquant eles i sont amenees par non de gage, cist entrediz avra leu. Mes se eles ne furent pas amenees par non de gage, eles ne porront pas estre retenues. {6} Cist entrediz est pardurables et est donz as heirs et encontre les heirs.

Paulus dit : l’en ne dote pas que cist entrediz n’apartiegne à l’oste, naïs par les choses qui ne sont pas seues, ainz i sont par aventure prestees, ou loees, ou baillies en garde.