V. Des choses qui sont fetes por grever ses creanciers soient rapelees [rubr.]

Ulpianus dit : li prevoz dit : « se aucunne chose est fete por cause de barat, je en donroi au procurator, dedanz l’en, que l’en en porra pledier et aver en aucion contre celui qui sot le barat, ou à celui à qui ele convendra doner ; et je garderoi ce meismes contre celui qui fist le barat ». ¶ {1} Li prevoz proposa par besoing cest bannissement, par quoi il porvit as creanciers par rapeler les choses qui sont estrangees par barat. [139rB] ¶ {2} Il dit donc « se aucunne chose est fete par barat » ; ces paroles sont generaux et contienent en eus totes choses en quoi barat puet estre fez, ou estrangemenz ou autre marchié. Tot ce qui est donc fet par cause de barat est rapelé par cex paroles. Se aucunne chose a donc esté estrangee, ou se aucuns de cex a esté aquitez par aucun convenant, tot doit estre rapelez. ¶

Ce moismes doit l’en prover se il rent les gages ou se il fet aucunne autre chose por barater ses creanciers ; {*42.8.3} ou se il done aucun de cex excepcion de quoi il se puisse deffendre, ou se il s’est obligiz por grever ses creanciers, ou s’il poia deners, ou fist aucunne autre chose por grever les, il est aperte chose que cil bennissemenz a leu. ¶ {1} Nos devon entendre ce qui est fet par cause de barat non pas tant solement quant li detors fet aucun marchié, mes se il a lessié aucunne foiz à son esciant à venir à juigement, ou il a sofert que sa cause est perie, ou il ne demande pas à son detor ce que il li doit, si que li detors est delivrez par longue atante, ou s’il sofre que il perde userre ou servise. {2} Et quiconques fet chose par quoi il lest à avoir ce que il a, il apartient à ce banissement.

Paulus dit : l’en doit entendre que cil qui ne fet pas ce que il dut fere, le fet par barat ; autresi est il mise des servises qui li sont deu.

Gaius dit : et se il guerpist les choses, si que eles soient à celui qui les1 prendra.

Paulus dit : cil qui peust aquerre aucunne chose et ne s’entremet d’aquerre la, apartient à ce benissement. Cist benissement apartient à cex qui amenuissent lor patremoine et ne mie à cex qui n’entendent pas acroire le. {1} Et por ce, se aucuns n’obeist pas à aucunne condicion que il ne li conviegne poier poine, il ne fet pas leu à ce benissement. {2} Et por ce, se il refuse heritages que il peust avoir par les lois ou par testamant, il ne fet pas leu à ce benissement, quar il ne veust acroire, neporquant il n’amenuisse pas son propre patremoine. {3} Autresi doit l’en dire se il met son filz hors de son bail, si que il puisse recevoir l’eritage à sa volenté. {4} Et s’il refuse un lés, cist benissement cesse ; et iscrit Juliens. ¶ {5} Se il ve‹n›di son sers qui estoit fez heirs, si qui il reçut l’eritage par le commandemant à l’acheteor, se il n’a nul barat en la vente, li benissemenz cesse ; quar se il ne l’eust vendu, si puet il bien refuser l’eritage. Mes se il ot barat en la vente, ele sera rapelee, autresi comme se il eust franchi par barat. ¶ {6} Labeo escrit que cil qui reçoit le [139vA] suen ne fet nul barat ; ce est cil qui reçoit ce que li est deu. Toz ce benissement apartient as marchiez de quoi li prevoz ne s’entremet pas, si comme à gages et à ventes. ¶ {7} L’en doit savoir que Juliens escrit, et nos usons de ce droit, que cil qui a receu les deners qui li estoient deu ainz que li bien au detor fusent porsis, je sé2 ce que il savoit bien quant il les reçut que li detors n’avoit pas dont aquiter soi à ses autres creanciers, il ne crient de rien ce banissement, quar il se porvit d’avoir sa dete ainz que li bien en fusent porsis. {9} L’en doit savoir que cil qui par le consentement as creanciers achete aucunne chose de celui qui tant à barater les, ou qui fet aucun marchié à lui, ne le fet pas en grevance des creancier ; car il ne baratent pas desque il sevent et consentent. ¶ {10} Se aucuns marchiez est fez o orfelin par barater les creanciers à celui qui l’é fet, il doit estre rapelez se li creancier en sont grevé ; car li ignorance à l’orfelin, qui3 i vient par aage ne doit pas grever les creanciers, ne fere les orfelins gaagnier. Et de ce droit usons nos. {11} Et autresi dirons nos se aucunne chose est donnee ; car l’en ne doit pas enquerre se ce est fet par le seu à celui qui la chose est donee, mes sanz plus se li creancier en sont grevé. ¶ Aucion devra estre donee contre ceux qui sanz lor porchaz ont receu franchise de celui qui n’avoit dont aquiter ses detes por tant comme il sont plus riches, et ne mie por plus. ¶ {12} Se uns sers a receu une chose sanz le seu son seignor, l’en demande se li sires est tenuz à rendre la. Et Labeo dit que il est tenuz à rendre tant comme il en est venu à lui, et ce qui en a esté mis en son besoing. Ce moismes doit l’en dire ou fiz qui est en bail. Mes se li sires le sot, il en sera trez en cause en son non. ¶ {13} Se li heirs necesseres a poié les lés, et si bien sont aprés venduz, Paulus dit que, ja soit ce que cil à qui li lés furent lessié, n’en sorent rien que ce fust fet par grever les creanciers ; neporquant profitable aucion sera donnee contre eus ; et ce n’est pas dote. ¶ {14} Ceste aucion dure un an, en quoi l’en puet pledier aprés ce que li marchiez est fez.

Ulpianus dit : li prevoz dit « tu rendes les choses que Tices fit par ton seu por cause de barater à celui à qui aucion puet apartenir de cele chose, se uns anz n’est passez puis que il i ot poer de pledier en ; et j'en devroi aucunne foiz, quant la cause sera coneue, aucion par le fet ». ¶ {1} Ce qui est fet por barater les creanciers est lors rapelez, quar li baraz est venuz et à escient, c’est à savoir se li creancier ont vendu les biens au deteur. Mes se li detes est aquitez à icex creanciers que il vost barater et il a [139vB] fet autres, ce qui fu vendu ne sera pas repelé ; et s’il poia la dete à cex que il ne vost pas barater des deners as autres que il vost barater, ce qui fu vendu sera rapelé. Selonc ceste distincion escrit li enpereres Sevoirs, et de ce droit usons nos. ¶ {2} Ce que li prevoz dit « par ton seu » doit estre issi entendu : se tu fus consachanz ou parçoniers dou barat ; quar se il savoit que il eust creanciers, ce ne sofist pas à fere que il soit tenuz par ceste aucion, mes se il fu parçoners do barat. ¶ {3} Se aucuns ne fu pas parçoners dou barat, mes li creancier à celui qui vendent ses choses li distrent bien que il ne les achetast pas, l’en demande, s’il les achete puis, savoir mon se il est tenuz par ceste aucion. Et il est mieuz que il i soit tenuz, car il n’est pas quités do barat desque il les acheta puis que li creancier li orent deffendu. {4} Mes s’il eust fet simplement marchié, ja sé ce que il seust bien que il avoit creanciers, neporquant, desque il n’en cedoit au barat, il n’est pas tenuz par ceste aucion. ¶ {5} Quant li prevoz dit donc « à ton seu », ce est au seu à celui qui est trez en cause par ceste aucion. Se cil qui a eu4 orfelin en garde fet marchié à celi detor et il set le barat, mes li orfelins ne le set pas, veons se ceste aucion a leu, si que la concience au deffendeor nuise à l’orfelin ; et autresi puet l’en demander ou procurator au forsené ou à celui qui a plus de .xiiii. anz. Et je croi que la concience as deffendeors et as procurators lor nuit en tant comme il en vint à ex. ¶ {6} Et por ce que l’en dit que ce qui est fet par barater les creanciers puet estre rapelé, l’en puet demander se il n’i a que un creancier, ou il en i a plusors, mes satisfacion est fete à toz fors à un, savoir mon se ceste aucion a leu. Et sanz dote ce est assez que ce soit fet par barater un des creanciers. ¶ {9} Se cil qui fist le barat a .i. heir et li bien à cel hoir sont vendu, ce n’est pas des biens don l’en plede ; et por ce n’a pas ceste aucion leu. ¶ {10} Se li fiz qui se poet atenir de l’eritage fist aucunne chose por barater les creanciers et il a enterine restitucion de ce que il s’est entremist, l’en doit dire que ceste aucion cesse. Autresi est il el serf qui est heirs necesseres. Mes Labeo dit que ce doit estre receu o tel distinction que se li creancier ont mointenant vendu les biens ou il en ont fet convenant et li heirs necesseres si est mellez, le barat à l’un et à l’autre soit rapelez, ce est cil au mort et cil à l’oir, se li creancier ne se sont tenu à l’oir necessere ou por useres ou por aucunne autre chose ; car lors ne doit l’en rapeler nules des choses que li morz estranga. ¶ {11} Se cil qui a moins de .xiiii. anz [140rA] est heirs son pere et li bien au mort sont vendu et departement des biens est enpetrez, li baraz à l’un et à l’autre est rapelez ; et autresi est il de celui au deffendeor ou au procureor. ¶ {12} Se mes detors me devoit poier une chose à un certein terme et il la poie orendroit à autre, l’en doit dire que ceste aucion a leu por le domage que je ai ; quar li prevoz entent que baraz puet estre fez ou terme. ¶ {14} Se une feme prist consoil de barater ses creanciers et ele quita à son mari por cause d’establir doere ce que il devoit, ceste aucion a leu ; et l’en puet demander toz les deners que sis mariz li devoit, ne la feme n’a pas aucion de doere, car doere ne doit pas estre establiz por grever les creanciers. Et ce est bien certeine chose et a sovent est establi. ¶ La fin de ceste aucion sera que la convenance qui estoit entre eus ainz que li baraz fut fez soit gardee tot enterinement ; {15} usaires puet estre demandez par ceste aucion. ¶ {16} Se je sui celui qui devoit à moi et à plusors autres qui s’enfuient et enportoit ses deners, et je li toli ce que il me devoit, la sentence Julien nos plest qui dit que il a moult grant difference se ce fu fet ainz que li creancier fussent mis en possession de ses biens ou aprés ; car se ce fu avant, ceste aucion cesse ; et se ce fu aprés, ele a leu se li bien sont baillié à aucun por cause de garder les franchises. {17} Selonc l’establissement au seint enpereor Marc, l’en doit dire que ceste aucion cesse. ¶ {18} Li anz qui est ostroiez à ceste aucion commoincera au jor de la vente. ¶ {19} Par ceste aucion doit estre vendue la chose o sa cause ; {20} et non pas tant solement li fruit que en ont esté receu, mes cil qui en peussent estre receu vienent en ceste aucion en tel meniere que li despens en sont avant pris ; car cil qui a la chose n’est pas contrainz par le juige de rendre la devant que il ait les necesseres despens que il i a fet. Autresi doit l’en dire se uns autres i a fet despens par la volenté à plege ou as creanciers. {21} Je croi que li enfant à serves vienent en ceste aucion ; et ce est voirs. ¶ {22} L’en doit savoir generaument que il convient fere par ceste aucion restitucion en l’encien estat, queque ce soit ou chose ou obligemenz, si que tot soit rapelé, autresi comme se une delivrance n’eust onques esté fete. Et por ce doit estre renduz li preuz que aucuns eust pas eté fete por tant que usures n’en soient pas poies, se eles ne furent mises en convenant, ou se li marchiez ne fu tex de quoi usures deussent estre donees. ¶ {23} Se obligemenz fu fez par condicion, il doit estre renduz o sa condicion se il fu fez au terme. ¶ {24} Ceste [140rB] aucion apartient aprés l’en de ce qui est venu aprés a leu à celui contre qui ele est meue ; car li prevoz dit que ce n’est pas droiz que cil mort en gaing qui reçoit gaing par barat ; et por ce li doit estre toluz li gainz. Se cil est donc baratierres à qui la chose est venue ou aucuns autres, ceste aucion apartient contre lui de ce qu'i est venuz à lui, ou qu'i a fet por sa tricherie que il n’est venuz à lui. ¶ {25} Ceste aucion apartient à toz les heirs, mes ele n’est pas donee contre les heirs.

Neporquant, Venulius et Cassius dient que ele doit estre donnee contre lui por tant comme il en vint à lui.

Marciaus dit : se li peres ostroie à son fiz qui est en son bail franche aministracion de son chetel, il n’apert pas que il li ostroit que il puisse estrangier ses choses por barater ses creanciers ; car il n’a pas poer de fere tel estrangement. Et s’il li ostroie que il face tel estrangement, il apert que il moismes le face, et les avenanz aucions soffirant contre lui ; car li creancier au fiz sont creancier au pere.

Paulus dit : cil qui tient gage n’est pas tenuz de ceste aucion, car il tient le gage par sa propre droiture et ne le porsiet pas por cause de garder la chose.

Ulpianus dit : par ceste aucion sont rapelees non pas tant solement les seignories mes les aucions. Et por ce apartient ceste aucion contre cex à qui aucion apartient por quiter les aucions. Et por ce, se aucuns commanda à Tyce que il receust ce que li baraterres li vendoit, il doit doner l’aucion de commandemant. Se li baraterres donna donc doere por sa fille qui bien le savoit, la fille est tenue à doner l’aucion de doere que ele a contre son mari.

Paulus dit : se aucuns doit à Tyce et il set bien que il n’a de quoi poier, et puis done en son testamant franchise à ses sers, et il s’aquite à Tyce et commoince à devoir à Senprorne, et il muert sanz müer le testamant, les franchises que il dona doivent estre fermes, ja sé ce que il n’eist en l’eritage de quoi paier les detes. ¶ Et se li creanciers que l’en voloit bareter ne fu pas baretez, le consoil ne fu pas pris contre celui qui fu baretez ; les franchises seront donc fermes.

Gaius dit : se li premiers creancier ne furent poié des deners as derreners.

Paulus dit : se li mariz quite à sa feme son gage, ou la feme à son mari, la sentence à cex est veroie, qui dient que cil dons n’est mis ; et se ce est fet por barater les creanciers, il sera rapelé par ceste aucion. Autresi est il se aucuns quite à son detor son gage por grever ses creanciers.

Cil moismes dit : li peres qui n’atandi pas [140vA] jusque à sa mort, ainz rendi à son fiz qui estoit heirs de sa poeté l’eritage sa mere sanz retenir en la quarte part, fist plene loiance et ne baratera pas ses creanciers.

Gaius dit : le detor qui rendi l’eritage par le consoil au senat, n’estraja pas por grever ses creanciers la partie que il en peust avoir retenue, ainz le fist loiaument.

Scevola dit : uns detors qui voloit barater ses creanciers fist marchié à son voisin des bonnes do champ que il avoit baillié en gages. L’en demande donc se cil qui acheta le champ dou creancier puet pledier des bonnes. Et la response est que selonc les choses qui sont proposees que por ce ne remoint il pas que il n’en puisse pledier que li detors en fist marchié sanz le seu à son creancier.