X. Que nule chose ne soit en voie ne en leu commun [rubr.]

Ulpians dit : li prevoz dit : « tu ne faces riens en leu commun, ne n’i metes nule chose de quoi domages viegne au leu, fors ce qui t’est ostroié par loi, ou par le consoil au senat, ou par benissement, ou par le juigement au prince. Je donroi entredit de ce qui sera fet ». ¶ {1} Cist benissemenz est de deffensse. {2} Et par lui porvoit l’en à communs profiz et à privez, car li leu commun servent au preu à chescun non pas comme propre à chescun. Et autretel droiture avons nos d’user en comme chescuns a de deffendre nos que nos n’en usons. Et por ce, se ovre est fete en leu commun, qui empeeche le privé profit, cil qui li fet puet estre trez en cause par entredit de deffense ; et por ce fut proposez cist entredit. {3} Labeo dit : comment li nons des communs leus doit estre pris, car il apartient [141vA] as places et as illes et as chans et as voies communes. {4} Je ne croi pas que cist autre dit apartienent as leus communs qui sont au patremoine l’enpereor, car nus bas hom n’i puet rien fere ne rien deffendre, car tex choses sont propres au princes. Se aucuns i fet donc aucunne chose, cist entrediz n’avra pas leu ; mes se aucuns plez en est meüz par aventure, li prevoz en sont juige. {5} Cist entrediz apartient donc à leus qui sont establi au commun usage ; si que se aucunne chose i est fete qui nuise à aucun bas home, li prevoz i mete consoil par son entredit. ¶ {6} Quant uns hom lieve une toile1 en haut qui nuit à la lumere son voisin, cist entrediz i a leu : « ne mest rien en leu commun par quoi tu nuisses à la lumere ton voisin ». {7} Se aucuns ne veust depecier ce que il a en commun leu, Aristo dit que cist entredit i a leu à fere li depecier. ¶ {8} Se aucuns gete une mole en la mer, cist entredit apartient à celui qui cele chose puet nuire ; et se nus n’i a domage, l’en garentist celui qui edefie ou rivage ou qui gite la mole en la mer. ¶ {9} L’en deffent à aucun que il ne peeche ou que il ne nage en la mer. Il n’avra pas cest entredit, autresi comme cil ne l’a pas à qui il est deffendu à joier en commun champ, ou à boigner soi en commun boign, ou à esgarder en commun tertre ; mes en toz cez quas puet l’en user d’aucion de torfet. ¶ {10} Li prevoz dit par droit de quoi domages viegne, car totes les foiz que l’en ostroie à fere aucunne chose en commun leu, ce est si que ele soit fete, sanz fere nul tort à nului. Et issi solent li prince ostroier quant l’en lor demande congié de fere aucunne novele ovre. {11} Il apert que l’en fet domage à celui à qui l’en tost son preu que il avoit dou leu commun. {12} Et por ce, se aucuns a moins de veüe ou plus estroite issue, cist entrediz a leu. {13} Se j’edefice en leu commun, que les choses qui de ma terre venoient en la toe sanz droiture que tu i eusses il lessent à venir, Labeo dit que je ne sui pas tenuz par cest entredit. {14} Mes se cil edefiemenz fet que ta meson n’eit moins de lumere, li entrediz a leu. {15} Cil moismes dit : se je edefie en commun leu et cil edefiemenz nuit à celui que tu avoies fet en commun leu, li entrediz cesse ; car tu avoies edefié contre droit, se ce n’estoit en droiture qu’i te fust ostroié. ¶ {16} Se aucuns a eu dou prince que il puisse edefier en commun leu, l’en ne do[141vB]it pas croire que il puisse edefier si que il face domage à autre. ¶ {17} Se aucuns a edefié en leu commun et nus ne li a deffendu, il ne doit pas estre contrainz d’oster l’edefiement que la cité n’en soit enledie ; et por ce que cist entrediz est de deffensse et ne mie de restitucion ; neporquant, se cist edefiemenz nuist au commun usage, cil qui s’entremet des communes ovres les devra oster ; et s’il ne nuist, il devra establir rente desus ; {18} et totes ces choses doivent estre gardees as hoirs. ¶ {19} Il est autrement des seinz leus ; car il ne nos est pas deveé tant solement que nos n’i façons ovre, ainz nos est commandé que nos depeçons cele que nos i avons fete et ce est por la religion dou leu. ¶ {20} Li prevoz dit : « je deffent que nule chose ne soit fete ne mise en commune voie par quoi ele soit pire ». {21} Nos apelon « voie commune » cele qui est en commune terre. Il n’est pas autresi en commune voie comme en privee, car la terre où la privee voie est autrui, et nos avon tant solement la droiture d’aler et de venir parmi ; mes la terre de la voie commune est commune et est bonnee à certeines bonnes de lese par celui qui ot poer d’acoutumer la quant ele fut mesuree. ¶ {22} Les unes des voies sont communes et les autres privees et les autres champetres. Nos apelons communes voies les chemins roiaus ; les voies privees sont celes que nos avons par autrui chans ; les champetres sont par quoi nos alons en noz chans. ¶ {23} Voies privees puent estre prises en .ii. manieres ; car ce sont celes que nos savons parmi le champ à nostre voisin à aler en un autre, ou celes par quoi tuit puent aler, qui s’asenblent à la voie commune ou qui vont as viles. Je croi donc que icestes puissent estre apelees voies communes. {24-25} Cist entrediz apartienent as voies des chans tant solement et ne mie à cex de citez ; les cures de cez voies apartienent as metres, que eles ne soient encombrees ne estrecies. ¶ {26} Se aucuns fet en voie commune chambre coie, par quoi la voie ne soit pas si honeste à aler comme ele estoit devant, Labeo escrit que il est tenuz par cest benissement. {27} Et se aucuns fet en un champ fosse, où l’eve s’asenble, qui core en la voie commune, il sera tenuz de cest benissement ; car il a2 mis en la voie commune tel chose qui nuist. ¶ {28} Labeo dit : se aucuns edefice en sa terre si que l’eve s’asenble et soronde en la voie commune, il n’est pas tenuz par ce benissement ; car il n’i a envoié pas [142rA] l’eve, mes il ne la reçoit pas ; mes Nerva escrit mieuz que li uns et li autres i est tenuz. Se uns chans est joignanz à une voie commune et l’eve qui en cort enpire la voie, et cele eve vient en ton champ de celui à ton voisin et il te convient à force recevoir la, li entredit avra leu contre ton voisin ; mes s’il ne convenoit pas que tu les receusses, tis voisins n’i est pas tenuz, mes tu i es tenuz, car il apert que cil a fet le fet qui a l’usage de l’eve. ¶ Nerva escrit que se l’en plede à toi par antredit, tu ne doiz estre contrainz fors que tu pledes à ton voisin par le juigement à lui moismes qui plede à toi. ¶ {29} Il moismes dit que se li leus est mauvés par odor tant solement, l’en ne puet par cele chose user de cel entredit. ¶ {30} Cist entredit a leu as choses qui sont peues en voies communes et enpirent la voie. ¶ {31} Li prevoz dit : « de que la voie soit pire », c’est se ele en enpire mointenant ou enprés ; car aucunnes choses sont qui nuisent mointenant comme eles sont fetes, et aucunnes qui ne nuissent point quant eles sont fetes mes eles nuisent aprés. {32} L’en entent que voie est enpoirie se li usages de passer i est corrumpuz. Si comme s’ele estoit avant pleine et ele est or bone ; ou ele estoit soeve, ore est apres ; ou ele estoit lee, or est aprés estroite. {33} L’en demande s’il loist à fere en voie commune une fosse et un pont par dessus . Et plusors dient que cil qui ce fet en est tenuz par cest entredit, car il ne convient pas que il enpiert la voie. {34} Cist entrediz est pardurables et communs, et condempnemnz en doit estre fez de tant comme li demanderres i a de deperz. {35} Li prevoz dit : oste ce que as fet ou mis en commune voie ou en commun chemin par quoi la voie ou li chemins est enpoiriez. {36} Cist benissement use3 de cele moisme cause de quoi cil devant, ‹il› vient de restitucion et li autres est de deffense. {37} Par cest entredit est tenuz non pas cil qui a fet aucunne chose en voie commune, mes cil qui li a. Et por ce, se uns fist la chose et li autres l’a, cil qui l’a est tenuz par cest entredit ; et c'est droiz, car cil qui li a la puet oster. {38} Nos dison que cil l’a qui en est en possession comment que il soit, et s’il fist l’ovre, ou s’il l’aquist par cause d’achast ou de loage, ou par lés ou par heritage ou par autre maniere. {39} Et por ce quide Offilius que cil qui a guerpi la chose que il fist en la voie commune par quoi li usages en est corrumpuz, n’est pas tenuz par cest entredit, car il n’a pas ce que il fist. Mes voions se aucion doit estre [142rB] donnee contre lui ; et je croi que li entrediz a leu contre por fere li oster ce que il fist en la voie commune. ¶ {40} Se uns arbres chiet de ton champ en la voie commune et si anconbre la voie, et tu le lesses autresi comme s’il ne fust pas tiens, Labeo escrit que tu n’es pas tenuz par cest entredit. Neporquant, se cil qui se pleint est apareilliez d’oster l’arbre à ses despens, et tu li deffenz, il puet pledier à toi par l’entredit de voie commune. Et se tu n’avoies pas guerpi l’arbre, tu es tenuz par cest entredit. {41} Labeo escrit que se mis voisins enpoire la voie commune par son vice, ja sé ce que l’ovre que il a fete soit profitable à moi et à lui, neporquant s’il ne la fist fors por eise de son champ, je ne puis pas estre trez en cause par cest entredit ; et se nos feimes fere l’ovre communement, nos i somes tenu ambedui. ¶ {42} Cist entrediz a leu contre celui qui a fet par tricherie que il ne porsiet pas l’ovre que il fist ; car cil qui porsiet et cil qui a fet par ticherie que il porsiet pas sont d’une moisme condicion ; et il me senble que la sentence Labeo est veroie. ¶ {43} Li prevoz dit : « oste la » ; il apert que cil oste la chose qui ramoine le leu en celui moisme estat, c’est à savoir en son encien estat, et ce est fet quant aucuns oste à son despens. Car se cil qui l’en plede par cest entredit fist l’ovre, ou uns autres la fist par son commandemant ou la conferma quant ele fut fete, il la doit oster à ses despens. Et s’il n’i ot nules de cex choses mes il porsiet la chose, il ne convient fors que il sofre que ele soit ostee. {44} L’en doit savoir que cist entrediz n’est pas temporés, car il apartient au commun profit ; li condempnemenz qui en est fez, de tant comme cil qui se pleint eust de preu se l’ovre fust ostee. ¶ {45} Li prevoz dit : « je deffant que force ne soit fete que il ne loise à aler par commune voie et par commun chemin ».

Celsus dit : se juiges que li rivages en quoi li pueples de Rome a commandemant sont au puple. {1} Li usages de la mer est communs à toz homes, autresi comme cil de l’air, et li pilier que aucuns i giete sont à celui qui les i giete ; mes ce ne doit pas ostroier se li usages de la rive de la mer en puet estre enpiriez.

Scevola dit : il leust bien par le droit as genz à edefier en la rive de la mer, se li communs usages n’en fust enpechiez.

Paulus dit : se li ruisiaus d’eve est meuz par commun leu et il nuit à un des voisins, li voisins avra aucion par la loi de .xii. tables.

Juliens dit : cil qui plede par entredit que nule chose [142vA] ne soit fete en leu commun par quoi domages li viegne, puet establir procurator, ja sé ce que il plede de leu commun.

Cil moismes dit : autresi comme cil qui edefie en commun leu, à qui nus ne le deffent, ne doit pas estre contrainz de depecier l’ovre que la citez n’en soit enledie ; autresi doit il oster l’edefiement que il a fet contre le banissement au prevost, autrement ne vaudroit il rien le commandemanz au prevost.