XIX. De chambres coies [rubr.]

Ulpians dit : li prevoz dit : « je deffant que force ne soit fete à celui qui a chembre coie joignant à ta meson que il ne la purge et reface. Et je commanderoi que il doit caucion que domages ne te vendra de cele ouvre ». ¶ {1} Li prevoz i mist .ii. entrediz en ce tytre : l’un de deffensse et l’autre de restitucion. {2} Li prevoz vost par le premier entredit, qui est de defensse, que les chambres coies fussent purgies et refetes. Et l’une chose et l’autre apartient au preu et à la garde des citez ; car se les chambres coies n’estoient purgees et refetes, li airs seroit corrompuz et les mesons cherroient. ¶ {3} Cist entrediz fut proposez des chambres coies qui sont propres à aucun et ne mie des communes, car les communes apartienent à la commune cure. {4} Chambre coie est uns leus chevez où l’en va as requestes de nature, par quoi il cort aucun po d’eve par de soz terre. ¶ {5} Cist entrediz qui est premierement proposez est de deffense, par quoi est deffendu as voisins que il ne facent force que les chambres coies ne soient purgies et refetes. {6} Par non de chambre coie est contenu et la fosse et li conduiz. {7} Et por ce que li raparoillemenz et li purgemenz des chambres coies apartient au commun profit, ne fist pas li prevoz an cest entredit mencion de ce de quoi l’en use par force ou en repost, ou par enprunt ; car se aucuns en usa en une de cez manieres, por ce ne li defende pas à purgier ou à refere les chambres coies. ¶ {8} Li prevoz dit : « joignant à ta meson » ; l’en doit ci entendre par le non de meson tot l’edefiement. Et Labeo cuide que cist antrediz ait leu se il i a pla[148vB]ce vuide d’une part et d’autre de sa meson, ou se chambre ‹c›oie est menee d’edefiement de cité ou champ qui est delez. {11} Cist entrediz apartient non mie tant solement contre le prochein voisin, mes contre toz cez par qui terre li conduz de sa chambre coie est. {12} Et por ce dit Mela que cist entrediz fet que il puet venir en la meson son voisin et depecer le pavement por curer le conduit de sa chambre coie. Et l’en ne li puet deffendre se il est apareilliez de refere ce que il depecie par ceste cause. {13} Se je purge ma chambre coie ou ge la faz, et aucuns me denonce novele ovre, l’en dit par droit que ge puis despire le denoncement et parfere ce que je avoie commoincié. {14} Mes que ge li doigne caucion que domages ne li vendra par cele ovre ; car il est ostroié à porgier chembres coies et refere les, si que l’en ne face pas domages as mesons son voisin. ¶ {15} Li prevoz dit aprés : « se tu as fet ou mis aucunne chose en la chembre coie qui est en commun leu par quoi li usages en soit enpiriez, ele soit restablie ; et ge deffende que nule chose n’i soit fete ne mise ». ¶ {16} Cist entrediz apartient as chambres coies qui sont en commun, que rien n'i soit mise ne fete par quoi li usages en soit enpiriez.

Henulcius dit : ja soit ce que cist entrediz parole de refere chambre coie et ne mie de fere la nove, neporquant Labeo dit que l’en doit deffendre que force ne soit fete à celui qui la fet nove, car c’est cil moismes profiz. Li prevoz volt que il fust deffendu que force ne fust fete à celui qui vodroit fere chambre coie en leu commun. Et Offilius et Trebaces distrent que l’en doit ostroier à chescun que il purge et reface chembre coie ; mes nus ne la face nove sanz l’otroi à celui qui a la cure des communes voies.