XIII. Que nule [142vB] chose ne soit fete en commun flueve par quoi l’eve corre autrement que ele corroit en l’esté d’avant [rubr.]

Ulpianus dit : je deffant que nule chose ne soit fete, ne que ne nuise en commun flueve ne en sa rive par quoi l’eve core autrement que en l’estat d’avant. ¶ Tot est dou flueve par la où il s’estent ou tens que il est plus granz an l’an sanz issir de chenel. {1} Li prevoz porvit par cest entredit que li fluves ne soient pas desrivé qui ne sont pas ostroié, ou que li chenex ne soit muez en maniere que il face à voisin aucun tort. ¶ {2} Il apartient donc as fluves communs qui portent navie, ou qui n’en portent point. {3} Li prevoz dit : « por quoi l’eve core autrement que ele ne fist en l’esté devant ». Tuit cil qui i sont donc, ou metent aucunne chose, n’i sont pas tenu, mes cil qui fet que l’eve core autrement. Ce qui dit que ele core autrement n’apartient pas à la quantité de l’eve corant, ainz doit estre raporté à la meniere et1 à la roideur do cors. ¶ Et l’en doit dire generaument que aucuns est tenuz par cest entredit se li cors de l’eve est muez par ce que il a fet, si comme se l’eve est abessie ou estrecie par quoi ele est fete plus roide, et fet domage as coitiveors qui sont environ. Et se li voisin ont aucun domage par son fet, cist entrediz avra leu. {4} Se aucuns veust movoir eve à descovert dou ruissel qui est coverz, ou par covert de celui qui est descoverz, il est tenuz par cest entredit, se li fez fet domage au coitiveors qui sont environ ; {5} et autresi s’il mue le chenel, il seré tenuz par cest entredit. {6} Aucuns sont qui cuident que cist entrediz n’aist pas leu quant aucunne chose est fete por garnir la rive ; si que se aucuns fet chose par quoi l’eve core autrement, s’il le fet por garnir la rive, cest entredit n’ait pas leu. Mes aucuns sont à qui ce ne plet pas, quar les rives ne doivent pas estre garnies o le domage as coitiveors. Neporquant, nos usons de ce droit que li juiges doit juigier se il doit doner ceste excepcion ; car profiz amoneste aucunne foiz que ele soit donnee s’il a aucun profit en ce que aucuns a fet ou commun flueve. Quar se li flueves li fet grant domage et li gaste ses chans, et il amoncele la terre ou fet aucunne autre garnison por garentir ses chans, et cele chose mue le cors de l’eve por quoi ne li donroit l’en consoil, je soit ce que plusors ont deu tot torné les flueves et mué les chenex de ses chans, il convient donc que l’en regart au profit à cex qui ce font sanz le domage as coitiveors [143rA]. ¶ {8} Cist est tenuz par cest entredit qui fet eve core autrement que ele ne corut en l’estat devant. Il dient que por ce prist li prevoz l’estre devant, car l’en voit plus certeinement le naturel cors de l’eve en esté que en iver ; et si parla de l’esté devant2, et ne mie de celui d’aprés, car l’en est plus certein dou tens qui est passez que de celui est à venir. {9} Cest entrediz apartient à chescun, mes il n’apartient pas contre toz, mes contre celui qui fist que l’eve corust autrement que ele ne devoit et n’avoit pas droiture de fere la. ¶ {10} Cist entrediz apartient contre les hoirs. ¶ {11} Li prevoz dit aprés : « se tu as aucunne chose fete ou mise en commun flueve ou an sa rive, se l’eve cort par ce autrement que ele ne corut en l’esté devant, tu les restablisses ». {12} Cist entrediz est de restitucion et cil devant est de defense et apartient as choses qui ne sont encore pas fetes. Se aucunne chose a esté fete, ele sera restablie par cest entredit ; mes se l’en veust proier que aucunne chose ne soit fete, il convindra user de l’entredit devant. Et se aucunne chose est fete puis que li entrediz devant sera renduz, ele sera depecie par cest entredit de restitucion. {13} En cest entredit vient, si comme Labeo dit, ce que aucuns a lessié par tricherie à porsoer.

Ulpianus dit : li prevoz dit : « je deffant que force ne soit fete que chescun ne puisse mener parmi le flueve sa nef, grant ou petite, et charger la, ou deschergier en la rive. Et je commanderoi que il loise à nagier par lac et fossé et par estanc commun ». ¶ {1} Il est porveu par ce bannissement que l’en ne deffende pas à nagier par commun flueve ; autresi comme uns entrediz est proposez devant que l’en ne deffende à nul à user de voie commune. {2} Mes se li estans ou li lac est privez, li entrediz cesse. {3} L’en apele lac où il a toz jorz eve, {4} et estanc où il en a aucunne foiz et aucunne foiz n’en i a point, et l’eve s’i assenble en iver ; {5} fossé est aperz recetemenz d’eve ; {6} et ces choses puent bien estre communes. ¶ {7} Se l’en deffant à celui qui a aloé lac ou estanc que il n’i peeche, Sabins et Labeo dient que cist entrediz li vaut. Se il a donc aloé d’aucunne commune, il est droiz que il ait cest entredit.