XII. De voie commune et que rien n’i soit fet1 [rubr.]

Paulus dit : il seust estre ostroié que ymages et senblances qui puent valoir à aornement soient mises en leu commun.

Ulpianus dit : li prevoz dit : « je deffant que force ne soit fete à celui qui veust ovrir et fere commune voie et commun chemin, par quoi la voie ou li chemins n’en soit pirés ». ¶ {1} « Ovrir voie » est ramener la à la lese et à la hautece que ele ot ancienement ; et « purgiers » est une partie de refere la, car l’en apele proprement « purgier » delivrer la si comme ele fu encienement et oster en ce qu’i i nuist. Cil qui l’ovre donc et cil qui la porge la refet, et tuit cil qui la remoinent en l’ancien estat. ¶ {2} Se aucuns enpire la voie por coverture de refere la, force li puet estre fete quitement ; et por ce, la voie ne puet pas estre fete plus lee2 ne plus longue, ‹ne plus haute› ou plus basse par non de refere la, ne paver la se ele ‹ne› fu pavee. ¶ {3} Cist entredit sera donz pardurablement à toz et contre toz ; et li condemnement est de tant comme cil qui se pleint i a de domages.

‹I›abolenus dit : la voie qui est commune à toz ne puet pas estre perdue por ce se l’en lesse au seren.

Paulus dit : se aucuns bote la voie commune au champ à son voisin, aucion en sera donnee contre lui por tant comme cil i a de domage sus qui champ la voie est botee. {1} Cil qui ere commune voie est contrainz de remaner la en son estat.