XXI. De quiter denoncement d’ovre [rubr.]

Ulpians dit : li prevoz dit : se il est denoncié à aucun que il ne face une ovre, li denoncemenz vaut ; mes se il est quitez, cil puet fere l’ovre. {1} Les quitences sont proposees soz cest tytre. {2} Et les paroles au prevost mostrent que quitence puet estre fete la où li denoncemenz valut ; et s’il velt que li denoncemenz vaille la où cil qui denonça que l’ovre ne fust fete ot droiture de defendre la, que ele ne fust fete malgrié suen. Et se caucion est donee, ou ele n’est pas donee, la quitence qui est fete abat ce tant solement en quoi li denoncemenz ne fut pas tenables. ¶ Mes se caucion est donee, il n’est pas besoinz de quitence. ¶ {3} Cil a droiture de denoncier que l’ovre ne soit pas fete qui a la seignorie dou leu, ou cil à qui il doit servise. {4} Il plet à Julian que cil qui a l’usaire d’un champ puisse chalongier les servises qui sont deu au champ ; et selonc ce, puet il denoncier à son voisin que il ne face ovre par quoi il perde les servises ; et lors, i porra quitence valoir. Mes se il le denonce au seignor, autresi comme maire(?) do champ, quitence n’i vaudra rien, car il ne puet pas pledier contre le seignor. Autresi comme un de ses voisins que il ne puisse edifier plus haut malgré suen ; mes se li usaires en enpiret, il le devra demander. Juliens dit ce maisme des autres à qui lor voisin doivent aucun servise. {5} Et il n’est pas torz que cil qui a pris un champ en gages puisse denoncier que ovre n’i soit fete.