VII. D’aporter avant les tables dou testamant [rubr.]

[140vB] Ulpianus dit : li prevoz dit : se les tables que Tices fist qui apartiennent à son testamant sont en ta meson, ou tu as fet par tricherie que eles n’i sont pas, aporte les avant. Et s’il i a par aventure li baillie ou autre escrit, il est conquis par ce banissement. ¶ {1} Se aucuns reconoit que li testamanz soit en sa garde, l’en li doit commander que il l’aport‹e› avant, se il ne le puet tantost mostrer. Et se il dit que il ne le convient pas à porter avant, cil entredit apartient contre lui. ¶ {2} Cist entredit apartient non pas tant solement à tables dou testamant mes à totes les choses qui apertienent à la cause dou testamant, si comme es lés comment que i sont. {3} Ou se li testamanz vaut ou se il ne vaut rien dés le commoincement, ou se il est roz ou s’il i a aucun autre vice, ou se l’en dit que il est faus, ou se cil le fist qui n’avoit pas poer de fere testamant, l’en doit dire que li entrediz a leu. ¶ {5} L’en doit donc dire que li entrediz apartient à cete escriture de testamant qui est perfete ou qui n’est pas perfete. {6} Et por ce, se il i a plusors tables à celui qui fist sovant testamant, l’en doit dire que cist entredit a leu. ¶ Se l’en dit que cil qui fist le testamant estoit ou bail son pere ou que il estoit sers, li testamanz sera aportez avant. ¶ {7} Se li fiz qui est au bail fist testamant de chetel qui fu conquis par chevalerie, li entrediz a leu. {9} Autresi est il se cil qui fist le testamant morut entre ses enemis. ¶ {10} Cist entrediz n’apartient pas à tables à celui qui est encore vis, quar les paroles au prevost firent mencion dou mort. ¶ {11} Et se testamanz est effaciez par tricherie {*43.5.2}, ou toz ou en partie, {*43.5.3} cist entrediz a leu. ¶ {1} Se li testamanz ‹est› escriz en plusors escroes, eles sont contenues en cest entredit ; car ce n’est que uns testamanz. ¶ {2} Se Tices bailla à aucun en garde les tables d’un testamant, l’en en doit pledier par cest entredit et o celui qui les tient et o celui qui les bailla en garde. ¶ {3} Et por ce, se uns notoires reçut la garde des tables, il est tenuz par cest entredit. ¶ {4} Se les tables sont en la garde à un serf, ses sires est tenuz par cest entredit. ¶ {5} Se cil moismes qui fist le testamant dit que aucuns a ses tables et il vieust que eles soient apertees avant, cist entrediz n’avra pas leu ; mes il porra pledier por fere les venir avant et de chalongier les. Autresi dit l’en en toz cex qui dient que instromenz sont leur. ¶ {6} Se [141rA] aucuns a fet par tricherie que il n’a pas les tables, por ce ne remoint pas que il ne soit tenuz par cest entredit ; quar por ce que il a fet greignor desloiauté ne puet il pas retenir les tables quitement ; quar, quant il les avra aportees avant, sa desloiauté sera descoverte, et il se puet bien garder de choer en cet mesfet par tricherie se il ne cele pas les tables ne il ne les bailla pas à autre. Mes s’il ne les bailla pas à autre par pensee de celer les, mes que il ne les mostrat pas à celui qui les demandoit, cist entredit a leu. ¶ {7} Cist entrediz est de fere aporter les tables avant. Veons donc que est aporter avant. ¶ {8} « Aporter avant » si est que l’en puisse savoir que il a dedanz. {9} Il les convient mostrer par devant le prevost, si que cil qui les seeleront soient semons par s’autorité, et li juigemenz et li tesmoinz reconoist lor soiaus. Et se il n’i volent venir par aventure, Labeo escrit que li prevoz les en doit contraindre. ¶ {10} Tuit cil à qui aucunne chose est deue par le testamant solent requerre que les tables soient aportees avant. ¶ {11} Le condempnemenz de ce juigement doit estre proisiez à tant comme il i a de depart. {12} Et por ce, se cil qui est fez hores plede par cest entredit, li condempnemenz doit estre raportez à l’eritage. {13} Et se lés li est deuz, li condempnemenz doit estre de tant comme li lés vaut. {14} Et se li lés fut lessiez soz condicion, l’en doit proisier autresi comme se la condicion fust acomplie. Et cil à qui li condempnemenz est poiez ne doit pas estre contrainz de doner caucion de rendre se la condicion n’avint ; car c’est la poine de costumance1 que cil poie qui n’aporte pas les tables avant. {15} Et por ce demande l’en se cil à qui li lés fu lessiez a eu le commadement et il demande puis le lés, savoir mon se il doit estre oïz. Et je croi se li hoirs li a poié, il doit estre mis arriere par excepcion de tricherie. Et se uns autres l’a poié, il ne doit pas estre mis arriere. Et por ce, se li heirs a pledié par l’entredit et il a eu le condempnement, l’en doit tenir cete distinction. ¶ {16} Il est certeine chose que cist entrediz apartient aprés un an ; {17} et si apartient à toz les heirs.

Paulus dit : les tables do testamant estoient en la garde de un orfelin et eles i ont lessié à estre par la tricherie à son deffendeor, li entredit apartient contre le deffendeor, car il est droiz que il soit tenuz par son mesfet, et ne mie li orfelins.

Jabolenus dit : il ne convient pas de l’entredit d’aporter les tables avant se l’en plede [141rB] de l’eritage ; mes se il convient fere commune enqueste, eles doivent estre mises en garde en une sainte meson ou baillies à un prodomme.