XX. De ce qui est fet par force ou en repost [rubr.]

Ulpianus dit : li prevoz dit : « tu restablisses ce qui a esté fet par force ou en repost de quoi l’en puet pledier ». {1} Cist entrediz est de restitucion par quoi l’en vet contre la male voisdie à cez qui font aucunne chose par force ou en repost ; car il leur est commandé que il les restablissent. {2} Et il a po de difference quant à ce, se cil qui la fit ot droiture de fere la ou non ; car il deust deffendre sa droiture et ne mie fere tort. ¶ {3} L’en demande se cil contre qui l’en use de cest entredit se puet deffendre par excepcion de ce que il a fet l’ovre que il poet fere par droit. Et il est melz que il ne s’en puisse pas deffendre ; car contre force et contre ce qui est fet en repost ne puet nus avoir droite excepcion. ¶ {4} Cist entrediz apartient à iceles ovres tant solement qui sont fetes en terres par force ou en [149rA] repost. {5} Veons quel chose est fete par force ou en repost. Quintus Mutius escrit que il apert que c’est fet par force que aucuns fet sur deffense ; et il senble que ceste diffinicion est veroie. {6} Se aucuns avoit une petite pierre mis en commoincier un mur, et il li fut deffendu que il ne le feist, et il ne lessa pas por ce à fere, Pedius et Pomponius dient que il senble que il fet à force ; et de ce droit usons nos. {7} Et se aucuns fet venir otre le denoncement qui li a esté fet, Cassius et Trebaces dient ce meisme ; et ce est voirs. {8} Et Aristo dit que cil fet par force qui savoit bien que l’en li poet deffendre la chose et engigna par force que ele ne li puet estre deffendue. {9} Et Labeo dit que se ge deffant à celui qui fet une chose que il ne la face, et il la lesse tant tost, et aprés recommoince à fere la, il senble que il face force se il ne fet par mon commendement ou par aucunne autre cause. ¶ {10} Se aucuns est enpeechiez par maladie, ou il ne velt pas contreiter son aversere, et il ne vient pas deffendre li ce que il fet, il n’apert pas que ses averseres face force ; et issi escrit Labeo. {11} Cil moismes dit que se tu voloies venir deffendre moi ce que ge fesoie, et aucuns te destient o armes sanz ma tricherie et sanz mon pechié, il n’apert pas que je face force.

Renulcius dit : que il ne soit en autrui poeté à empoirier ma condicion sanz ma colpe.

Ulpians dit : il convient pas que aucuns deffende par lui meismes. Mes se aucuns deffant par son serf ou par son procurator, il senble que il deffende par droit ; autresi est il se cil que ge ai aloé le deffant de par moi. Ne nus ne soit meüz par force por ce que aucion ne puet pas estre aquise par franche persone ; car ceste deffense mostre que tu fes force, et ce n’est pas mervoille, car se tu feisses force en repost si eusse ge aucion contre toi. L’aucion donc m’est aquise par ton mesfet que par le fet à autre. {1} Et l’en doit savoir que il ne convient pas toz jorz deffendre l’ovre mes une foiz. {2} Et se cil qui use de l’entredit otroie à fere l’ovre, cil qui la fist se porra bien deffendre par excepcion. {3} Et l’en doit dire quele excepcion a leu, non pas tant solement se il l’ostroia, mes ses procurators ou cil qui l’a en garde qui amenistre ses choses. {4} Et se li prevoz ou li procurators à la chose commune otroie que aucunne chose soit fete en leu commun, Nerva escrit que la excepcion n’a pas leu ; car se la garde des communs leus li est ostroié, il ne li est pas por ce otroié à doner congié de ce fere. Mes se li princes [149rB] la ostroie, ou cil à qui il a doné poer de otroier le, le excepcion avra leu. ¶ {5} Se aucuns est apareilliez de deffendre soi en juigement contre cez qui li deffent que il ne face l’ovre, l’en demande se il senble que il li est à fere l’ovre. Et ge croi que oïl, que se il offre caucion et il est apareilliez de deffendre soi se aucuns velt pledier à lui ; et issint escrit Sabins. {6} Se aucuns velt doner caucion que domages ne vendra pas de l’ovre que l’en li deffant que il ne face por ce que il ne voloit soi deffendre ou que il ne donoit pas caucion, l’en doit dire que il lesse à fere par force. ¶ {7} Cassius dit que il senble que cil fet en repost qui lesse à son aversere ce que il fet et ne li denonce pas por ce que il dote ou doit doter que il ne move plet contre lui. {8} Et Aristo dit que cil fet par force qui a corage de celer soi vers celui que il cuide qu’i li defendist.

Renulcius : Hermus dist que cil fet en repost qui doit savoir que ses aversere li movroist plet se il le savoit ; car il ne doit pas suivre s’opinion que li fol ne soient de meillor condicion que li sage.

Ulpianus dit : il fet par force qui fet autrement que il ne denonce, ou qui deçoit celui qui li poeist veer, ou qui li denonce en tel point que il siet bien que il ne le pot deffendre, ou qui li denonce si à tort que il ne li puet pas deffendre devant que la chose soit parfete. ¶ {1} Se aucuns denonce que il velt fere aucunne ovre, se il la fet aprés ce que il la denonce à son aversere, l’en ne puet pas toz jorz dire que il ne la fet pas en repost ; car il doit comprendre ou denoncement le jor et l’ovre, et où il velt fere l’ovre et quele ele sera, ne il ne doit pas denoncier le oscurement, ne atendre tant que ses averseires ne li puisse deffendre. {2} Et se li averseires n’est pas ou païs, ne il n’a pas atendu par tricherie tant que il en soit hors, se cil n’a nul ami à qui il le puisse noncier, il le doit denoncier ou à son procurator ou à sa meson. {3} Et Servius dist que il sofist à la feme que ele le denonce à son mari que ele velt fere ovre ou que ele le face par son sen, ja soit ce que c’est assez que ele n’a pas corage de celer li. {4} Et se aucuns velt fere ovre en commun leu, il li soffist que il le denonce au procurator de la chose commune. {5} Et se aucuns cuide que li leus soit tuens, qui est miens, et il li fet ovre par corage de celer le à toi, et ne mie à moi, je puis user de cest entredit. {6} Et se il le fet par cause de celer le à mon serf ou à mon procurator, je [149vA] puis user de cest entredit. ¶ {7} Se aucuns denonça que il voloit fere une uvre et il li fut deffendu que il ne la feist et il la fet, je croi que l’en puet prover que il la fet par force. {8} Cez paroles « ce qui est fet par force ou en repost » sont issi entendues si comme Mucius dit : se tu ou aucuns des tuens la fist, ou ele est fete par ton commandemant. {9} Et Labeo dit que plusors persones sunt contenues par cez paroles ; car il cuide que li heir à cez que Nucius nome i soient contenuz. {10} Il moismes dit que l’en puet user de cest entredit contre totes manieres de procurators ; convient que il facent l’ovre ou en lor non ou en l’autrui. ¶ {11} Se mes sers a fet aucunne chose, l’en ne pledera pas o moi se il ne l’a fete en mon non ou ou sien. Et se ge ai ton serf par loage et il fet aucunne chose en mon non, l’en n’en pledera pas à toi mes à moi par qui commandemant ou en qui non il fit ce que il fit. {12} Et autresi, se aucunne chose est fete par le commandemant à aucun, l’en en pledera pas à celui qui la fist, mes à celui par qui commandemant ele fut fete. Et se aucuns procurators commande que une chose soit fete ou non son seignor, l’en n’en pledera pas à celui qui le commanda que ele fust fete mes à celui en qui non ele fut fete. Et se je te commandoi que tu feisses fere une ovre et tu la feist fere, l’aucion sera contre moi et non pas contre toi. {13} Mes por ce que li prevost dist issi : « ce qui est fet par force ou en repost », et ne dit pas ce que tu fois mes ce que il fist, ¶ Labeo dit que il s’estant à plusors persones que à celes que nos avons nomees. {14} Et de ce droit usons nos, que ge fis la chose ou ge commandoi que ele fust fete, je sui tenuz par l’entredit de ce qui est fet par force ou en repost.

Paulus dit : se ge te commant à fere une novele ovre et tu commandes à un autre que il la face en ton ‹non›, l’en ne puet pas dire que ele soit fete par mon commandemant. Tu es donc tenuz par cest entredit et cil qui la fist. Voions donc se ge sui tenuz ; et il est droiz que ge, qui sui la premiere cause de fere la chose, i soie tenuz. Mes se li uns de nos fet satisfacion, li autre sont delivre.

Ulpianus dit : se uns de mes sers fet malgré mie novele ovre ou en repost, ge ne sui tenuz fors à tant que ge soffre que l’ovre soit depecee. {1} Et Neraces escrit [149vB] que se uns sers a fet une ovre par force ou en repost, ses sires doit par cest entredit depecier l’ovre à ses despens ou soffrir que ele soit depecee. Et cil qui a acheté puet estre trez en cause par cest entredit por poier les despenses que l’ovre te costera à depecier ou por abandoner le serf à soffrir poine. Et se cil qui vendi le serf depiece l’ovre à ses despenses, ou il est condempnz por ce que il ne la depiece pas, li acheteres est delivrés. Et encontre ce, se cil qui a acheté le serf depiece l’ovre ou il est condempnz à la valor dou plet, li entrediz n’a pas leu contre le seignor de l’ovre ; mes il est delivrés autresi bien comme se ill eust abandoné le serf à sofrir poine. ¶ {2} Julians dit que cil qui fet ovre ainz que la deffensse que li fut fete li soit quitee, il est tenuz par dos entrediz : li uns est denoncemenz de novele ovre, et li autres de ce qui est fet par force ou en repost. Mes se la deffense est quitee, l’en ne puet pas entendre que il face par force ou en repost, ja soit ce que il li fust deffendu ; il loet à celui qui done caucion d’estre à droit que il edefit, car par ce est il en possession. Et jé soit ce que il li fut deffendu que il ne feist pas l’ovre, neporquant l’en ne doit pas dire que il loit fete en repost, ne avant que la deffensse soit quitee, ne aprés ; car l’en ne puet pas dire que l’ovre fust celee à celui qui denonça que ele ne fust fete, ne il ne fut pas devenenciez que il n’en peust bien movoir plet. ¶ {3} Juliens fet une demande, savoir mon se l’excepcion de ce qui n’est pas fet par force ne en repost puet valoir contre cest entredit ; si comme se ge use contre toi de l’entredit de ce que tu feis par force ou en repost, savoir mon se tu me poz opposier cete excepcion que tu ne feis pas par force ne en repost. Et Julians dit que il est droiz que ele te soit donnee, car se tu edefies par force ou en repost et tu ne uses contre moi de cest entredit, je me porroi deffendre par ceste excepcion. Et ce ne doit pas estre fors par cause et necessaire ; et totes cez choses doivent estre fetes par l’office au juge. {4} Il i a encore une autre excepcion de que Celsus dote se ele doit estre opposee, si comme se ge ai abatu la moison mon voisin par deffendre le feu et il en plede à moi par l’entredit de ce qui est fet par force ou en repost ou par aucion de domage ou de tort fet. Et Gaius dote se il convient [150rA] opposer que ce fut fet par destroindre le feu. Et Servius dit que se uns baillis l’eust fet, l’excepcion li doit estre donee, mes ele ne doit pas estre donnee à un bas home. Neporquant, se il le fist par force ou en repost et li feus ne vint pas jusque la, il doit rendre tant comme la chose valoit. Et se li feus vint jusque la, il doit estre assos. Autresi dit il se l’en en plede par aucion de domage ou de tort fet, car il ne senble pas que il ait fet nul domage ne nul tort desque la meson fut arse s’ele ne fut abatue. Mes se tu abatis la meson ton voisin quant il n’avoit encor point de feu en la vile et li feus i prist aprés, l’en ne doit pas dire ce moismes ; car l’en ne doit pas regarder ce qui puis est avenu mes en quoi la chose fut fete. ¶ {5} Nos avons dit avant que, ja soit ce que les paroles de l’entredit1 sont moult larges, neporquant il apartient à iceles ovres tant solement qui sont fetes en terre. ¶ Et cil qui toiche à aucun fruit n’est pas tenut par cest entredit, car il ne fet nule ovre en terre ; mes cil qui copent les arbres i sont tenuz, et cil qui sient les roissiaus et qui copent les landes, car il metent les mains à enpoirier la terre. Autresi est il à vignes qui sont taillies ; mes qui en porte les fruiz par force ou en repost doit estre trez en cause par aucion de larrecin. Se aucunne ovre est donc fete en terre, cist entrediz a leu. Nos entendon que ce est fet en terre qui est fet as arbres et ne mie ce qui est fet ou fruit. ¶ {6} Se aucuns gete hors le mont de fiens qui est mis en un champ por engresier le, l’en puet pledier o lui por entredit de ce qui est fet par force ou en repost ; et ce est voirs, car il enpire la terre. {7} Mes se aucunne chose i est fete par coitiver le champ, cist entrediz n’a pas leu se li chans en est amendez, ja soit ce que il la fet par force ou en repost. {8} Se aucuns a fet une fosse ou bois commun et mes boes chient dedanz, je puis pledier par cest entredit por ce qui est fet en commun. {9} Se aucuns depiece une meson, ja soit ce que il ne la depiece pas jusque terre, il n’est pas dote que il ne soit tenuz par cest entredit. {10} Et por ce, se il oste une tuile de ta meson, il est tenuz par cest en[150rB]tredit.

Renulcius dit : car la nessance de ceste chose vient de terre, ne les tueles ne sont pas porsises par els mes à tot l’edefiement ; ne l’en ne fet pas force se eles i sont atachies ou mises tant solement.

Ulpians dit : se aucuns oste les branches d’un arbre, nos otroions que l’en use contre lui de cest entredit. Autresi est il se il oste une tuile d’une meson ; mes se ele n’estoit pas sus la meson, mes allors cist entrediz cesse. {2} Se aucuns arrache aucunne chose qui estoit atachie à la meson, si comme une ymage ou aucunne chose, il sera tenuz par cest entredit. ¶ {3} Se aucuns here un champ ou il i fet une fosse par force ou en repost, il sera tenuz par cest entredit ; mes se il art le blié ou il le gaste et il ne le met pas ou besoing dou champ, cist entrediz n’a pas leu.

Renulcius dit : car le blié qui est hors de l’espic ne tient pas à la terre, mes la terre le sostient, et les mesons tiennent à la terre.

Ulpians dit : cil qui met aucunne chose ou puis son voisin por corrompre l’eve, Labeo dit que il est tenuz par l’entredit de ce qui est fet par force ou en repost ; car l’eve est vive en une partie do champ ; et autresi est il se aucuns ovre en eve. {2} Se aucuns oste une ymage do sepulcre, l’en demande se cil à qui la droiture do sepulcre apartient pot2 pledier par cest entredit. Et il nos plet que cis entrediz ait leu. Et l’en doit dire que les choses qui sont mises ou sepulcre por aorner le sont do sepulcre. Autresi est il se aucuns brise uis ou ostel. {3} Se aucuns vient en mes vignes et les estrepe, il est tenuz par cest entredit. ¶ {4} Voions en quel tens ce doit estre raporté que li prevoz dit « ce qui est fet par force ou en repost », ou au tens qui est trespassz, ou en present. Et Julianus espont ceste dote, qui dit que l’en doit esgarder au tens present ; neporquant, se domages a esté fez au seignor do servise à sers, ou il a esté à ses despens l’ovre qui fut fete en son champ, il diroit3 que li domages li soit restorez et que li despens li soient renduz. ¶ {5} Cist entrediz comprant tot ce qui est fet par force ou en repost. Mes il avient aucunne foiz que une chose est fete partie en repost et partie par force ; si comme se tu feis le fondement de ta meson [150vA] sur mon defens ; et quant tu m’eus convenencié que tu ne feroies pas le seurplus d’une ovre, tu le feis sanz mon sen, ou tu feis le fondement sanz mon sen et l’autre edefiement par force. Et nos usons par tel droit que se ce fut fet par force ou en repost cist entrediz soffisse. {6} Se ovre est fete par le commandemant à celui qui a en garde orfelin ou forsené por ce que il ne doivent pas estre obligié por le mesfet à celui qui les a en garde, il avendra que profitable aucion apartendra contre celui qui les a en garde ou cist entrediz. Et li orfelins et li forsenez seront tenuz par cest entredit à soffrir que l’ovre soit. ¶ {8} Se uns chans est venduz puis que une ovre i a esté fete par force ou en repost, veions se cil qui le vendi puet pledier par cest entredit. Et plusors sont qui dient que il en puet pledier, et que il ne doit rendre riens à l’acheteor par l’aucion d’achat de ce qui fut fet devant la vente ; car ce est assez que li chans fust meins venduz por cele ovre. {9} Mes se l’ovre fut fete puis que li chans fut venduz, et li venderres en puet pledier por ce que il ne l’avoit encor livré, il rendra à l’acheteor par aucion d’achat quant que il querra ; car toz li preuz et toz li domages qui avient aprés la vente doit estre à l’acheteor. ¶ {11} Aristo dit que il ne convient pas toz jorz denoncier à celui qui porsiet le champ l’ovre que l’en velt fere ; car se aucuns m’a vendu un champ et il ne le m’a pas encor livré, et mes voisins veut fere une ovre et il siet bien que je ai acheté le champ et il me dit que il velt fere l’ovre, il est seurs en tant comme il apartient à la sopeçon de l’ovre qui est fete en repost. {13} Se chans est venduz par tel convenant que se il desplet à l’acheteor la vente ne soit nule, nos otroions legierement que li acheterres puisse user de cest entredit se aucunne chose i est fete par force ou en repost, se il en est en possession. Et se il est en la volenté au vendeor de depecier le marchié, l’en doit dire ce meisme. Et se li chans est si venduz que la vente puisse estre defeste se une condicion avient, l’en doit dire ce meisme. {14} Et Julians escrit que cist entrediz n’apartient pas au seignor do champ tant solement, mes à toz cez qui eussont pris se l’ovre ne fut pas fete.

Renulcius dit : ja soit ce que li coitiverres et cil qui a l’useire do champ est receuz à user de cest entredit, neporquant il apartient à celui qui est sires de la proprieté se il i a domage. [150vB]

Ulpians dit : se il avoit arbres ou champ de quoi Tyces a l’usaire et uns estranges ou cil qui avoit la proprieté do champ les cope, Tyces en puet pledier o l’un et o l’autre par la loi qui fet restorer les domages. {1} Et par cest entredit Labeo escrit que se un ovre est fete seur les deffens son fil qui est en ton baill, tu puez user de cest entredit ; et se l’ovre est fete seur ton deffens, tes fiz puet user de l’antredit. ¶ {3} Se uns des compoignons cope les arbres do champ qui est communs, ses compoinz puet pledier à lui par cest entredit, car il apartient à celui à qui li domages est fez. {4} Et por ce dit Servius que se tu m’otroies à coper arbres en ton champ et uns autres la cope par force ou en repost, je puis user contre lui de cest entredit, car li domages est miens. Et encor le doit l’en otroier plus legierement se ge ai achaté de toi les arbres ou ai fet vers toi par autre marchié que tu m’as otroié à coper les. ¶ {5} L’en demande se aucunne chose est fete par force ou en repost en un champ qui n’a point de seignor, savoir mon se cist entrediz apartient à celui qui puis en aquiert la seignorie, si comme se uns heritages est escheez et Tyces le reçoit aprés ce que l’ovre est fete, savoir mon se cist entrediz li apartient. Et Juliens dit que cist entrediz apartient à l’oir por ce que il fut fez ainz que il receust l’eritage. Ne il ne remaint pas, ce dit Labeo, por ce que cil qui fist l’ovre ne savoit pas qui en devoit estre hoirs, ne por ce que nus n’en estoit sires ; car autresi n’est nus sires do sepulcre ; et neporquant, se aucunne chose i est fete, je an puis pledier par l’entredit de ce qui est fet par force ou en repost. Et por ce dit l’en que cist entrediz apartient à toz les heirs quant que l’ovre fut fete, ou puis que l’eritages fut receuz ou devant. ¶ {6} Se mes coitiverres fet une ovre par ma volenté ou par mon otroi, il est autresi comme se mis procurators l’eust fete ; et por ce suis ge tenuz à ce que il fist, ansi comme à ce que mes procurators fet. {7} Juliens dit que se mes coitiverres a copé l’arbre de quoi li plez est ou il a fet aucunne autre chose, se il le fist par mon commandemant, nos somes anbedui tenuz par cest entredit, non pas tant solement por soffrir que l’ovre soit ostee, mes por poier les despens que il convindra fere por oster les. Et se li coitiverres le fist sanz mon sen, il sera tenuz à soffrir que ele soit ostee et paier les despens ; et ge ne sui tenuz fors à ce que ele soit ostee.

Ulpians dit : se mes sers fet une ovre sanz mon [151rA] seu et ge la vant aprés ou ge le franchis, l’en en porra pledier o moi por tant sanz plus que ge soffre que l’ovre soit ostee. Mes l’en en porra pledier à celui qui la acheste por abandoner le sers à soffrir poine ou por paier les despenses qui seront fetes por depecier l’ovre. Et se il est franchiz, l’en porra pledier à lui.

Cil moismes dit : cist entrediz apartient toz jorz contre celui qui a fet l’ovre. Et por ce, se aucuns fet ovre en mon champ malgré mien ou sanz mon seu, cist entrediz avra leu. {1} Cil qui avoit aloé un champ à torner à gaagnage en osta les pierres et les geta ou champ à son voisin ; Labeo dit que tu n’i es pas tenuz par cest entredit se il ne le fist par ton commandemant. Et se cil qui a pris un champ à loage i fet aucunne chose par force ou en repost, je croi que il est tenuz par cest entredit. Mes cil qu’i li baille n’est tenuz fors à sofrir que cele ovre soist ostee et à doner l’aucion que il porroit avoir vers celui qui fist l’ovre. ¶ {2} Se terre est amoncelee par mon commandemant en autrui sepulcre, Labeo dit que l’en en puet pledier à moi par cest entredit. Et se ce est fet par le commun consoil à plusors, l’en en puet pledier à chescun par soi ; car l’ovre que plusor font communenement est chescun obligiez par tot. Et se chescuns d’aus le fet par son propre consoil, l’en en doit pledier à toz aus. Li uns n’est donc pas delivrez por ce se li autres est trez en cause ; mes s’il en i ot un qui fut par desus toz les autres, qui lor commanda, il puet estre trez en cause por toz les autres. Et par dessus ce, l’en en puet pledier par aucion de sepulcre brisé. ¶ {3} Cist entrediz a leu contre les hoirs toz por tant comme il est venuz à aus ; {4} mes il n’apartient pas aprés l’an. Li anz commoince des le jor que l’ovre fut fete, ou desque l’en lessa à fere la, ja soit ce que ele ne fut pas parfete. Car se l’en contoit l’an desque l’ovre fut commencee, il avendroit sovant que li anz passeroit ainz que cil à qui li entrediz apartient en seust rien. {5} Et se li leus est tels que n’en n’i vet pas sovent, si comme ou sepulcre, ou soz terre, ou en chambre coie, l’en peut pledier aprés l’an par cest entredit que la cause sera conneue. Et l’excepcion d’un an est lessie s’il i a droite cause par quoi cil à qui li entrediz apartient ne savoit pas que l’ovre fut fete. {6} Se aucuns estoit hors de païs por la cause de la chose commune et quant il fut revenuz il vost pledier par cest entredit, l’excepcion de un an ne li doit pas nuire ; ainz avra [151rB] un an de terme aprés sa revenue. Et se il avoit meins de .xx. anz tant comme il estoit hors do païs, il convient que uns anz li soit contez aprés ce que il est revenuz et non pas de que il ot acompliz les .xx. anz ; et issi l’escrit li enpereres Pius et tuit li prince. ¶ {7} Li plez est proisiez par cest entredit à tant comme li demanderres a eu de domage en ce que l’ovre a esté fete. Il convient que l’ovre soit depecee si par l’office au juige que la condicion au demandeor soit en totes manieres antre cele comme ele fut se l’ovre de quoi l’en plede n’eust onques esté fete. {8} Il i convient donc aucunne foiz prendre garde à la seignorie, si comme li servise sont perdu por cele ovre qui est fete ou se usaires en est failliz. Et ce avient non pas tant solement quant aucuns fet une ovre, mes quant il la depiece et ill enpire la condicion des servises, ou de l’usaires, ou de la proprieté meisme. {9} Et li domages doit estre proisiez par le seremant que li demanderres fet, ou par l’ofice au juige se il ne puet jurer. {10} Et cil qui a fet par tricherie que il ne puet establir les choses en lor estat doit estre autresi comme se il le puet bien fere. {11} Ce qui est fet en corpe à aucun doit estre restoré par cest entredit et proisié par le juigement au juige. {12} Et por ce que cist entrediz fet restorer ce que l’en a eu de despens4, se aucuns a recovré par autre aucion le domage que il a eu en ce que l’ovre fut fete, il n’en doit recovrer nule chose par cest entredit.

Paulus dit : cist entrediz apartient à cez qui ne porsient pas, se la chose apartient à als. {1} Se aucuns cope par force ou en repost arbres qui ne portent pas fruit, si comme cyprés, cist entrediz apartient au seignor tant solement. Mes se cil arbre estoient en tel leu que aucuns en eust le delit, l’en puet dire que cil qui avoit l’usaire et s’i soloit deporter i a domage et puet user de cest entredit. {2} Se cil qui a fet une chose par force ou en repost la porsiet, il doit soffrir que ele soit ostee et paier les despens ; se il la fist et il ne la porsiet pas, il doit paier les despens ; se il ne la fist pas et il la porsiet, il doit soffrir que ele soit ostee.

Cil moismes dit : cist entrediz est aquis au seignor par totes persones, naïs par son oste.

{1} Celsus dit : se tu prias le bailli que il commandast que tes averseres venist au juigement que il ne te denonças pas novele ovre, il senble que tu aies fet en repost l’ovre que tu as fete dedanz ce.

Paulus dit : cil fet par [151vA] force qui fet ce en defans, et cil qui fet tant que l’en ne li puet deffendre. ¶ {1} L’en entant que ovre ne soit fete par parole ou par fet ; si comme quant l’en met la main devant, ou quant l’en giete une pierre por cause de defendre la. {2} Cil qui fet seur deffens fet force tant comme la chose est en un estat ; car se s’acorde plus à son averseres, il lesse à fere par force. ¶ {3} Se li heirs à celui qui fesoit une chose seur defens, ou cil qui l’achate de lui, ne set riens do deffens et il parfet l’ovre, Pomponius dit que il n’en chiet pas en cest entredit. ¶ {4} Ce qui est fet en nef ou en autres chose movable, combien que ele soit grant, est contenu en cest entredit ; {5} ou que l’ovre soit fete ou en privé leu ou en commun, ou en seint ou en religios, cist entrediz a leu.

Pomponius dit : se li juiges a commandé à aucun que il oste à ses despens l’ovre que il fist par force ou en repost, et uns autres l’oste à force, por ce ne remoint pas que cil à qui il fut commandé ne doie paier les despens. ¶ {1} Se ge commant que mes sers face une ovre, et ge n’ai pas pensé que ele soit fete ne par force ne en repost, mes li sers siet bien que mis averseres la deffendroit se il le savoit, l’e‹n› demande se ge sui tenuz par cest entredit. Et je croi que nanil, car l’en ne doit regar fors à ma persone. ¶ {3} Se aucuns a perdu aucunne droiture par l’ovre qui est fete, ele li doit estre rendue par cest entredit.

Renulcius dit : se tu trez ma vigne de ma terre en la toe et ele se racine en la toe, li entrediz de ce qui est fet par force ou en repost m’apartient dedanz l’an. Mes se li anz passé, nule aucion ne me remaint et les racines qui sont en ta terre sont toes. ¶ {1} Se aucuns are un champ par force ou en repost, je croi que il est tenuz par cest entredit. Autresi comme se il eust fet une fossé ; car cist entrediz n’a pas leu por la qualité de l’ovre mes por ce que ele est fete en terre. ¶ {3} Se tu maines ton fiens parmi mon champ et je ne le te deffens pas, ja soit ce que ne fois point de domage ne tu ne mues point la maniere de mon champ, neporquant Trebaces dit que tu es tenuz par l’entredit de ce qui est fet par force ou en repost. Mes Labeo dit le contraire, car cil qui est alez parmi mon champ et i a aucunne chose sanz fere ovre nule n’est pas tenuz par cest entredit. ¶ {4} Se aucuns fet sus un sepulcre la getee de sa meson ou sa go[151vB]tiere, ja soit ce que il ne toche pas au sepulcre, neporquant l’en porra pledier contre celui par cest entredit ; car li sepulcres ne contient pas tant solement la terre où li mort sont enterré, mes l’aer qui est desus. Et si puet l’en pledier o lui par aucion de sepulcre brisé. ¶ {5} Se cil qui denonça que il voloit fere une ovre la fist maintenant, l’en entant que il la fist en repost ou par force. Et se il la fist enprés lonc tens, il la fist en repost.