École des chartes » ELEC » LI SEIZIESMES LIVRES » XXII. D’enprunt [rubr.]

XXII. D’enprunt [rubr.]

  • Traduit du Dig., liv. 43, tit. 26 : de Precario.

§ {43.26.1}

Ulpians dit : enprunz est quant l’en otroie à aucun user de ce que il demande tant comme cil velt qui li otroie. {1} Et ceste cortoisie descent do droit as genz. {2} Et se devise de don, en tant que cil qui done velt que ce que il done soit à celui qui le reçoist«  mes cil qui baille en ceste maniere avra sa chose arriere quant il vodra. {3} Et ce est autresi comme choses prestee, car [152rA] cil qui preste baille issi sa chose que ele n’est pas à celui qui la reçoit, mes il la puet tenir tant comme cil vodra.

§ {43.26.2}

Cil moismes dit : li prevoz dit : « ren ce que tu as par enprunt de celui qui plede o toi, ou que tu as lessié par tricherie à avoir ». {1} Cist entrediz est de restitucion et a en lui naturel lëauté, car il apartient à celui qui velt rapeler ce que il a presté. {2} Et il est droiz que cil à qui ge baillie ma chose n’en use fors tant comme ge vodroi, et que ge la puisse rapeler quant ge avrai muee ma volenté. ¶ {3} Il senble que cil a par enprunt qui a receu la possession d’aucunne droiture ou de chose corporel par ce sanz plus que il proia et enpetra que il li leust à user en.

§ {43.26.3}

Paulus dit : si comme se tu me pries que je te lesse aler ou mener ce que tu vodras par un mon champ, ou que ta gotiere soit sus ma meson, ou ta solive sus mon mur.

§ {43.26.4}

Ulpianus dit : enprunz est aucunne foiz de choses movables. {1} Il convient que nos sachons que cil qui a aucunne chose par enprunt est tenuz par cest entredit«  {2} et non pas cil qui enprunte la chose, mes cil qui la tient par enprunt. Car il puet bien avenir que aucuns ne enprunta pas la chose, et s’il la tient par enprunt«  si comme se mes sers enprunta une chose, il m’en aquist l’usage, ou aucuns autres qui est sozmis à ma droiture. {3} Et se ge enprunte ma chose moisme, je l’enpruntai, et si ne la tien ge pas par enprunt, car qui reçoit sa chose moisme ne la tient mie par enprunt. {4} Et se aucuns enprunta une chose jusques à un terme, se il la tient aprés le terme, il la tient par enprunt, ja soit ce que il ne l’enprunta pas por tenir la en ce tens«  car desque cil qui li presta s’ofre que il en use aprés le terme, l’en entant que il li preste de rechief.

§ {43.26.5}

Ponponius dit : se li terme à quoi tu enpruntas une chose n’est pas encor venuz et tu pries dedanz ce que il te loise à user an aprés le terme, li enprunz est aloigniez, car la cause de la possession n’est pas muee. Mes se tu enpruntes la chose puis que li termes est passez, li enprunz n’est pas aloigniez, mes uns autres est fez toz noviaus.

§ {43.26.6}

Ulpians dit : se li sires muert dedanz ce, il ne puet avenir que li enprunz soit renovelez«  et ce est voirs. ¶ {1} Se mes procurators a enprunté une chose par mon commandemant ou je l’é otroié aprés, l’en puet dire que ge la tieng par enprunt. ¶ {2} Cil qui a proié que l’en lest demorer en un champ ne le porsiet pas, ainz est soz celui qui li otroia à demorer i«  car cil qui a l’usaire do champ, et li coitiverres, et li ostes sont ou champ, mes [152rB] il ne porseant pas. {3} Juliens dit que cil qui mist par force un autre hors de son champ, et puis li proia que il sofrist que il en usast, lessa à porsoer la chose par force et le commoinça à tenir par enprunt. Ne l’en ne doit pas dire que il ait mué la cause de sa possession desque il l’a commoincié à porsoer par enprunt par la volenté à celui que il en mist hors par force ; car se il eust achetié de lui le champ, il eust commoincié à avoir en la seignorie comme acheterres. ¶ {4} Se aucuns me baille sa chose en gage et il me proia que ge li otroiasse à user an, l’en demande se cist entrediz a leu. Et la demande est de ce que nus ne puet user de sa chose par enprunt. Aucuns dient que il n’a point d’enprunt en gage, car li enprunz est de la possesion et ne mie de la proprieté. Mes ceste sentence ne me senble pas bonne, car il avient chescun jor que li deteur prient lor creanciers que il lessent user de lor gages«  et por ce ne faut pas la droiture des gages.

§ {43.26.7}

Renulcius dit : se ge te preste la chose de quoi ge puis retenir la possession par l’entredit de possession, ja soit ce que il poet avenir que ge soie tenuz à rendre en la proprieté, neporquant tu seras tenuz à moi par entredit.

§ {43.26.8}

Ulpianus dit : se Tyces me prie que il aist l’usage de la chose Senprone, et ge pri Senprone que il le m’otroit, et il le m’otroie, et je l’otroie à Tyce, Tyces l’a de moi par enprunt, et ge plederai à lui par cest entredit. Et Senprones ne pledera pas à lui ; car les paroles au prevost mostrent que cist entrediz apartiet à celui de qui la chose fut enpruntee et ne mie à celui qui ele est. L’en demande donc se Semprones puet pledier o moi par cest entredit por ce que ge li pria de baillier la chose. Et il est melz que il n’en puisse pas pledier à moi, car ge n’ai pas sa chose, ne je ne l’enpruntoi pas par moi mes por autre«  neporquant, il puet avoir contre moi aucion de mandemant, car il la balla par mon commandemant. ¶ {1} Se aucuns enprunta mes choses de Tyce, il senble que il la tient de son heir por enprunt«  et issi escrivent Sabins et Celsus, et nos usons de cest droit. Il le tendra donc par enprunt de toz les autres heirs. Labeo preuve ce meisme«  et si i ajoint que se cil qui tient la chose ne set que li hers soit, neporquant il tient de l’oir par enprunt. {2} Et se tu me proias que ge te lessasse user de ma chose, et je estrange cele [152vA] chose, veions se li enprunz dure puis que la chose est mise en autrui main«  et il est melz que, se cil à qui la chose est baillie ne rapele le prest, il puisse user de cest entredit autresi comme se il meismes eust presté la chose. {3} Li prevoz volt que cist fust tenuz par cest entredit qui fist par tricherie que il n’a pas la chose que il enprunta. ¶ Cil qui prie que l’en li let user d’une chose ne rent pas par cest entredit ce qui avient en sa corpe mes ce sanz plus qui avient par sa tricherie ; ja soit ce que cil à qui une chose est prestee ne rent pas tant solement ce qui avient par sa tricherie, mes ce qui avient en sa colpe. Et ce est par droit que cil qui prie que l’en li let user d’une chose ne rende fors ce qui avient par sa tricherie, car tot ce descent de la cortoisie à celui qui li ostroia à user an. Et ce est assz se il rent ce qui avient par sa tricherie «  neporquant, l’en dira par droit que colpe procheine à tricherie est contenue en cest entredit, si que la chose soit rendue en son encien estat. Et se ce n’est fet, li condempnemenz sera fez de tant comme li demanderres eust de preu. {4} Se la chose fust restablie des le tens en quoi l’en commença à user de l’entredit, li fruit seront donc rendu do tens qui est passz puis que li entrediz fut proposez. ¶ {5} Se aucuns proia que l’en lessast user do servise qui estoit deuz à aucun et il n’en use pas, si que li servises est perduz, par ce veions se il est tenuz par cest entredit. Et je croi que il n’i est pas tenuz se il ne le fist par tricherie. {6} Et l’en dit1 generaument que nus n’est tenuz à restorer par cest entredit, fors ce qui est fet par tricherie ou en sa colpe«  mes puis que li entrediz sera proposz, il convient rendre tote la cause. ¶ {7} Labeo escrit que cist entrediz apartient aprés un an, et nos usons de cest droit ; car por ce que la chose est baillie à user enprés l’an, ce ne seroit pas bien à dire que li entrediz n’eust leu aprés l’an. {8} Li heirs à celui qui enprunt la chose est tenuz par cest entredit comment que il soit, ou se il a la chose, ou se il a fet par tricherie que il ne l’a pas, ou que ele n’est pas venue à lui«  et il est tenuz par la tricherie au mort por tant comme il est venu à lui.

§ {43.26.9}

Gaiuz dit : Enpru‹n›z puet estre establiz entre cez qui sont presenz et cez qui ne sont pas presenz, si comme par letres ou par mesage.

§ {43.26.10}

Ponponius dit : ja soit ce que aucun proia que il peust user d’une serve [152vB], neporquant ce qui nest de celui est en cele moisme cause.

§ {43.26.11}

Celsus dit : se li detors prie son creancier que il li let user de la chose que il li bailla en gage, li enprunz faut desque li denier sont rendu«  car il ne le poet tenir par enprunt fors jusque lors.

§ {43.26.12}

Cil meisme dit : quant il est mis en convenant que cil qui enprunte une chose en use jusque les kalendes de aost, l’en demande se l’excepcion de ceste convenance li puet aidier se l’en li velt oster la chose devant le terme. Et sanz dote la force de ceste convenance n’est nule à ce que il puisse tenir autrui chose malgré à celui qui ele est. {1} Ostroiz de chose enpruntee s’estant jusque l’oir ‹…› à celui qui la reçut ; car li usages en fut ostroiez à lui et ne mie à l’oir.

§ {43.26.13}

Pomponius dit : se tes sers enprunta une chose par ton commandemant, ou tu otroias ce que il enprunta en ton non, tu es tenuz par cest entredit, autresi comme se tu meismes l’eusses enpruntee. Mes se tes sers ou tes fiz l’enprunte en son non sanz ton sen, il n’apert pas que tu le aies par enprunt«  mes cil qui la bailla en porra pledier o toi por le chetel ou por ce qui a esté mis en ton preu.

§ {43.26.14}

Paulus dit : li entrediz d’anprunt a esté establiz par droit, car nule citeine aucion n’i puet avoir leu«  car condicion d’enprunt apartient plus à don et à cause de benefice que à autre marchié.

§ {43.26.15}

Ponponius dit : c’est soveroine droiture que aucuns use de noz chose tant comme nos volons. {1} L’e‹n› n’entant pas que li ostes et cil qui ont l’abitacion de noz mesons i habitent par enprunt. {2} Nos poons user par enprunt des droitures, si comme d’avoir noz gogoteres sus autrui terre, ou de metre nos solives sus autrui mur.

§ {43.26.16}

Cil moismes dit : se je faz mon fil adoptif de celui qui tient une chose par enprunt, je la tendroi autresi par enprunt.

§ {43.26.17}

Ulpians dit : cil qui tient un champ par enprunt puet user de l’entredit de possession contre toz, fors contre celui qui li presta.

§ {43.26.18}

Cil moismes dit que il ne puent pas user d’une chose par enprunt, si que chescun use de tote.

§ {43.26.19}

Ne plus que dui la puent tenir par force ou en repost ; car .ii. possessions ne puent estre ensenble, que eles soient ou loiaus ou deloiaus. {1} Il senble que cil qui enprunte de mon serf enprunte de moi, se ge estable ce que mes sers fet«  et por ce est tenuz à moi par l’entredit d’enprunt [153rA].

§ {43.26.20}

Ulpians dit : li venderres puet demander les choses que il a vendues par tel convenant que li acheterres les ait par prest, tant que toz li pris soit paiez, se il est remés en l’acheteor que il n’est paiez.

§ {43.26.22}

Renulcius dit : se cil qui porsiet autrui chose prie le seignor que il li otroit à retenir en la possession, ou cil qui a enprunté autrui chose en prie le vendeor, il apert que il porsiet par enprunt «  ne l’en ne doit pas dire que il moisme movent la cause de la possession quant li seignor lor otroiet à porsoer lor choses. {1} Se uns orfelins prie sanz auctorité à celui qui l’a en garde que il puisse user d’une chose, il l’a par enprunt, et est tenuz par cest entredit«  car il n’a nul besoing de l’autorité à celi qui l’a en garde por tenir la chose plus naturelement. Et l’en dit que il tient la chose par enprunt, car il la tient por ce que il li pria que il li leust à tenir la. Ne li prevoz ne est establi ci nule novele chose«  car se il a la chose, il i est tenuz«  et se il ne l’a, il n’i est pas tenuz.


1 dit] doit dans le ms., cf. lat. Et generaliter erit dicendum…