XXIII. De coper arbres [rubr.]
- Traduit du Dig., liv. 43, tit. 27 : de Arboribus cœdendis.
§ {43.27.1}
Ulpianus dit : li prevoz dit : « se uns arbres pent en son champ sus la meson ton voisin et tu ne le velz oster, je deffant que force ne li soit fete que il ne li loise à oster le et avoir ». ¶ {1} Cist entrediz est de deffensse. {2} Mes se uns arbres pent sus autrui meson, l’en dote se li prevoz commande à coper tot l’arbre, ou tant sanz plus comme il en pent sus la meson. Et Ruptilius dit que il doit estre copez pres de terre, et issi plest il à plusors. Et Labeo dit que se li sires ne velt coper l’arbre, il est otroié à celui à qui il nuist que il le cope et l’enport. {3} Les vignes sont contenues par non d’arbre. ¶ {4} Cist entrediz apartient non pas tant solement à celui qui en a l’usaire ; car ce est ses preuz que li arbres ne pende pas sus la meson. {5} Et se il pent sus meson qui est commune, chescuns des seignors a cest entredit« et chescuns l’a tot, autresi comme chescuns puet chalongier toz les servises. ¶ {6} Li prevoz dit : « se tu ne le velz oster, je defant que force ne li soit fete que il ne li loise à oster le ». L’en te donne premierement poer d’oster le« et se tu ne l’ostes, il defant que force ne soit fete à ton voisin qui le velt oster. ¶ {7} Li prevoz dit aprés : « se li arbres qui est en ton champ pent sus le champ ton voisin, se tu ne le velz trere ariere .xv. piez loing de sa terre, je deffant que force ne li soit fete que il ne li loisse à trere le arriere et avoir en les branches » [153rB]. {8} La loi des .xii. tables commande ce moisme, que li prevoz dit que li arbres à un des voisins soient .xv. piez loing dou champ à l’autre ; et ce fut fet que l’umbre des arbres ne neust as voisins chans. {9} La difference des .ii. mambres de cest entredit est tele que se li arbre pendent sus la meson, l’en commande que il soient osté ; et se il pendent seur champ, l’en commande que il soient trez .xv. piez arriere.
§ {43.27.2}
Ponponius dit : se uns arbres s’encline do champ son voisin seur le tuen par force de vent, tu puez par droit pledier o lui par la loi des .xii. tables que il l’ost et que il ne li let pas issi.
