XVIII. D’eve de fontaine [rubr.]

Ulpians dit : li prevoz dit : « je defant que force ne te soit fete que tu n’uses de l’eve de la fonteine de quoi l’en plede si comme tu en as usé en cest an, ne par force, ne en repost ,ne par enprunt. Autresi deffendons nos de lac, et de puis, et de piscine ». ¶ {1} Cist entrediz est proposez à celui à qui il est deffendu que il n’use d’eve de fonteine ; car servises ne sont pas de mener eve tant solement mes de puissier la. Et autresi comme ce sont divers servises de mener eve et de puissier la, en sont proposé dui entredit. ¶ {2} Cist entredit a leu quant il est deffendu à aucun que il n’use d’eve ; ce est quant l’en li deffant à puissier an, ou à mener i ses betes. {3} Et l’en doit dire ce moismes en tant comme il apartient à la persone que nos avons dit es entrediz qui sont avant cez. {4} Cist entrediz n’apartient pas de cisterne ; car cisterne n’est pardurable cause, ne eve vive. Et por ce, apert il que il convient en toz les cas que eve soit vive ; et les cisternes viennent de pluie. Et sanz dote li entrediz cesse se il n’a eve vive ou lac, ou ou puis, ou en la piscine. {5} Et se l’en deffant à aucun que il n’aille puissier eve, cist entrediz li soffist. ¶ {6} Li prevoz dit aprés : « je deffant que force ne te soit fete que tu ne purges ou refaces la fontoine de quoi l’en plede, que tu en puisses avoir de l’eve par quoi tu ne uses autrement que tu en as usé en cest an, ne par force, ne en repost, ne par enprunt ». ¶ {7} Cist entrediz a ce moismes profit que cil iqui1 proposez por refere les ruissiaus ; car se il voloit apurgier et are(?) la fonteine, li usages n’en sera nus. {8} Fontoine doit estre purgié et refete por retenir eve, si que aucuns en puisse user, por quoi il ne use autrement que il en a usé en l’an devant. {9} Retenir eve est fere que ele ne s’en core pas ; mes il ne soit ostroié à nul à querre noveles voies ne à ovrir les. ¶ Cil n’a nule [148vA] chose renovelee, fors ce si comme il en a usé en l’an devant. {10} Li entrediz apartient de purgier et de refere lac, et puis, et piscine. {11} Et il sera donz à totes les persones à qui li entrediz de l’eve d’esté apartient.