École des chartes » ELEC » LI SEIZIESMES LIVRES » II. De longue tenue.
[p. 264]

II. De longue tenue.

§ 1.

Un homme demende une meson, et dit qu’ele iert son père, quant il ala de vie à mort ; s'il la viaut avoir par la reson de son père. A ce respont li corpables : Com je aie tenu cele chose dix anz et pluz, et de seignor, et ai usé de cele chose com de la moie, si n'en voil respondre, et m’en voil partant passer, jusque droiz m'en part ; et se droiz dit que partant ne m’en doie passer, plus dirai que tort ne m'en prendra. Et li demenderres dit qu'il ne veaut pas que cete barre li vaille, ainz viaut que il l'en respoigne. Selonc ces paroles s'otroient à juigier : et l'en respont que li corpables ne li en respondra pas. A totes les foiz que aucuns demende héritages, et cil a eu longue tenue de un an, et par seignor, et cil qui demende ne fraint la tenue, juigemenz est faiz contre lui.

§ 2.

[p. 265] Qui tient chose non movable, et sanz redevances, et sanz titre, tenue ne vaut rien.

§ 3.

Quant aucuns demende aucune chose de patremoine, si comme chose qui ne move pas ; et l'en li met devant longue possession et longue tenue pesible de sept anz ou de dix ; et l'en la nie et enfraint, et l’en offre à prover l’enfreinture par gage : en tel chose ne doit pas avoir bataille ; mès li juiges doit voer par l’enquest de bones genz, se l'enfrainture a esté resonablement ; et se a esté resonable, auge l'en avant en la querele ; et s'ele n'a esté resonable, vauge la tenue, segont la loi de la terre.

§ 4.

Se aucuns demende à estre en la sésine de son eol ou de son père, de aucun héritage don li pères ou l’eols se en morut sésiz et vestuz, et tenant de seignors, et aucuns estranges vengne avant, qui dement la chose par reson d’achat ou de don, ou de aucune resonable cause, et le voille prover par bons tesraoinz : li heirs queneuz sera avant mis en sésine, et quant il sera en sésine, se il volent demender la propriété par la reson de vante ou de don, se cil qui morz est a tenue la chose plusors anz, et de seignor, puis la vente ou puis le don, et ses heirs voille aloigner cele tenue, ele li vaudra à gaigner la propriété.