I. Ci commence la segonde partie et li septimes livres de Digeste nove. Cis titres est d’obligemenz de paroles [rubr.]

Ulpians dit : convenance ne puet estre fete se li uns et li autres i e parole ; et por ce, ne muz, ne sorz, ne cil qui ne puet parler ne puent fere convenance, ne cil qui est hors do païs ; car li uns doit oïr l’autre. Se aucuns de cez velt donc fere convenance, si la face par un de ses serf qui soit presanz ; et issi li sera aquisse la convenance et aucion par la convence. ¶ Et se aucuns velt estre obligiez, si commant à son serf que il s’oblige [160rB] por lui et il sera obligiez par son commandemant. {1} Et cil qui demanda une chose et s’en parti ainz que l’en li respondist, n’a pas aquis la convenance. Mes se il s’en parti tantost comme il ot demandé et puis s’en vint arriere et l’en li respondi, lors il i a obligement ; car l’espace do tens que il s’en ala ne ne corront pas la convenance. ¶ {2} Se aucuns demande issi à un autre : donras me tu ce ? Et il respont oïll, il est obligiez. Mes il est autrement se il l’ostroia sanz paroles ; car il n’est obligiez ne citoiennement, ne naturelement ; et por ce, dit l’en que plege n’est pas obligiez par lui. ¶ {3} Se l’en demande à aucun simplement et il respont soz condicion, il est certaine chose que il n’est pas obligiez. Et se l’en li demande issi : « donras me tu ce as kalandes ? », et il respont : « je le te donroi es ydes », il n’est pas obligiez ; car il n’est pas respont à ce que l’en li demande. Et encontre, se l’en li demande par condicion et il respont purement, l’en doit dire que il n’est pas obligiez. ¶ Quant l’an ajoint aucunne chose ou sostret à obligement, l’en doit dire que li obligemenz est corrumpuz se il n’i a diverses responses ; car lors senble il que ce soit autre convenance. ¶ {4} Se je te demandoi se tu me donroies .x. livre, et tu respondis que oïl .xx., il est certaine chose que tu n’i es obligiez que à .x. Et encontre ce, se je te demandoi .xx., et tu respondis que tu me donroies .x., li obligemenz ne vaut fors les .x. ; car ja soit ce que il conveigne que il se consantant à la some, neporquant il est aperte chose que .x. sont contenu en .xx. ¶ {5} Et se ge te demandoi se tu me donrois un serf, et tu respondis que tu me dorrois celui et un autre, tu n’i est obligiez à donner moi fors celui que je te demandoi. Car s’il i a autretant de convenances comme de cors, il ac deus convenances de quoi l’une vaut et l’autre ne vaut rien ; ne cele qui vaut n’est pas perdue por cele qui ne vaut rien. {6} Il n’a point de difference se l’en respont ou lengage moismes ou l’en demande ou en autre. Et por ce, se aucuns demande en latin et l’en li respont en grec, por tant que la responsse s’acorde à la demande, il i a droit obligement. ¶ Nos entendons ce de grec et de latin tant solement, mes l’en dote des autres lengages. Et Sabins escrit, et ge croi que ce est voirs, que toz lengages contient obligemenz par quoi li uns entende l’autre ou par lui ou par verai latinier.

Ponponius dit : se unes des convenances sont fetes par juigement, les autres par le prevost, les autres par acort, et les autres sont communes à celes qui sont [160vA] fetes par juigement et à celes qui sont fetes par le prevost. ¶ Celes qui sont fetes par juigement sont celes qui vienent de pur office au juige, si comme caucion qui est donee por poor de tricherie. ¶ Celes qui sont fetes par prevost sont cez qui vienent de pur office au prevost, si comme caucions que aucuns donne que domages ne vindra par lui à son voisin. Il convient entendre les convenances qui sont fetes par le prevost si que celes i soient comprises, qui sont fetes par les voers, car celes vienent par la juiridiction au prevost. ¶ Celes qui sont fetes par acort sont celes qui li pledeur font per commun assentement. Et de celes i a il pres d’autretant de manieres comme il est de marchiez ; car eles sunt fetes par obligement de paroles et vienent de marchié qui a esté fez. ¶ Les communes convenances sont si comme quant1 la chose à l’orfelin soit sauve ; car prevoz commande que caucion soit donnee que la chose à l’orfelin sera sauve, et li juige li commandent aucunne foiz se la chose ne puet estre depecee en autre maniere. Convenance de rendre chose à dobles vient dou juige ou de bennissement as voeirs. ¶ {1} Convenance est une concepcion de paroles par quoi cil à qui l’en demande se il fera ou dorra aucunne chose, respont que oïll. {2} Caucion est une convenance qui s’i oblige celui qui promet que autre s’i obligent o lui et prometent ce meisme. ¶ {4} Se tu promez deners et tu i mez paine se il ne sont paié, et un de tes hoirs en paie sa partie et li autres n’en paie pas la soe, la paine est deue tant que li autres ait paié sa part. Autresi est il de paine qui est establie en mise, se li uns obeist à la sentence à l’arbitre et li autres n’i obeist pas ; mes cil qui n’i obeist pas doit restorer le domage à celi qui obeist, car l’en ne puet en tels convenances establir nule autre chose sanz fere tort à cez à qui eles sont fetes.

Ulpianus dit : cil à qui il est deffendu que il ne mete main en ses biens aquiert ce qu’i li est convenencié ; mes il ne puet riens rendre ne estre obligiez par promesse que il face. Et por ce, ne puet il donner pleige ne plus que li forsenez.

Ulpianus dit : quant condicion qui ne puet avenir est mise en fere aucunne chose, ele nuist à la convenance. Mes il est autrement se tel condicion est mise en convenance « ge te donroi ce se ge ne monte o ciel » ; car ceste condicion est presente et profitable, et la promesse doit estre rendue.

Ponponius dit : se Tyces et Sey firent chescuns par soi tel convenance ou un home : « tu me [160vB] promz à donner tel champ se tu ne le donnes à celui », il est tenuz à doner le ne à l’un ne à l’autre devant que il en soit trez en cause. Et por ce, cil qui tret premierement en cause a la meillor condicion.

Cil moismes dit : nos usons de tel droit que se tel convence est fete, que se Tyces ne vient en Lonbardie dedanz les kalendes de moi tu me promez à doner .x. livres, l’en ne puet rien demander devant que l’en sache certeinement que Tyces ne vindra pas en Lonbardie dedanz ce jor, ou que il n’i est pas venuz quant que ce soit, ou à sa mort, ou à sa vie.

Ponponius dit : se je te faz tel convenance : « tu me promez à donner .x. sols ou .v. », tu ne me doiz que .v. Et se tu me promz à doner deners dedanz les kalendes de genver ou dedanz celes de fevrier, autretant vaut comme se ge eusse mis en convenant que tu les me rendisses dedanz les kalendes de fevrier.

Cil moismes dit : se tu me dois Stic ou Panphile par convenance d’els, l’autre est fez miens par autre cause, tu me doiz l’autre. {1} Promesse qui est fete à rendre toz les anz est certaine et profitable et est finee par la mort à celui qui ele est promesse ; autressi comme li lés qui est paiez chescun an faut par la mort à celui qui il fut lessiez.

Ponponius dit : cil qui promet .ii. foiz une meisme chose n’est tenuz par droit à rendre la que une foiz.

Ponponius dit : se une chose m’et promesse qui me estoit deue par autre promesse, cil qui la me promist sera obligiez par la derreniere promesse ; car la premiere est ausi comme nule.

Ulpianus dit : nos savons generaument que vilaines convenances ne sont de nule valeur.

Ponponius dit : se promesse m’et fete d’une chose par condicion, la convenance vaut se la chosse n’est pas moie el tens que la condicion avient.

Cil moismes dit : se il ot erreur el non do serf de coi nos feismes convenance et nos nos assentissmes el cors, la convenance vaut.

Ponponius dit : se uns sers fut promis à certein terme et il muert ainz le terme, cil qui le promist n’i est pas tenuz.

Paulus dit : se li sires met en convenant que une chose soit donnee à son serf, ou li peres à son fil, il aquiert à lui meisme.

Ponponius dit : se mes fiz met en convenant que aucunne chose soit donnee à mon serf, il aquiert à moi.

Ponponius dit : cil à qui une chose est promise à paier en cest an ou en ce mois, l’en ne la demandera pas par droit devant que li anz ou li mois soit passez.

Paulus dit : nos fesons par droit convenance que une chose nos soit donnee [161rA] d’ore en .c. anz ; car li obligemenz est presanz et li paiemenz est deloiez juques au terme. ¶ {1} Ce qui est en fet ne puet estre delaié jusqu’au jor de la mort à celui qui le promet, si comme tu promez à venir en Alixandre quant tu morras. ¶ {2} Se je faz tel convenance : « tu me rendras ce quant tu vodras », la convenance ne vaut rien. Et li autre dient que ele ne vaut rien se tu muerz ainz que tu t’obliges à paier ; et ce est voirs.

Ulpianus dit : se convenance est issi fete : « tu me promez que tu me rendras ce que tu me doiz as kalendes de moi », la chose ne doit pas estre rendue orendroit mes au terme, c’est as kalendes de moi.

Cil moismes dit : quant aucuns met en convenant que une chose soit donnee à lui ou à Tyce, ele n’est pas deue as hoirs Tyce. ¶

{4} Se uns hons fet tel convenance : « tu me promz à doner .x. livres en ma vie », il les puet maintenant demander par droit. Et se ses hoirs la demande, il doit estre mis arriere par excepcion de convenant, car il est aperte chose que cil qui fist la convenance ne volt que ses hoirs les demandast.

Cil moismes dit : totes les foiz que aucuns met en convenant que oiles li soit renduz à terme ou soz condicion, il convient regarder à proisier l’uile conbien il valoit quant il dut estre randuz, car lors puet il estre demandez par droit.

Cil moismes dit : autresi est il se une mesure d’uile fu promise à rendre à Capes ; car l’en puet demander le peis que il valut el tens que l’en pot premerement venir à Capes.

Paulus dit : les unes convenances sont certaines et les autres ne sont pas certaines. La chose est certaine de quoi il apert quant ele est promise quele ele est, et comment ele est granz ; si comme quant l’en promet .x. livres, ou le2 champ qui fut Tyce, o .c. muis de bon fromant, ou .c. sestiers de trop bon vin champenois.

Cil moismes dit : se li fiz qui estoit en baill fist une convence soz condicion et fu mis hors do baill et la condicion avint aprés, la convenace est aquise à son pere ; car nos gardons as convenances au tens où eles sont fetes. ¶ {1} Se je fis convenance d’un champ, li fruit qui furent lors ne vienent pas en la convenance.

Cil moismes dit : totes les foiz que il a aucunne parole doteuse en convenances, il est droiz que ele soit entendue, si que la chose de quoi la convence est fete soit asseur.

Cil moismes dit : se tu me promeis à fere meson et li tens est passz que tu la peusses fere, tu puez estre deli[161rB]vrez se tu la fez, ainz que je en aie commoincie à pledier. Ce ne te vaudra rien se tu la fez aprés.

Ulpianus dit : ce que l’en dit, que il i a autretant de convenances comme de choses, a lieu la où les choses sont nonmees ; car se eles ne sont nonmees, il n’i a que une convenance.

Cil moismes dit : la demeure au detor nuist à son plege. Mes se li plege offre le serf, donc il est plege, et li deteurs ne velt pas que il soit paiez et li sers muert, l’en doit secorre au pleige. Et se li plege occist le serf, li deteurs est delivrés, et li plege puet estre trez en cause por la convenance.¶

{2} Se convenance est issi fete : « tu me promz à donner .x. livres se je te praing à mari », je croi que aucion n’est pas donnee por tel convenance. Autresi est il se la feme promet à l’ome autrement que par doaire.

Ponponius dit : se je te faz tel convenance : « tu me donras .x. livres ou .xv. », les .x. me sont deues. Et se je di issi : « tu les me donras aprés un an ou aprés .ii. anz », eles me sont deues aprés .ii. anz ; car l’en garde ce es convenances : la meneur some et ce qui est deu à plus lonc terme vient en l’obligemant.

Ulpianus dit : se je ai mis en convenant que uns chans me soit bailliez à un certain jor, et il est remé por celui qui le me dut baillier que il n’a esté baillié au jor, je conquerrai seur lui tant comme je eusse de preu se li chans m’eust esté bailliez au terme.

Papinians dit : se promesse est fete por fere un mesfet, ele ne vaut riens des le commencement.

Paulus dit : quant tu me promez que tu feras ce que il te convient fere, nule chose n’est contenue en la convenance fors ce que tu doiz el jor que ele est à fere ; et ce mostrent les paroles de la convenance.

Paulus dit : se l’en dit que la convenance que li peres fet au non son fil vaut au fill autresi comme se il meismes la feist, est voirs es choses que puent estre aquises au pere. Mes se la promesse est en fet, ele ne vaudra rien en la persone au fill ; si comme se la convenance est que il li loisse à avoir voie ou charriere parmi un champ, et se li filz fet convenance que il loisse à son pere à avoir la, il li aquerra cele droiture ; car il puet bien aquerre à son pere ce qui ne puet valoir à sa persone.

{3} Cil meismes dit : quant une promesse est fete de pluseurs convenances, ja soit ce que il i a pluseurs demandes et pluseurs responsses, neporquant il doit estre autresi comme s’il eust une promesse en chascun convenant [161vA].

Paulus dit : se la chose de quoi la convenance est3 fete est apelee par divers nons, ce que li uns l’apele par un non et li autres par autre ne depiece pas l’obligement. ¶ {1} Se aucuns a fet obligement que voie li soit donnee à aler parmi son champ et il vent aprés le champ, ou tot, ou en partie, ou ce que il i a, la convenance faut.

Paulus dit : quant plusors choses orent esté proposees, une convenance fut issi fete : « tu me promez à donner totes ces choses qui ont avant esté escrites » ; il est propre chose que il i ait autretant de convenances comme il i a des choses. ¶ {1} Li ancien doterent de ceste convenance : « tu me promez à doner .x. livres en cest an, et .x. livres en l’autre, et .x. en tierz » ; ele4 vaut.