VIII. De paemenz et de delivrances [rubr.]

Gaius dit : quant uns deteurs doit par plusors causes et il paie une dete, il est en sa volenté de dire por quel cause il a paié, et ce que il dit sera tenu ; car nos poons fere certain convenant à celui à qui nos paions. Et se nos ne disons pas quant nos paions por quel cause nos paions, il est en la volenté à celui qui reçoit [166vA] por la quel dete il velt que ce soit, por que il acont en chose que nos doions certainement et de coi nos ne pledons pas, et ne mie en dete ou aucuns soit plege, ne en dete de coi li termes n’est encore venuz ; car il senble droit que li creanciers face la besoingne au deteur, autresi comme il feroit la soe. Il est donc ostroié au creancier aconter ce que l’en li paie en quel dete que il vodra, por quoi il face autresi comme il feroit de la soe chose, mes il li doit conter desque l’en li paia.

Florentins dit : car li creanciers puet refuser à recevoir les deners se l’en li velt paier por autre chose que il ne velt ; et li deteurs puet refuser à paier les se l’en li velt conter en autre chose que il ne velt.

Ulpianus dit : car se ce ne lor estoit ostroié, il avendroit que il convendroit toz jorz otroier ce que mains lor vodroit. {1} Et se li uns ou li autres ne dit pas en quel dete il velt conter ce qui est paié, se les detes estoient deues au terme ou soz condicion, il convient que ce qui est paié soit conté en la dete de quoi li termes est passez ou la condicion acomplie.

Ponponius dit : il est melz que ce que j'ai paié me soit conté en aquit de ce que je doi en mon non que de ce que je doi par plevine, et en ce que je doi sus paine que en ce que je doi sanz paine, et en ce donc je ai doné caucion que en ce que je doi sanz caucion.

Ulpians dit : es choses qui sont deues à paier maintenant est il certaine chose que ce qui est paié sanz nule distinction soit conté en la plus grief cause ; et se il n’en i a nule qui soit plus grief que les autres, il soit conté en la plus vielle. La dete senble plus dure qui est deue par caucion que cele qui est deue porement. ¶ {1} Se aucuns a donné deus plege, il pot paier si que il en delivre l’un.

Ulpians dit : se aucunne chose est deue por vilaine cause, et aucunne chose por cause qui n’est vilaine, ce qui est paié est conté en ce qui est deu par vilaine cause. Et se aucunne chose est deue por cause de chose juigie et aucunne chose por autre cause, je croi que ce qui est paié doit estre conté en ce qui est deu par cause de chose juigie ; et issi le prove Ponponius. Et se aucunne chose est deue por cause ou paine est ajointe, ce qui est paié doit estre conté en ce qui delivre de la paine.

Paulus dit : se je ai fet convenance que une chose soit paié à moi [166vB] ou à Tyce, Tyces ne la puet demander ne quiter ne renoveler – la convenance – ja soit ce que l’en li puet paier par droit.

Ponponius dit : se je ai fet convenance que une chose soit paié à moi ou à un orfelin, se cil qui la doit la paie à l’orfelin sanz l’autorité à celui qui l’a en garde, il est delivrés envers moi.

Julians dit : li sires le doit otroier quant il le set premerement.

Ponponius dit : quant uns plege plevist por deus por chascun .x. livres, il est obligiez en .xx. livres ; et se il paie les .xx. livres ensenble ou par chescun .x., il delivre l’un et l’autre deteur. Mes se il n’en paie que .v., voions le quel il alige. Et sanz dote il aliege celui por qui il dit que il paie ; et se il vendoit rien, il convient regarder à la plus vielle dete. Autresi est il se il a paié .xv. livres et il dit que les .x. sont por l’un et les .v. por l’autre ; et se il n’en dit rien, les .x. seront par la plus vielle dete et les .v. por l’autre.

Ponponius dit : cil qui fut fez oirs d’une partie d’un heritage paia .x. livres que li morz avoit promises ; il est quités de tant comme il apartient à la partie que il a de l’eritage, mes il demandera as autres tant comme il en afiert à leur parties. Mes se une partie de l’eritage li eschiet ainz que il la demant, il sera obligiez par cele partie. Et por ce croi je que excepcion de tricherie li nuira se il demande arriere ce qui en afiert à cele partie.

Ulpians dit : en totes manieres de delivrances, tuit li atachemant sont delivré, si comme li plege et li gage et les choses obligees ; fors quant les choses au creanciers et celes au plege sont assenblees ensenble, car por ce n’est pas li deteurs delivrez.

Marcians dit : il avient aucunne foiz quant l’en paie deners que dui obligemant sont osté en une ovre par un meisme paiemant ; si comme quant aucuns a vendu à son creancier son gage por sa dete, se il li paie puis ce que il li doit, il oste l’obligemant de la vente et celui de la dete. Et se uns orfelins a enprunté deners sanz l’autorité à celui qui l’avoit en garde, et li creanciers li lesse un lés en son testamant soz tel condicion « se il rent les deners que il li presta », il senble que il li presta par .ii. causes : por aquiter soi de sa dete, si que il soient conté à l’oir que il ne puisse user us de la loi que retaille les lés, et por acomplir la condicion que li lés soit renduz. Et se li usaires des [167rA] deners est lessiez à aucun, il avient que quant li oirs li baille il s’aquite de ce qui li fut commandé ou testamant et oblige celui à qui il les baillé à rendre les quant li usaires faudra. Autresi est il se il est commandé à l’oir que il vende aucunne chose ou la baut à loage ; car quant il le fet, il s’aquite do testamant et oblige à lui celui à qui il vent la chose ou baille à loage.

Ulpians dit : satisfacion est contee por paiement.

Gaius dit : il loist à chescun à paier por aucun sanz son seu ou malgré suen ; car il est establi au droit citeian que la condicion à chescun puet estre amendee sanz son seu ou malgré suen.

Paulus dit : la parole do paiement apartient à tote delivrance comment que ele soit fete, et ele est plus raportee à la sustance de l’obligemant que à la paie des deners.

Marcians dit : ce qui est promis à terme puet maintenant estre paié ; car l’en entant que toz li tens qui est jusque au terme est donz au deteur por aquiter soi.

Modestins dit : autresi comme quitance destroit totes les auctions qui apartenoient devant, fet li assenblemanz des biens ; car se li deteurs est oirs au creancier, ce que li bien sont melé tot totes les aucions.

Cil moismes dit : se cil qui a eu un orfelin en garde li a rendu quanque il li devoit por cause de la garde, et li orfelins donne à aucun aprés un po de tens les auctions que il a contre celui qui eissi s’est aquitez, cist dons est nus, car les aucions sont nules. Mes se ce fut fet ainz que il paiast, ou puis que il ot promis que il dorroit ses auctions, et cil paia dedanz ce, et aprés li orfelins donna les auctions, eles sont totes sauves à celui à qui il les avoit donees ; car senble melz el darrener cas que li pris des auctions qui sunt donnees ait esté paiez, que il ne fet que les auctions qui apartenoient avant soient destroites.

Ponponius dit : selonc ce que chescuns marchiez est doit estre paiez ; si comme se nos avons fet marchié d’aucunne chose, ele doit estre paie. Et quant nos fesons aucunne convenance par paroles, li obligemanz doit estre depeciez ou par chose ou par paroles ; par paroles si comme par quittance ; par chose si comme quant chescuns paie ce que il promist. Et quant achaz ou vente ou aloemanz est fez por ce que puet estre fet par un consentement, il puet estre depecié par un consentement.

Papinians dit : se cil [167rB] à qui ses deteurs paie autrui deners a les deniers toz sans, et il demande ce que l’en li doit, et ne rant pas ce que il a receu, il sera mis arriere par excepcion1 de tricherie. ¶ {1} Se je preste ou paie deners qui sunt comun à mo‹i› et à autre, auction ou delivrance n’est maintenant par ma partie, comment que la compoignie soit ou chascun des deners ou en tote la somme. ¶ {2} Et se plege paie autrui deners por cause de plevine, se il sont despendu il puet pledier par auction de commandemant à celui por qui il estoi plege. Et por ce, se il paie les deniers que il avoit toluz, il pledera par auction de commandemant quant il en avra satisfacion fet à celui à qui il les avoit toluz. ¶ {3} Favians mande saluz à Pampanian. Quant Tyces devoit à Sey une quantité certaine por cause de lés, et il li devoit autretant por autre cause que il ne poest demander, li sers Tyce qui s’entremetoit de ses besoignes paia à Sey sanz son seignor une some qui bien peust soffire à la quantité d’une des detes, et li dit que il li paioit en aquit de tot ce que ses sires li devoit. Je demant por quel cause il senble que ce qui est paié soit receu. Et la responsse est que se Sey eust dit à Tyce que il li paiast en aquit de sa dete, l’en entendist par non de la dete le lés, et ne mie les deners qui ne poient estre demandé ; mes puis que il eust paié icele dete, il ne la peust pas demander arriere. Mes quant li sers Tyce fu establiz à procurer ses choses, il ne senbla pas que il li commandast à paier ses deners qui ne devoient pas estre paiez et de coi il se poest defendre par excepcion ; ne plus que li sers puet paier les deners de son chetel por cause de plevine où il n’entra pas por chose qui apartenist à son chastel.

Cil moismes dit : quant uns hons doit por plusors causes et il paie deners, si que il ne dit pas por la quel cause ce est, l’en les contera premerement en cez qui sont deu soz male renomee, et puis en cez qui sont deu soz paine, et puis en cez qui sont deu seur gage. Et si les doit l’en premerement conter en cez que il doit conter por lui que por autre, et li ancian juigerent ce por ce que il senble que sages deteurs le feroit issi. Et s’il n’i a nules de cez choses, la plus vielle dete sera avant paie. Se li deteurs paie plus deners [167vA] que une des detes ne monte, la plus vielle dete sera quite et ce qui remaindra de la paie sera conté en aquit de l’autre enprés.

Paulus dit : li creanciers ne doit pas estre contrainz de prendre danrees por deners, se il i puet avoir domage.

Mecians dit : se cil qui doit deners por plusoz causes paie deners sanz dire por la quel il a paié, Julians dit que l’en doit croire que il paie por cele de quoi il poit estre contrainz el tens que il paia.

Paulus dit : ce que nos disons de l’oir, qui doit rendre au plege au mort ce que il li a paié, ainz que il ait receu l’eritage, doit estre entendu o aucun atenprement de tens ; car il ne doit pas recevoir l’eritage si comme il vient d’anterrer le cors.

Gaius dit : autre chose est que l’en puisse paier à Tyce par la droiture de la convenance, et autre chose que je l’otroi après ; car quant l’en li puet paier par la droiture de la convenance, je ne puis pas deffendre que l’en ne li paiet. Mes se je otroi puis que la convenance fut fete que l’en li paiast, l’en ne li paiera pas par droit. Se je deffant ainz que l’en li pait, que l’en ne li pait pas.

Ponponius dit : obligemenz de paroles est depeciez ou naturelment ou citeinement. Naturelment si comme quant l’en paie la chose qui fut promisse, ou quant ele lesse à estre sanz les corpes à celui qui les promist ; citaienement si comme li uns clame l’autre quite, ou les choses à l’un et à l’autre vienent en une meisme persone.