XVII. De tort fez et de libelle qui est fez por doner mauvese renomee [rubr.]

Ulpians dit : l’en apele generaument tort ce qui n’est pas fet à droit ; et especialment est apelz tort fez ledengement. Aucunne foiz entent l’en par non de tort fet le domage que aucuns fet en sa corpe, si comme nos solons dire en la loi qui fet restorer les domages. Aucunne foiz apelons nos tor desloiauté, car quant aucuns done desloial sentence, il fet tort. Et ce que il fet est sanz droit et sanz jostice. ¶ Ledengemenz est autresi comme despiz. ¶ {1} Labeo dit que tort est fez ou par chose ou par paroles ; ‹…› par paroles quant l’en ne met main sus nul home ne sus sa chose, si comme quant aucuns est lesdangiez. {2} Et tote maniere de tort est sus cors ou seur digneté ou seur male renomee ; seur cors si comme quant l’en fiert ou bote aucun ; seur digneté si comme quant l’en tost à une feme son mari qui est en aucunne digneté ; seur male renomee quant l’en velt despuceler une feme par force.

Paulus dit : mes se torz est fez à l’ome, sa feme n’en puet pas pledier ; car li home doi[175vA]vent deffendre les femes et ne mie les femes les homes.

Ulpians dit : il a esté raconté que tuit cil qui puent soffrir tort fet le puent fere. {1} Neporquant, aucun sont qui ne le puent fere, si comme li forsenz et cil qui a moins de .xiiii. anz qui ne set encore que tricherie est ; car torz puent estre fez à cez mes il ne le puent fere. Por ce que torz est fez par corage de tort fere, l’en doit dire que se cist botent aucun ou il le ledeingent, il ne senble pas que il facent tort. {2} Et issi puet estre fez torz à celui qui n’a point de sens, mes il ne le puet pas fere se il ne set que il fet tort et à qui il le fet. {3} Et por ce, se aucuns fiert un autre par geu ou il le bote, il n’est pas tenuz par aucion de tort fet. ¶ {4} Se aucuns bat un franc home por ce que il cuide que il soit ses sers, il n’est pas tenuz par aucion de tort fet.

Paulus dit : se ge voloie ferir mon serf, et ge te feri malgrié mien, qui estoies delz moi, je ne sui pas tenuz par aucion de tort fet.

‹…› por ce que il dit que il a esté batuz ou botez, ou que l’en a entré en sa meson. Cele loi done aucion por trois causes, ce est quant aucuns est botez ou batuz ou l’en a entré en sa meson. ¶ Il apert donc que toz li torz qui est fez à la main est compris en ceste loi. {1} Il a tel difference entre boter et batre, si comme Offilius dit, que batre est o dolor et boter est sanz dolor. ¶ {2} Nos devons entendre meson non pas tant solement la proprieté de la meson mes le hergergement. Et por ce, se aucuns habite en sa propre meson ou en cele que il a aloee ou qui li est prestee, ceste loi avra leu. {3} Et se aucuns habite en granche ou en loge qui soit en cortiz, l’en doit dire ce moisme. {4} Et se li sires avoit baillié à loage le champ où li torz fu fez, il n’en pledera pas mes li coitiverres. {5} Et se l’en entre ou champ à son seignor qui est coitivez, Labeo dit que li sires dou champ n’a pas aucion par ceste loi ; car il ne puet pas avoir son herbergement en totes ses mesons. Et je croi que ceste loi apartient en totes les habitacions en coi li sires puet habiter, ja soit ce que il n’ait pas por tot son manoir. ¶ Et se1 aucuns demore à Rome por apprendre, sanz dote il n’i a pas her[175vB]bergement ; et neporquant, l’en puet dire que se l’en entre en sa meson, ceste loi a leu, mes ele n’apartient pas as ostex où l’en ne demore que une nuit, mes à cez où l’en est à plus lonc terme. ¶ {6} L’en demande se li peres puet pledier par ceste loi por le tort qui a esté fez à son fil qui est en baill. Et il plest à toz que il n’en puisse pas pledier, mes l’aucion de tort fet qui est donnee par le prevost apartient au pere, et cele qui est donnee par ceste loi apartient au fil. ¶ {7} Li filz qui est en bail puet pledier par ceste loi por totes causes, ne il ne doit pas doner caucion que ses peres avra estable ce que il fera ; car Julius escrit que li filz qui plede par aucion de tort fet ne doit pas estre contrainz de doner caucion. ¶ {8} N’est ostroié par ceste loi que li demanderres se meste seur le seremant au deffendeor, si que li deffenderres vut que il n’a pas fet le tort. ¶ {9} Se aucuns escrit ou ordene ou mis avant libelle qui apartiegne à la male renomee à aucun, ou il la porchacie par tricherie que aucunne de cez choses soit fete, ja soit ce que il l’oit fete en autre non, il est commandé en la loi que il ne puisse porter testemoine ne fere testamant. ¶ {10} Par cele meisme paine est tenuz selonc le consoill au senat cil qui met avant – en grieu – ou sanz escriture aucunne chose qui apartient à diffamer aucuns, et cil qui porchace que aucuns soit achetez ou venduz. {11} Et se la persone qui est acusee est franche ou serve, cil qui l’acussa par cel libelle doit estre condempz selonc la maniere de la sustance à la persone qui est acusee, si comme li juiges juigera.

Paulus dit : la grandeur de la plaie fet la cruelté dou tort fet ; et aucunne foiz croit il por le leu où la plaie est, si comme quant ele est en l’oil.

Ulpians dit : mes por ce que nos disons que torz fez est plus cruel par chose, l’e‹n› demande savoir mon se ce est quant li torz est fez au cors tant solement, ou quant il est fez en autres choses, si comme en robe desciree ou en compoignon tolu ou en ledenge dire. Et Ponponius dit que, sanz atochier à la persone, puet l’en dire que li tors fez est cruelx. {1} Car se aucuns fiert ou navre aucun legierement en place ou en marchié, il fet cruel tort. ¶ {2} Il a po de difference se tex torz est fez à celui qui est en baill ou à celui qui en est hors, car il est juigiez à cruel forfet. ¶ {3} Se aucuns sers a fet [176rA] un tort cruel, se ses sires est presanz, l’en en puet pledier à lui ; et se il n’est presanz, li sires doit estre bailliez au prevost qui le sozmete à torment. ¶ {4} Se aucuns assoie à oster à feme chastoe ou à home ou à naturelement franc ou à celui qui a esté franchiz, il sera tenuz par aucion de tort fet. Et se il est sers, ceste aucion avra leu.

Paulus dit : l’en assaie à tolir chastee quant l’en velt fere que cil qui est chastes ne soit pas chastes.

Gaius dit : se aucuns velt ramener aucun en servage qui soit en franchise, et il set bien que il est frans, ne il ne le fet pas por garder la droiture que il a de chalongier le, il est tenuz par aucion de tort fet.

Ulpians dit : Labeo demande se aucuns met home hors do sans par medecinement ou par autre maniere, savoir mon se aucion de tort fet i a leu. Et il dit que oïl bien. ¶ {1} Se aucuns n’a pas esté toichiez mes la main a estee levee seur lui et il a esté espoentez autresi comme se l’en le vosist batre, aucion de tort fet li apartient. ¶ {2} Li prevoz dit : « je donroi juigement contre celui qui a dit ledanges à aucun contre bones mors, ou qui a fet par sa tricherie que autres li ait dit ». {3} Labeo dit que ledengemenz est tort fez. {4} Ledengemenz est fez quant pluseurs vilaines paroles sont dites à aucun. ¶ {5} Mes li prevoz dit contre bones mors, et por ce mostre il que toz ledengemenz n’est torz fez, mes cil qui est contre bones mors, ce est qui apartient à diffamer aucun. ¶ {6} Il moismes dit contre les bones mors, et ce doit estre entendu non pas tant solement contre les bones mors à celui qui dit les lesdanges, mes generalment contre les bones mors à tote la cité. {7} Labeo escrit que ledengement puet estre fez non pas tant solement à celui qui est presanz mes à celui qui est hors do païs ; et por ce, se aucuns vient à ta meson quant tu n’i est pas et il te ledenge, il te fet tort. Et ce moismes doit l’en dire se il dit vilenie de toi en une assenblee ou en une taverne. ¶ {8} Cil qui mesdit tant solement ne fet pas le ledangement, mes cil qui semont autre de mesdire. ¶ {9} Ceste parole à aucun n’i est pas mise sanz reson ; car se aucuns ledenge, et l’en ne set qui, il n’i a point d’aucion. ¶ {10} Se aucuns a esté en porchaz que uns autres fust ledengiez et il n’a pas esté ledan[176rB]giez, il n’i est pas tenuz. {11} Et de ce apert il que toz mesdiz n’est pas ledengemenz, mes cil sanz plus qui est diz o noise ; {12} qui que le die, ou uns ou plusors, ou qui est entre genz ; ne o noise n’est pas proprement lesdengemenz, ainz est dit por diffamer. ¶ {13} Se l’en demande consoil à aucun, à estrelogien ou à aucun devineur, et il dit que telx est lerres qui n’est pas lerres, l’en porra pledier à lui par aucion de tort fer. {14} L’aucion qui nest de ledengement ne doit pas estre donee as oirs ne contre les hoirs. ¶ {15} Se aucuns ledange femes se eles sont vestues de robes à foles femes, il ne mesfet pas tant assz comme se eles fussent vestues de robes à prode femes. Se feme n’est donc pas vestue de robe à prode feme, et aucuns la claime fole feme de son cors, ou il tost son compaignon, il n’est pas tenuz par aucion de tort fet. {16} Nos apelons compaignon celui qui va en sa compoignie ou qui la suit, qui que il soit, ou franc ou serf, ou home ou feme. {17} Il ne senble pas, ce dit Labeo, que cil qui li toille son compoignon qui commence à mener l’en, mes cil qui parfet ce que il a commoincié, si que il n’a point de compoignon. {18} Et cil n’i est pas tenuz tant solent que l’en moine par force, mes cil qui a amonesté son compoignon tant que il l’a lessé. ¶ {19} Cil qui li tost son compoignon n’est pas tant solement tenuz par ce bannissement, mes cil qui l’apele de folie ou qui l’en suit. ¶ {20} Apeler est asseoir par bele proiere à fere li brisier sa chastee ; mes il est tenuz par aucion de tort. ¶ {22} Autre est apeler que suivre. Cil apele qui par paroles assoie à fere li brisier sa chastee ; cil en suit qui va sovant entor li sanz mot dire. ¶ {23} Il convient que nos sachons que tuit cil qui la suivent et tuit cil qui l’apelent ne puent pas estre tret en cause par cest bannisment ; car se aucuns le fet par geu, ou par servir honestement, il n’en chiest pas en ce bannissement, mes cil qui le fet contre bones muerz. ¶ {24} Je2 croi que li espossiez puet estre receuz à pledier par aucion de tort fet ; car li torz qui est fez à s’apousee li torne à depit. ¶ {25} Li prevoz dit : « nule chose ne soit fete por diffamer ; et se aucuns fet contre ce vengence, en soit prinse selonc ce que la chose [176vA] sera ». ¶ {26} Labeo dit que cist bannissemenz est por nient proposez, por ce que nos en poons pledier par la general cause de tort fet. Mes il senble à Labeo, et voirs est, que li prevoz vost parler especiaument de cele chose ; car ce sont choses notables et se eles ne sont notees especiuament, il senble que eles soient despités. {27} Li prevoz deffendi generalment que nule chose ne fust fete por diffamer autrui. Et por ce, se aucuns fet ou dit chose par coi autres soit diffamz, aucion de tort fet avra leu contre lui. Ce sont les choses que sont fetes de coi male renomee vient : se aucuns se vest de vesteure lede ou ordre, ou lesse croistre sa barbe ou ses chevous por gaber autrui, ou il escrit ou dit ou chente aucunne chose contre la renomee à aucun. ¶ {28} Ce que li prevoz dit : « et se aucuns fet contre ce vengance, en sera prise selonc ce que la chose sera », doit estre issi entendu que la vengence au prevost soit plus pleniere. Et se aucunne chose le muet, ou par celui qui plede par aucion de tort fet, au par devers celui à qui il plede, ou par devers la chose, ou par devers la qualité dou tort fet, il n’oie pas celui qui demande. ¶ {29} Se aucuns a baillié libelle au prince, ou à aucun de sa mesnie por acuser aucun, et il ne porsiet pas le plet, Papinians dit que l’en puet pledier à lui par aucion de tort fet. ¶ {30} Il meismes dit que cil qui vendi la venture de la sentence, autressi comme se il deust paier deniers, doit por ce estre castiez par le prevost o bastons, autresi comme se il fust condempnz par aucion de tort fet ; car il senble que il a fet tort à celui qui dona la sentence. ¶ {31} Se aucuns a porpris les biens à un autre, ou3 une sole de ses choses, il est tenuz par aucion de tort fet. ¶ {32} Et se aucuns velt vendre autrui chose, et il dit por moi diffamer que je li ai baillié en gage, Servius dit que je puis pledier à lui par aucion de tort fet. ¶ {33} Se l’en apele celui qui rien ne li doit son deteur por fere li tort, il est tenuz par aucion de tort fet. ¶ {34} Li prevoz dit : « se aucuns bat autrui serf contre bones mors, et il dit que il l’a fet par le commadement son seigneur por fere enqueste, je donroi juigement contre lui. Et se l’en dit que aucunne [176vB] autre chose i ait esté fete, je en donroi juigement quant la cause sera coneue ». ¶ {35} Se aucuns fet tort à serf por fere le à son seignor, il me senble que li sires puet pledier en son non par aucion de tort fet. ¶ Se il ne le fist pas par l'otroi(?) son seignor, li prevoz ne doit pas lessier sanz vengence le tort fet qui a esté fez au se‹r›f ; meesment se ce fu por fere enqueste. ¶ {36} Se aucuns a batu le serf qui estoit communs à lui et à un autre, il n’est pas tenuz par aucion de tort fet ; car il l’a fet comme ses sire. {37} Et se cil qui en avoit l’usaire l’a fet, li sires n’en pledera pas à lui ; et se li sires l’a fet, cil qui a l’usaire n’en pledera pas. ¶ {38} Il dit contre bones mors, car tuit cil qui les batent n’i sont pas tenu, mes cil qui les batent contre bones mors ; et se aucuns les bat por chastier le ou por amender, il n’i est pas tenuz. {39} Et por ce demande Labeo : se uns mestres d’aucunne baillie bat mon serf, savoir mon se je en puis pledier contre lui, autresi comme se il l’eust batu contre bones mors. Et il dit que li juiges doit enquerre que li sers4 fesoit quant il le bati ; car se il le bati por ce que il essioit à avoir ennor et biaus aornemenz et que s’esgaioit, il doit estre assous. ¶ {40} L’en dit que cil bat qui fiert des poinz. ¶ {41} Nos apelons « enqueste » torment et doleur de cors por fere reconoistre verité. Nue demande et legier espoentement n’apartient donc pas à cest bannissement. {42} Se aucuns fet donc enqueste par le commandemant au seigneur, et il passe mesure, Labeo dit que il est tenuz par aucion de tort fet. ¶ {43} Li prevoz dit : « se l’en dit que aucunne chose ait esté fete, je en donroi juigement quant la chose sera coneue ». Et por ce, se uns sers est batuz ou tormentez por fere enqueste, aucion de tort fet apartient contre lui qui ce fist sanz connoistre la cause. Mes se autres torz li a esté fez, ele n’apartient pas devant que la cause soit conneue. {44} Car li prevoz ne promet pas juigement el non do serf por totes manieres de tort fet ; car se il est legierement feruz, ou uns legiers mesdiz li est diz, li prevoz n’en done pas aucion. ¶ Mes se il est diffamz par aucun mesfet ou par aucunne chose qui soit escrite, je croi que la conoissance de la cause [177rA] doit estre offerte au prevost et la qualité dou serf ; car il a moult à gart quex li sires est ou bons ou mauvés, ou fos ou sages. Li prevoz prendra donc garde au tort qui est fez et à la persone à qui il est fez ; et issi otroiera il que aucion en soit meue ou il le deffendra. ¶ {45} Li torz qui est fez au serf retorne aucunne foiz à son seigneur et aucunne foiz n’i retorne pas. Car se li sers le tint por franc, et cil qui li fet le tort ne savoit pas que il fut mis sers, et se il le seust il n’en eust point fet, Mela escrit que je ne puis pas pledier à celui qui li fist le tort. ¶ {46} Se aucuns a pledié par aucion de tort fet por son serf qui a esté batuz et il plede aprés por le domage, Labeo escrit que ce n’est pas une meisme chose, car l’une aucion apartient au domage que aucuns fet en ses corpes et l’autre au despit. ¶ {47} Se je ai l’usaire d’un serf et tu en as la proprieté et il est batuz ou enqueste fut feste par lui, aucion de tor fet apartient plus à toi que à moi. ¶ {48} Autresi est il se l’en bat ton serf que je porsoie par bone foi, car l’aucion en apartient plus à toi que à moi. ¶ Et se aucuns bat le franc home qui me servoit par bone foi, il convient destinter, car se il le fist en despit de moi, aucion de tort fet m’apartient ; autresi est en autrui serf qui me sert en bone foi, si que totes les foiz m’apartiegne aucion de tors fet que li tortz li est fez en despit de moi. Et se li torz est fez por le serf, l’aucion en sera donnee à son seigneur ; autresi puet l’en distincter en celui qui en a l’usaire. ¶ {49} Se je bat le serf à pluseurs, il est certaine chose que aucion de tort fet apartient à toz els contre moi.

Paulus dit : il n’est pas biens ne droiz que cil qui a acusé malfeteur soit condempnz por cele chose ; car il est bone chose que li pechiez as malfeteurs soient puni et seu. ¶ {1} Se uns sers a fet tort à un autre serf, l’en en doit pledier autresi comme se il l’eust fet à son seigneur. ¶ {2} Se torz a esté fez à la fille mariee qui est en la poeté son pere et ses peres et ses mariz en pledent, Ponponius dit par droit que cil qui fit le tort doit estre condampnz au pere en autretant comme il fut condempnz se ele fust veve, et au mari en autant comme il fust condempnz se ele ne fust à nul ho[177rB]me. Et se feme mariee n’est en la poesté à nul home, por ce se sis mariz plede en son non de tort qui li a esté fez, ne remaint pas que ele n’en puisse pledier en son non. ¶ {3} Se cil qui ne me conoist pas me fet tort, ou il cuide que je soie Tyce et je suis Sey, il est certaine chose que il me vost fere le tort ; car je sui bien certains qui je sui, ja soit ce que il cuide que je soie uns autres ; et por ce ai ge aucion de tort fet. ¶ {4} Se aucuns cuide que cil qui est en bail en soit hors et il li fet tort, il ne senble pas que il le face au pere, ne plus que cil le fet au mari qui le fet à sa feme et cuide que ele soit veve ; car li torz n’est pas fez en leur persone ne cil qui le fist n’ot regart fors à celui à qui il le fist, autresi comme se il fust hors do baill. {5} Et se il savoit bien que il estoit en baill, mes il ne savoit à qui, sis peres en porra pledier en son non ; et autresi en puet li mariz pledier se cil qui fist le tort à sa feme savoit bien que ele estoit mariee mes il ne savoit à qui ; car desque il savoit ce, il est certaine chose que il voloit fere tort au pere ou au mari qui que il fussent.

Gaius dit : se mes creanciers à qui ge fui apareilliez de paier semont mes pledes en despit de moi, il est tenu à moi par aucion de tort fet.

Modestius dit : se uns creanciers seigne la meson à son deteur por cause de fere li tort sanz l’autorité à celui qui avoit poer d’ostroier le, li deteurs porra pledier à lui par aucion de tort fet.

Sabins dit : li pris de tort fet ne doit pas estre fez selonc le tens en coi la sentence est donnee, mes selonc celui en coi li torz fu fez.

Ulpians dit : se frans home est pris comme fuitif, il puet pledier par aucion de tort fet.

Paulus dit : se aucuns entre en autrui meson malgré à celui qui ele est, l’en en puet pledier o lui par aucion de tort fet.

Ulpians dit : se aucuns deffant un autre que il ne vende son propre serf, cil en puet pledier par aucion de tort fet.

Cil meismes dit : se l’en a geu à serve par force, aucion de tort fet en sera donee à son seigneur ; ou se ele a esté celee, ou aucunne chose li a esté fete par corage d’embler, aucion de larrecin li apartient. Et se aucuns a despucelé feme [177vA] ainz que ele soit en aage, aucun cuident que l’aucion de la loi qui fet restorer les domages li apartiegne.

Paulus dit : se aucuns siet que uns enfes soit mes fiz ou mes sers et il le fet joier, ja soit ce que li enfes s’i consente, neporquant il senble que torz me soit fez, si comme se il le fet joier as tables o à autre geu. Mes ce puet avoir leu totes les foiz que cil qui li amoneste a corage de tort fere ; se cil qui ne set qui est sires à celui que il a amonesté puet doner mauvés conseil, et por ce est necessere l’aucion de serf corrumpu.

Cil meismes dit : se l’image ton pere qui estoit seur son monument est depecee à pierres, Labeo escrit que tu n’en puez pas pledier par aucion de sepulcre brisé mes de tort fet.

Ulpians dit : aucion de tort n’est pas contee en noz biens devant que li plez soit entamnz.

Paulus dit : se tu franchis ou estranges le serf par quoi aucion de tort fet t’apartient, l’aucion te remaint.

Ulpians dit : l’en set bien que aucion n’apartient pas au serf qui est franchiz por le tort qui li fu fez tant comme il fu en servage, ja soit ce que li filz qui est hors do baill ait aucion por le tort qui li fu fez tant comme il fu en baill. {1} Neporquant, li torz fez ne doit pas estre proisiez par un meisme pris en la persone au pere et en cele au fill.

Paulus dit : quar il puet avenir por la digneté au fil que graindres torz est fez à lui que au pere.

Ulpians dit : il ne loist pas as metres à fere aucunne chose à tort. Se uns metres fet donc aucunne chose à tort ou comme bas hom, ou por fiance de sa digneté, il puet estre trez en cause par aucion de tort fet. Mes l’en dote se ce est tant solement comme il est en la metrise ou quant il l’avra lessie. Mes il est voirs que, se la metrise est tele que il ne puisse estre apelz en droit, il convient entendre tant que il en soit hors. Et se ce est de meneurs metrises, ce est de celes qui sont sanz juridiction, il puet estre trez en cause tant comme il sunt en la metrise.

Paulus dit : se aucunne chose est fete selonc bones mors por anorer la chose commune, ja soit ce que ele tort au despit à aucun, neporquant, desque li metres ne li fist pas por tel penssé, il n’ost pas tenuz par au[177vB]cion de tort fet.

Gaius dit : se pluseur serf ont batu ensenble aucun ou il l’ont ledengé ensenble, li mesfez est propres à chescun ; et de tant comme il furent plus à fere, le mesfet est il graindres. Et encor puet l’en melz dire que il i a autretant de mesfez comme il i a de malfetors.

Julians dit : se je voill pledier au pere el non dou fil par aucion de tort fet et il done procurator, il ne senble pas que li filz soit deffenduz se caucion n’est donee de paier ce qui sera paié. Et por ce sera donnee l’aucion contre le fil autresi comme se li peres ne le deffendist pas.

Marciaus dit : il est contenu as establissemenz as princes que les choses qui sont mises en commune remembrance por diffamer aucun soient esfacies.

Scevola dit : il est establi el consoil au senat que nus ne port l’image l’enpereor por fere tort à autre ; et qui fera contre ce soit mis en communs leus.

Marciaus dit : li sainz enpereres Sevoirs escrit eissi à Diogene : « cil qui est dampnz de cruel tort fet ne puet pas estre en l’ordre de curials ; ne l’error au prevost ne te doit rien valoir, ne cele à celui qui prononça de toi aucunne chose, ou à cez qui contre la forme de droit cuident que tu remainsisses en l’ordre des curials ».

Neraces dit : se toz a esté fez au fil, l’en ne doit pas deffendre au pere que il n’en plede en deus juigemenz en son non et el non au fil.

Paulus dit : il ne convient pas que cil qui apelent lesdengent les juiges, et se il le font il sont diffamé.

Gaius dit : cil qui muet à tort aucion de tort fet soit envoiez en essil ou mis hors de s’ordre.

Jabolenus dit : se cil qui esta en la meson de soz fet fumee qui grieve celi qui est en cele desus, ou cil qui est en cele desus giete ou espant aucunne chose en cele de soz, Labeo dit que l’en n’en puet pas pledier par aucion de tort fet. Mes ge croi que ce soit faus se ce fu par corage de tort fet.

Hermogenes dit : l’en selt establir por tort fet paine hors d’ordre, selonc la cause et selonc la persone ; si que li serf sont batu et puis rendu à leur seigneurs, et cil qui ont esté franchi sont chastié par batement ou par eissil temporel, ou par deffensse d’aucunne certaine chose.