École des chartes » ELEC » LI DIX-HUITIESMES LIVRES » VII. De pleiges.
[p. 274]

VII. De pleiges.

§ 1.

L'en dit ci que hons, quant il est plège à autres segont la costume, et li termes est passez de la dete, et cil qui la dete est demende ses gages, il la doit baillier, et la li doit fere baillier, et la li doit fere valoir as nuiz : et puis les puet vendre en bone foi, par si que li autres les ait dedanz les nuiz, s'il les puet renbre. Et s'il ne li viaut baillier ses gages, cil cui la dete est puet prendre ses gages sanz jotice ; et se cil li esqueut, il amendera à la jostice.

§ 2.

L'en puet bien plévir par condicion et par convenances autres que la costume ne done.

§ 3.

Uns hons dit issi : Gautier est mes plège por Robert de vingt livres que Robert me devoit, do terme qui est passez ; ge demende ses gages, il ne me les vot baillier ; ge les pris ; il les me queneust : si requier [p. 275] que vos me façoiz ses gages baillier, et amender la vilenie que il m'a fete. A ce Robert respont, et dit que il ne fut onques ses plèges ; et cil l'offre à prover par soi et par garanz, qui sont prez do motrer et de l'avérer, qui li virent la plévine fere. Et cil fist encontre tel ni et tel deffensse comme il doit. Et l'en respont qu'en tel chose a bataille selonc ces moz.

Or demende l'en se li plège est vaincuz, qui a nié que il n'iert pas plège en juigement, se li detes est tenuz à lui sodre : Et l'en dit que oïl ; car s'il n'en estoit tenuz, il seroit riches d'autrui avoir. Mès la jotice doit punir le plège, segont ce que droit le done, si que autre ne s'amorde pas à fere tel tricherie.