École des chartes » ELEC » LI DIX-HUITIESMES LIVRES » XXIV. De paines.
[p. 277]

XXIV. De paines1.

§ 1.

Cil juige qui martirent aucun à tort, li martyres de celui qui est livrez à martyre est tost passez ; mès li martyres de celui qui le martyre dure tozjorz.

§ 2.

Li sages escrit que l'en ne doit condempner nul home por sopeçon ; car melz est que l'en lest à punir les mesfeteurs, que il n'est que l'en condenpne ceus qui n'ont riens mesfet2.

§ 3.

Cil qui juige det regarder que il n'establisse nule chose plus âprement ne plus molement, si comme la cause requiert ; car il ne doit pas coivoitier la gloire d'estre trop roides, ne trop débonaires ; ainz doit fere droit juigement, et establir segont ce que chascune cause requiert3.

§ 4.

Li crimes dou père ne puet de rien grever le fil ; car chescuns est corpables de son crime, ne nus n'a aide de son mesfet : et issi l'escritrent li saint frère4.

§ 5.

Cil qui sont dampné à aucune paine, et il sont pris contre l'establissement de la paine, et il soient alé encontre, et il sont pris, en ce la poine doit doblier5.

§ 6.

Nus hom ne doit soffrir painne de sa pensée6. Li encien furent mov, et cil qui sostenoient les droiz orent grant cure que li home ne s'esmeussent pas ligièrement à plédier ; et nos-meismes en avons grant penssée, por ce meismement que le fol hintement à ceus qui plèdent, et à ceus à qui l'en plède, est aucune foiz refrénez par paine. Et por ce est-il resons que paines soient establies par sept manières : la premère, par cause ; la segonde, par persone ; la tierce, par lieu ; la quarte, par tens ; la quinte, par quantité ; la siste, par qualité ; la septime, par aveinture.

[p. 278] Par cause si est, quant aucuns fiert aucun. Par persone, si comme une persone est plus dine que autre, et mains maufesanz. Par lieu, si comme l'en mesfet devant juige, ou en yglise, on en saint leu, ou en marchié, ou foire. Par tens, si comme l'en meffet de jorz et de nuiz, ou as sainz jorz ou as saintes nuiz. Par la qualité est li fez plus griex ou plus légiers ; et por ce regarde l'en se li larrecins est fez aperz ou repoz. Par quantité, si comme se aucuns fet un petit forfet ou un grant. Par avainture, si comme aucun gite un glaive ou une pierre, et il blece aucun ; s'il le fist por cause de forfere, ou por cause d'avainture7.

§ 7.

Tiés sont les paines en la duchie d'Orliens : qui fet contre establissement de prince, il doit soixante sols de paine. Et se il est prévoz ne justice, ou baillif, la poine est à la volenté le roi.

Qui tret autre en plet devant autrui juige que le sien, est en soixante sols de paine.

Se aucuns a gagie à jor aucune chose devant jostice à aucun, et il ne la rant, il doit cinq sols d'amende.

Se aucuns ne vient qui est semons, il doit cinq sols d'amende ; et trois foiz despisanz, se il se deffaut, l'en prendra le sien, et plèdera le sien tenant.

Qui fera force, ne destorbera aucun que il ne vienge à son jor, il l'amendera de soixante sols.

§ 8.

Li procurator et li deffendeor qui seront repris qu'il auront tricherressement fet ce qu'il auront à fere, seront en la merci le roi de leur meubles.

§ 9.

Se aucuns demende aucun héritage ou meubles, sanz ce que bataille soit juigée, cil qui enchiet doit vingt deners de la clamor ; et se bataille est jugée, cil qui enchiet doit neuf (livres) por le chanp, et pert loi.

§ 10.

Qui a usage et en use tricherressement, il le pert. Se beste à quatre piez fet domage, ele est perdue par le forfet, ou li sires qui ele est, se il la veut avoir, il amendera le domage.

§ 11.

Se d'aucune meson est gitié ou espandu aucune chose, cil qui [p. 279] aret en la meson est tenuz d'amender le domage, ausi comme de forfet. Qui arache bonnes, tuit si bien sont en la merci le roi.

§ 12.

Se aucuns jue ès diz, ou ès tables, et il se plaint del jeu, il doit vingt deners de la clamor.

§ 13.

Se mesurerres des chans fet fause mesure apenséement, li cors et tuit si bien est en la merci le roi.

§ 14.

Qui enterre cors en autrui leu, et seurprant terre qui n'est pas soue, rent et amende soixante sols à la jostice.

§ 15.

Qui enchiet de lesdanges et de férir autre sanz sanc et sanz chable, est en cinq sols d'emende. Et se il i a sanc ou chable, soixante sols d'amende. Et se il i a bataille juigée, neuf livres por le chanp vaincu, et quinze sols par membre blecié, et soi gari.

Là où il a amende juigée n'a point de clameur.

§ 16.

Se clameur est rendue présentement ou depriée, il i a cinq sols d'amende, et det quatre deners de preuve pardonnée autant.

§ 17.

Se aucuns est pris d'aucun petit larrecin, qui est fez par senblance de povreté, et il n'est seignez, ne forbeniz, il forjure la vile. Et se il est forbeniz d'aucun leu, l'en li fet sein ; et se il a sain, il est pendables. Et se il fet larrecin, comme de chevaus, de granz robes, et de granz choses, il est pendables.

§ 18.

Cil qui est herbergiez chiés l'oste, ou li serganz, se il enblent là inz, sont pendables ; soit petit, soit grant.

§ 19.

De murtre, de traïson, d'omecide et de rat, qui en est atainz, est pendables. De toz les fez dom hom prent mort par juigement, toz les meubles que il a en sa possession el jor del juigement, sont le roi, et tuit si héritage ; sauf le doere à la feme. Et quant la feme sera morte, li doeres remaint au roi.

§ 20.

D'arsure l'en prant mort, et d'encis. De membre tolu l'en pert membre, et tuit si bien sont le roi. De mahaigne pert toz ses biens, sauve la porvéance dou maignié. Et se aucuns n'a nus biens, en tel forfet il sueffre eissill perdurable. Ou se il a pou de biens, et se il a biens quex que il soient, si suefre-il eissill.

§ 21.

Nus ne doit estre puniz sanz cope.

§ 22.

Cil qui sont sodomite prové doivent perdre les c....... Et se il le fet segonde foiz, il doit perdre menbre. Et se il le fet la tierce foiz, il doit eslre ars.

[p. 280] Feme qui le fet doit à chescune foiz perdre menbre, et la tierce doit estre arsse. Et toz leur biens sont le roi.

§ 23.

Li avotre sont en la merci le roi, deux foiz. La tierce, il doivent aler en essil, el leur biens sont le roi, s'il en sont condempné.

§ 24.

Li fornicateur doivent estre chastié atrampéement de poine de cors.

§ 25.

Li avocaz qui par lor gloriose voiz relièvent les causes qui sunt abessies, se il font tricherie ès causes que il ont à mener, il soffreront poine de traïson.

§ 26.

Li notenier, li taverner, li ostelier, se il ne gardent ce que il recevront en cez trois lieus, et il facent tricherie, il recevront paine de traïtor.

§ 27.

Li mesureor des chans, se il font fauses mesures apenséement, et il en soient repris, il soffreront poine de traïteur.

§ 28.

Se aucuns trove aucune chose en terre ou en eue, il la doit porter à la jostice ; et se il ne la porte en tens convenable, il doit soixante sols d'amende.

§ 29.

Qui fet tort en conpoignie, et en chose baillie en garde, et en achat, et en loage, et en change des choses, sont puni en la poine que cil sont qui font tricherie en demende d'éritage, qui est devant diz en cest titre.

§ 30.

Qui esqueust son gage à celui à qui il est plège, doit soixante sols à la jostice.

§ 31.

Qui deffant euvre à fere justice, et l'en la fet sanz défanse ôtée, est en cinq sols d'amende, et est l'euvre ausint comme pas non fete.

§ 32.

Qui apèle home de servage, et ne l'en puet ataindre, est en paine de soixante livres.

§ 33.

Qui prant à force autrui chose, est en soixante sols d'emande.

§ 34.

Se aucuns brise à aucun la teste, et il guarist sainement, la grant jostice n'i a que soixante sols.

§ 35.

Se aucuns fet chevauchie à armes, à pluseurs genz, se il est chevaliers, il doit soixante livres d'amende, et garentist toz ceus que il li maine. Et se il n'est chevaliers, chascuns de ceus que il i maine est en soixante livres d'emende.

§ 36.

Qui estope chemins, ou s'emprant, ou cours d'eue, ou fontaine [p. 281] commune, ou chemin de flueve, est en paine de soixante sols, et oute l'euvre au sien, et amende domage, se il en nest.

§ 37.

Cil qui fet desloiaus assenblée de bordelerie, doivent perdre la vile, et leur biens sont le roi.

§ 38.

Qui fet contre le roi en fesant contre la pès dou pueple, doit estre ars.

§ 39.

Li fausoner de fauses monoies doivent estre pandu, et leur biens sont le roi.

§ 40.

Li baillis qui prant à tort, doit rendre ce que il prant.

§ 41.

Cil qui robe les yglises, doivent estre pandu, et leur biens sont le roi.

§ 42.

Qui apèle de juige autre deus foiz, et la tierce vient devant le chief seigneur, et est condempnez, par tot il remaint en merciz as seignors, segont ce que chescuns i a.

§ 43.

Li serganz qui emble au roi, ou au seigneur de la terre, ou au commun à qui il est serganz, il est pendables, et si bien sont au seigneur de la terre.

§ 44.

Qui ne rent son cens à jor, il doit cinq sols d'amende. Qui ne rant ventes dedans les nuiz, il doit soixante sols.

§ 45.

Qui esqueust à jostice, ou à sergant estable, doit soixante sols.

§ 46.

Li receteur sont puni comme li seignor, et li aideur, et li consenteur.

§ 47.

Cil qui brise seisine de seigneur, est en soixante sols d'emende.

§ 48.

Qui dit lesdanges devant jostice, rant quinze sols à la jostice, et cinq sols au lédengé. Et qui li fet sanc ou chable devant jostice, il i coste soixante livres, et quinze sols au lédi.

§ 49.

Qui fiert baillif ou prévost, por cause de sa baillie, est en soixante livres d'amande. Et se il i fet sanc ou chable, il est en la merci le roi. Et dou sergant de son ostel, ausint.

§ 50.

Qui prant com paagier, et il ne l'est, l'amande est de soixante sois à la jostice, et le domage au marcheant.

§ 51.

Cil qui s'en vient de l'ost avant son terme, sanz congié, sont en la merci le roi.

§ 52.

Hom ne puet avoir contre sa feme aucion de larrecin.

§ 53.

Li hons qui porchace la mort sa feme, et la feme qui porchace [p. 282] la mort son mari, cil qui en est provez, la partie de ses biens est le roi, et li autres à cause de refus.

§ 54.

Li serf qui se sunt aforcié de destruire lor seigneurs doivent estre ars.

Li sers qui renie son seigneur doit estre mis en perdurable paine.

§ 55.

Li maquerel de femes doivent estre fusté et geté hors de la vile, et leur biens sont le roi.

§ 56.

Qui cèles trovailles et choses esdirées, doit soffrir poine de larrecin, quant il fet la chose por soe.

§ 57.

Se aucuns fet chose par quoi le ligier corage as homes soient espoenté, li rois escrit que il soient envoié en essil.

§ 58.

Qui dit mal do roi, ou de la reine, ou de son consoil, vileinement, il doit estre envoié en essil, et si bien sont le roi.

§ 59.

Li baillif, li prévost, cil qui gardent les prisons qui doivent recevoir paine de leur fet, se il les lessent aler à leur copes, doivent recevoir la paine que cil receussent.

§ 60.

Cil qui portent secrié escrit à aucun, clos, et l'euvrent por savoir que il i a, doivent recevoir paine d'essill, et leur bien sont le roi.

§ 61.

Qui nafre beste, et garist, et plante an nat (et plainte en naît  :), est en cinq soz d'emende, et rent le domage souz loer.

§ 62.

Cil qui s'enfuent as annemis le roi, ou as anemis de ses conseliers, sont ars, ou pandu as forches.

§ 63.

Cil qui corrumpent les virges qui ne puent soffrir conpaignie d'ome, seront pandu, et leur bien sunt le roi.

§ 64.

Feme, se ele forfet de mahins forfez, si comme de lédanges, de férir, et de sanc et de chable, et d'amendrer (de moindres) forfez, l'amande n'est que la moitié mendre d'ome. Et des autres forfez, si comme de larrecin, de murtre, de rat, de traïson, d'omecide, menbre tolu, mahin, d'iceus forfez ele est ausint tenue comme homme.

§ 65.

Qui n'ira au ban crié, c'est à savoir à bannie d'ville, et ele ne soit nommée quele, comme de larron pandre, d'eschauguite de foire, ou sanz foire, quant à prévosté, se aucuns n'i vient, il doit cinq sols d'amende, et le domage qui est avenuz par son défaut.

Mès se granz persécucion avient, et ele est fete à savoir au pueple par bannie, et domages en avient, chascuns i est tenuz à la volenté le roi en emende.

§ 66.

[p. 283] Li degrié des paines sont tex : la première paine si est en vint deniers de clamor. La segonde si est, se li vint deners ne sont randuz, ou depliez en la place, la paine est de cinq sols. La segonde paine si est de quinze à celui à qui l'en a fet sanc et chaable, et de soixante sols à la justice. La terce poine si est d'ome envoïer en eissill. La quarte si est perdre membre. La quinte si est d'ome livrer à mort.

D'ome envoier en eissil, de perdre membre, d'ome dampné à mort, tuit si bien sunt le roi.


1 Ce titre n'est pas complètement inédit. Il a été publié, en grande partie, par La Thaumassière, à la suite des Coutumes de Beaumanoir, p. 467-470. Toutefois, nous croyons devoir le reproduire, à cause de son importance particulière, et de quelques variantes considérables.
2 Dig., lib. 48, tit. 19, frag. 5, pr. : de Pœnis.
3 Ibid., frag. 11, pr.
4 Ibid., frag. 26.
5 Ibid., frag. 8, § 7 (?).
6 Ibid., frag. 18.
7 Dig., lib. 48, tit. 19, frag. 16 : de Pœnis.