IV. De la convenance as sers [rubr.]

Julians dit : quant sers fet convenance il n’a point de difference se il la fet en son non ou el non son seignor, ou à l’un et à l’autre ensenble. ¶ {1} Se tes sers qui me servoit par bone foi avoit chetel qui apartenoit à toi et je preste à Tyce de cez deners, il seront tuen. Et se li sers fet convenance que cil me soient rendu, il ne fet rien ; mes tu le porras bien avoir se tu les chalonges. ¶ {2} Se li sers qui est comuns à moi et à toi preste deners do chetel qui n’apartient fors à toi, il n’aquiert pas à moi l’obligement. Et se il met en convenant que il soient rendu à moi par non, il ne delivre pas le deteur de toi ; mes li uns et li autres de nos avra auction, je por la convenance et tu por ce que ti denier furent presté. Neporquant, li deteurs me porra mestre arriere par excepcion de tricherie. ¶ {3} Se mes sers fet convenant que une chose soit donee à1 mon autre serf, autretant vaut comme se il feist convenant à moi moismes. ¶ {4} Li communs sers sostient la persone as ses deus seignors. Et por ce, se mes propre sers fet convenance que une chose soit bailliie au serf qui est communs à moi et à toi, il sera autresi comme se deus convenances i fussent fetes, l’une en ma persone et l’autre en la toe. Ne nos ne devons pas cuider que la moitié en soit aquise à moi et l’autre ne soit de nule valeur ; car la persone au serf commun est de tel condicion que en ce que li uns de ses seignors puent aquerre et li autres ne puet pas aquerre, tot est à celui seul qui puet aquerre. ¶ {5} Se li sers en coi aucuns a l’usaire a fet convenance que une chose soit rendue à celi qui en a la proprieté, se ce est de la chose à celui qui en a l’usaire, la convenance ne vaut rien ; car cil qui a la proprieté ne puet pas aquerre auction par la chose à celui qui a l’usaire. Mes se uns autres eust le convenant fet, il peust demander proprement. Et se celui qui promist paie à celui qui a l’usaire do serf, il est quités. ¶ {6} Se li sers qui estoit commun à Tyce et à Meve fet convenance en ceste maniere : « tu promez à donner à Tyce .x. livres as kalandes de marz ; et se tu n’i li donnes, lors tu promz [162vB] à doner à Meve .xx. livres » ; il senble que ce sont .ii. convenances. Me se les .x. livres ne sont donnees à Tyce as kalendes de marz, li uns et li autres des seignors porra pledier par la convenance ; mes por ce que li segonz obligemenz est fez à Meuve, Tyce sera mis arriere par excepcion de tricherie.

Ulpians dit : li sers qui est communs à deus seignors ne puet pas fere convenant à l’un que il soit toz à l’autre ; car il ne puet pas aquerre à son seignor lui meismes, mes l’obligement de lui.

Cil moismes dit : se li sers à la chose commune ou cil au université fet convenace, je croi que la convenance vaut.

Cil meismes dit : se li sers comuns à .ii. seignors velt que une chose soit donnee à lui et à .i. de ses seignors, autretant vaut comme se il feist convenant que ele fut donnee à ses deus seignors.

Cil moismes dit : li sers qui est communs est si à toz ses seignors que il n’est pas toz à chescun, mes chascun i a sa partie ; si que eles ne sont pas devisees, ainz i sont plus par entendement que par cors. Et por ce, se il aquiert aucunne chose, il aquiert à chescun selonc la partie que il a en lui. Et li loit à fere convenance ou aquerre el non à un d’els ‹...› se il li commande, et nos usons de ce droit, que il aquiere à celui par seul par cui amendement il aquiert.

Ponponius dit : Offilius disoit par droit que se li sers comuns preste ou baille en garde aucunne chose par le commadement à un de ses seignors, il aquiert auction à celui seul par qui commandemant il le fet.

Ulpians dit : et por ce, se uns sers à .iiii. seignors et il fet une convenance par le commandemant à deus, il n’aquiert auction fors à deus qui li commanderent ; et non pas ivelment mes selonc les parties que il ont en lui. Autresi croi je se il a fet convenance el non à deus ; car se il a fet convenance par le commandemant à toz, ou en leurs nons, nos ne dotons pas que il n’aquiere à aus toz, non pas ivelment mes selonc les parties que il i ont en lui. ¶ {1} Se li sers comuns a fet convenance à un de ses seignors, se il la fet en non d’un des autres, ce qui est promis est deu à celi seul en quel non il la fist. Mes se il fist porement sanz nommer nul de ses seignors, il en aquiert à toz ses seignors leur parties, fors à celui qui li promet la chose, et non pas ivelment mes selonc les parties que il ont en lui. ¶ Et fit convenant par le commandemant à .i. de ses seignors, il est autresi comme nos avons dit quant il l’a fet en son non. ¶ Il plet à Julians que il aquiere aucunne foiz à un seul de ses seignors, ja soit ce que il n’a fet la convenance ne par son commandemant ne en son non ; si comme quant l’en li promet aucunne chose qui ne puet pas estre a[163rA]quise à toz seignors. Et ce avient quant l’en li otroie voie à aller au champ qui est à un de ses seignors, car lors aquiert il le servise à celui seul.

Gaius dit : se li uns de ses seignors velt prendre fame et li doaires est promis à ce serf.

Ulpians dit : se li sers qui est amené et à Tyce fet tel convenant que un sers li soit donnz, qui est toz à Tyce, il aquiert tot à celui à qui il n’estoit pas ; car ce que il ne puet aquerre à l’un de ses seignors apartient tot à celui à qui il puet aquerre. {1} Et se uns sers qui avoit .ii. seignors fet tel convenance : « tu promez à donner à celui ou à celui qui sont anbedui mi seignor », Cassius dit que la convenance ne vaut rien ; et Julians s’i acorde, et de ce droit usons nos.

Julians dit : et se il dit issi : « tu promz à donner à Tyce .x. livres ou à Meue un champ » ; por ce que il n’est pas certaine chose auquel il aquiert l’auction, la convenance ne vaut rien.

Ponponius dit : se li sers qui est communs à moi et à toi fet convenence que l’en li otroit voie ou charriere par un champ, et il ne nomme ne moi ne toi et je ai un champ d’elz, il aquiert à moi seul la voie ou la charriere.

Cil meismes dit : se li sers qui est communs à moi et au chastel, que li fiz qui estoit en bail aquist par chevalerie, qui est morz, fet convenance ainz que cil de qui il a fet son hoir reçoive l’eritage, tote la convenance est aquise à moi que ai dedanz ce tote la seignorie de lui ; et cil qui n’est encore pas hoirs n’i a point de part. ¶ {1} Se li sers qui est communs à Tyce et à Meue met en convenant que la partie qui est Meue li soit donnee, la convenance n’est nule ; mes se il eust fet tel convenant que ele fust donnee à Tyce, ele fust aquise à Tyce. Et se il eust dit tant solement que la partie Meue fust donnee et il n’eust nommé ne soi ne autre, la partie Meue fut à cestui à qui ele peust estre aquise. ¶ {2} Uns sers fist convenance que une chose fust donnee à son seignor, qui estoit en chetivoisons ; et ja soit ce que ce qui li est promis simplement ou ce que il reçoit d’autre apartient à l’oir à celui qui est en chetivoison ; et il est autrement en la persone au fill qui n’aquiert pas à son pere qui est en chetivoison ce que l’en li promet, ne tant comme il est en la poesté son pere et aprés. Neporquant, l’en puet demander en ce cas savoir mon se il senble que nule chose li soit aquise à l’oir par ceste convenance, ne plus que se li sers d’un heritage eust fet convenant que une chose fust donnee au mort ou à celui qui devoit estre hers. Mes en ce cas li sers est oelmz au [163rB] fill ; car se li filz à celui qui est en prison fet convenance que une chose soit donnee à son pere, la chose sera en croele. Et se li peres muert en la chetivoison, la convenance ne sera de nule valor, car il n’a pas fet convenance por soi mes par autre. ¶ {3} Se li sers en coi aucuns a l’usaire s’est aloez jusqu’à un terme et l’en li a promis chescun an à poier un certain pris, l’aucion apartendra à celui qui a l’usaire, tant comme li usaires durra. Et quant il sera failliz, il apartendra à celui qui en a la proprieté. Et issi l’escrit Julians, et ceste sentence me senble veraie et tenable, car chescuns n’aquiert fors ce que reson li otroie. Et se cil meisme serf fet tel convenance : « tu me promz à doner tant comme je te donroi dedanz tel terme », il est en dote qui avra auction por cele convenance. Car se il baille ses deners à celui qui en a l’usaire ou de son gaing, l’aucion sera aquise à celui qui en a l’usaire ; et se il baille de cez à celui qui en a la proprieté, l’aucion sera à lui.

Senulcius dit : se uns sers communs fet tel convenance : « tu promez à donner es kalendes de genvier .x. livres à Tyce ou à Meue mes seignors, ou à celui qui lors vivra », Julians escrit que la convenance ne vaut rien ; car la chose est en crole, ne il n’apert pas au quel li obligemenz est aquis.

Heraces dit : li sers ou aucuns a l’usaire ne puet fere convenance o celui qui en a l’usaire de la chose son seignor ; mes il la puet bien fere à son seignor de la chose à celui qui a l’usaire.

Paulus dit : ce moisme doit l’en dire de celui à qui li usages est lessiez.

Heraces dit : se li usaires est à .ii., ce que il aquiert est à celui de qui chose il aquiert.

Renulcius dit : se li sers d’un heritage fet une convenance et il en prant pleige et li heritages est receuz aprés ce, l’en dotoit se li termes doit estre contez des le jor que la convenance fut fete, ou des ce que li heritages fut receuz ; autresi demande l’en se li sers à celui qui est en chestivoisons a pris pleige. Et Cassius dit que li tens doit estre contez des lors que l’en pot pledier, ou en ce est desque li heritages fut receuz, ou desque cil est venuz de cheitivoisons.

Paulus dit : se li sers qui est communs à .ii. seignors fet tel convenant : « tu promz à donner .x. livres à Tyce mon seignor, et cez meismes .x. à Meue mon autre seignor », nos dirons que il sont dui à qui une meisme chose [163vA] est promisse.

Cil moismes dit : li sers qui fet convenance en non d’autre que de son seignor, n’aquiert pas à son seignor l’obligement.

Cil moismes dit : se li sers de coi aucuns a l’usaire, ou que il porsiet par bone foi, fet convenance es causes par coi obligemenz ne selt pas estre aquis à eles, il aquiert à son seignor. Mes nos ne dirons pas ce se leur non fut mis en la convenance.

Jabolenus dit : se uns sers fut franchiz en testamant et il ne savoit pas que il fut frans, et il se tenoit en l’eritage, et il mist en convenant que dener fussent paié à jor, il n’aquiert rien à l’oir se li hers sot que il fut franchiz el testamant ; car il ne puet pas dire que il soit par droit sis sers desque il savoit bien que il estoit frans. ¶ Il n’est pas issi do franc home qui a esté achetez et sert par bone foi ; car en celui cuident il et li acheterres une meisme chose. Mes l’en ne puet pas dire que cil qui siet bien que il est frans le tiegne par droit, ja soit ce que il moismes ne set pas sa condicion.

Modestinus dit : sers d’eritage fera par droit convenance el non de l’eritage et de celui qui doit estre heirs.

Cil moismes dit : quant li sers en coi aucuns à l’usaire fet convenance el non au seignor de la proprieté do chetel à celui qui a l’usaire ou par sa poine, il aquiert au seignor de la proprieté ; mes il convient enquerre comment cil qui a l’usaire puet recovrer le suen de celui qui a la proprieté. Et se autrui serf nos sert par bone foi, et il aquiert el non son seignor ce que il puet aquerre à nos, il aquiert à lui sanz nule dote. Mes voions comment nos le porrons recovrer ; et ce que Gaius dit n’est pas sanz reson, car l’en puet demander arriere au seignor en l’un et en l’autre cas.

Cil meismes dit : tuit li marchié que sers fet tant comme il nos sert, ou totes les convenances que il fet, sont aquises à nos ; car il estoit en nostre poeté quant il les fist. Autresi est il se li filz qui est en baill fet marchié ; et ce moismes dont il a donné respit tant que il soit mis hors do baill, se il l’a fet par tricherie.