École des chartes » ELEC » LI DIX-HUITIESMES LIVRES » X. De convenance qui est fete par le prevost [rubr.]

X. De convenance qui est fete par le prevost [rubr.]

  • Traduit du Dig., liv. 46, tit. 5 : de Stipulationibus prœtoriis.

§ {46.5.1}

Ulpianus dit : il senble que trois especiaus manieres sont de convenances qui sont fetes par le prevost : les unes sunt fetes en juigement, les autres par caucion, les autres sont communes. {1} Celes1 qui sont fetes en juigement, qui sont fetes d’avoir estable ce qui sera juigié, si comme de poier ce qui sera juigié et denoncement de novele ovre. ¶ {2} Celes qui sont fetes par caucion sont celes qui ont maniere de auction, neïs de renovelement en est fez ; si comme de lés et de garde, et d’avoir la chose estable, et que domages ne sera pas fez. ¶ {3} Les communes sont celes qui sont fetes de estre au juigement. {4} Et l’en doit savoir que totes convenances contienent caucion par leur nature, car les convenances sont fetes por aseurer cex à qui eles sont fetes. ¶ {5} De cez convenances qui sont fetes par le prevost, et les unes qui sont fetes par caucion et les autres par une promesse. Mes il en i a por qui soient fetes par une promesse ; et quant eles seront nonbrees, l’en savra apertenement que les autres ne sont pas par promesse, mes par caucion. {6} La convenance de denoncement de novele ovre est aucunne foiz fete par caucion et aucunne foiz par une promesse. Et il convient voir comment caucion en est donnee ; car il convient doner caucion de l’ovre qui est fete en privé leu et fere une promesse de cele qui est fete en commun leu. Et cil qui commencent en lor non ne font fors prometre, et cil qui commencent por autres doivent [139rA] donner caucion. ¶ {7} L’en promest aucunne foiz que domages ne sera pas fez, et aucunne foiz en done l’en caucion. Car quant aucunne chose de quoi domages puet venir est fete en commun flueve, l’en en donne caucion ; et quant ele est fete en mesons, l’en n’en fet fors prometre. {8} Convence qui est fete de randre une chose à dobles n’est fors une promesse. {9} Se il n’est mis au convenant que caucion ne soit donnee, et s’il i a aucun contredit, si comme l’en dit que l’en demande par malice que tel convenance soit fete, li prevoz doit conoistre de la chose à une sonme et commander que caucion soit donnee ou deffendre le. {10} Et se il i convient à joindre ou amenuissier ou müer, aucunne chose de la convenance est par la juridicion au prevost.

§ {46.5.2}

Paulus dit : les convenances qui sont fetes par le prevost contienent ou restitucion de chose ou quantité qui n’est pas certaine. {1} Si comme la convenance de denoncement de novele ovre, en coi il est contenu que ele soit restablie ; et por ce, se li deffenderres et li demanderres muert et il lesse plusors oirs, et li uns voint ou est vencuz, tote l’ovre devra estre restablie ; et tant comme il faut aucunne chose, ne puet l’en pas dire que l’ovre soit restablie. ¶ {2} La convenance de poier ce qui sera juigié, et celes qui li sires avra establi ce que li procurators fera, et cele que domages ne sera pas fez, et celes qui sont senblables à cestes, contienent quantité qui n’est pas certaine. Et de celes dit l’en que eles doivent estre departies à persones aus hoirs, ja sé ce que l’en puet dire que la persone as hoirs à celui qui fet la convenance ne puet pas müer la condicion à aucun par convenance qui descende do mort. Et encontre ce, il est fet par bone reson que se uns des hoirs à celui à qui la promesse fut fete voint, la convenance a lieu2 por sa partie por tant comme la chose vaut. {3} Mes se li uns des hoirs à celui qui promist porsiet tote la chose, Julians escrit que il doit estre condempnz por tot ; et se cil qui porsiet muert puis que li plez est entammz, uns de ses oirs ne doit pas estre condampnz am plus que li autre, ja soit ce que il porsit tot le champ.

§ {46.5.3}

Ulpians dit : l’en donne caucion [169rB] generaument en totes les convenances qui sont fetes par le prevost et as procurations.

§ {46.5.4}

Paulus dit : les convenances qui sont fetes par le prevost sont sovent demandees quant caucion lesse à estre fete sanz la colpe à celui qui promet.

§ {46.5.5}

Cil moismes dit : ce doit estre gardé en totes les convenances qui sont fetes par le prevost, que se mis procurators fet convenance en mon non, aucion li apartiegne quant la cause sera corrue. Autresi est il que se uns marcheanz commence à estre en tele cause que il baille à autres ses marcheadises et en retient la seignorie.

§ {46.5.6}

Cil moismes dit : en totes les convenances en coi une chose est promise à fere et poine i est mise, se ele n’est fete est la caucion donnee par non de la poine.

§ {46.5.7}

Ulpians dit : il convient as caucions qui sont fetes par le prevost que plege soient donz, ne nus ne s’en puet aquiter par baillier gages ne deners, ne or ne argant.

§ {46.5.8}

Papinians dit : Paulus dit que quant cil qui est fez hoirs soz condicion a receu la possession des biens, il est contrainz de doner à celui qui est establiz à estre hoirs aprés lui caucion à plus lonc terme que la condicion n’est. Car li prevoz ne velt que ses benefices tort à nuli à decevance ; et l’en puet bien voir que cil qui prant avant, demande à tort caucion. ¶ {1} Quant uns lés est lessiez à Tyce et amené soz contraires condicions, l’en doit donner caucion à l’un et l’autre quant li uns et li autres a esperance d’avoir le lés par la volenté au mort.

§ {46.5.9}

Renulcius dit : se doteuse parole avient as convenances qui sont fetes par le prevost, l’excepcion sera au prevost, car l’en doit garder à sa pensee.

§ {46.5.10}

Ulpians dit : Valerians escrit que se li prevoz qui commanda premerement que caucions fust donnee jusques à trois anz commanda aprés que ele fut donnee à plus lonc tens, por ce que il vost que l’an usast la premere convenance, il senble que il aperne à cez qui estoient obligiez par l’excepcion de la premere convenance.

§ {46.5.11}

Renulcius dit : la convenance d’une moisme maniere, où l’en promet arrendre tant comme la chose vaut, il est miauz que l’en compraingne certainne somme ; car sovant avient que il est grief chose de prover la valor des choses, si que ele est ramenee à petite somme.


1 Celes] A celes dans le ms., cf. lat. Iudiciales eas dicimus
2 a lieu] a lun dans le ms., cf. lat. At in contrarium summa ratione fit, ut uno ex heredibus stipulatoris vincente in partem eius committatur stipulatio: hoc enim facere verba stipulationis “quanti ea res est"