École des chartes » ELEC » LI DIX-HUITIESMES LIVRES » XIII. De aucion de larrecin que est donee contre les mestres des niés et des taverners et des osteliers [rubr.]

XIII. De aucion de larrecin que est donee contre les mestres des niés et des taverners et des osteliers [rubr.]

  • Traduit du Dig., liv. 47, tit. 5 : Furti adversus nautas, caupones, stabularios.

§ {47.5.1}

Ulpians dit : juigemenz est donz contre cez qui gardent les nés ou les tavernes ou les ostiex se larrecin est fez par aucun de cez que il ont en lor servise comment que il soit, ou se li larrecins est fez par l’aide ou par le consoill au mestre de la nef ou de la taverne ou de l’ostel ou sanz lui, ou par aucun de cez que il a en sa nef par conduire la. {2} Et l’aucion est de rendre le domage à doubles. {3} Quant aucunne chose est perdue en la taverne ou en la nef, li taverners ou li metres de la nef est obligz par le bannissement au prevost ; si que il est en la volenté à celui à qui la chose est enblee de pledier contre le taverner ou contre le mestre de la nef par le bannissemnt au prevost, ou contre le larron par citaiene aucion. {4} Et se li taverners ou li metres de la nef reçoit l’aucion, il puet pledier au larron par aucion de larrecin, et non pas cil à qui la chose fut enblee, car li perilz de la chose fut seur celui. ¶ {5} Se li mestres de la nef ou li taverniers abandone son serf à soffrir paine de son mesfet il se delivre. Par coi n’est donc li metres de la nef condempnz, qui i mist si mauvés ? Ou por coi est il obligiez por tot le mesfet el non au franc home et il n’i est pas obligiez el non au serf ? Fors por ce que cil qui i met franc home doit bien savoir quex il est, et l’en li doit pardoner le fet à son serf qui est à son ostel, se il est apareilliez d’abandonner le à soffrir [172vB] poine de son mesfet. Et se il i met autrui serf, il est tenuz por lui, autresi comme por franc home. {6} Et li taverners restore les domages que cil font qui sont en sa taverne por garder la, et que cil font qui i sont por habiter ; mes il ne restore pas cez que li trespassant font, car li taverners ne li ostelers ne pot pas conoistre les trespassanz ne il ne les puet pas refuser ; mes il senble que il ait esleuz cez qui habitent, autresi comme toz jorz que il ne met pas hors, et por ce doit il restorer les domages que il font. ¶ Li metres de la nef ne respont pas del fet as governeors.