XX. De cex qui enblent bestes et les emmoinent [rubr.]

Ulpians dit : li enpereres Adrians escrit eissi quant l’en li demanda consoil de cez qui enblent les bestes comment il doivent estre puni : « quant cil qui enblent les bestes sont puni par tres dure poine, il sont dampné ou glaive ». Mes il ne sont pas si cruelment puni par tot, mes la où cist mesfez est plus sovent fez ; et aillors i sont aucunne foiz doné à servir à tens. {1} Cil qui enblent les betes sont proprement cil qui les sostreent des pestiz et des fous et les emmoinent. Et ce est leur estuide et autresi comme uns arz par coi il ostent les chevaus et les bues d’avoc les autres ; mes se aucuns enmoine une berbiz que il trove seule, ou un cheval qui est remés aprés les autres, il est lerres, mes ce n’est pas de tel maniere. {2} Et cil qui enble un porc ou une chievre ou un moston ne doit pas estre puniz si grievement comme cil qui enblent greigneurs bestes. {3} Et ja soit ce que li enpereres Adrians establi poine de mestal ou de servise ou de glaive, neporquant ne en plus honeste leu n’apartient pas à ceste poine, ainz doivent estre envoié en essil ou osté de lor ordre. Et cil qui les emmoient o armes ne soient pas sozmis as bestes. {4} Cil qui en amoine les bestes de coi il pledoit por avoir en la proprieté doit estre renvoiez au citein examinement, si comme Saturnius escrit ; et ce est voirs se il ne le fist pas por enbler les, mes por ce que il li senbloit que il i avoit droit.

Cil moismes dit : li crimes de mener en bestes n’est pas des communs juigemenz, ainz est melz larrecins. Mes por ce que cil qui les emmoinent joint sovent armes, se il sont pris, leur mesfez selt estre puniz griefment.

Calistratus dit : li nombres des oielles fet ou simple larron ou meneur de bestes ; car aucun cuident que .x. berbiz facent ou fou, et .v. porcel ou .iiii., mes uns chevaus ou uns bos soffist au crime de mener en bestes. {1} Et cil doit estre puniz plus griement qui emmoine une beste de l’estable son seigneur que se il l’en menast des chans. {2} Et cil qui sovent le font que cil qui ne le fet [178vA] que une foiz. ¶ {3} Il est contenu es letres l’enpereor Adrian par quel poine cil doivent estre puni qui recestent cez qui emmoinent les bestes, ce est que il soient envoié par .x. anz en essill hors de la terre de Lonbardie.