XV. Des biens raviz par force [rubr.]

Paulus dit : cil qui ravist une chose est tenuz à rendre la à dobles par aucion de larrecin qui n’est pas aperz, et à quatre dobles par aucion des bien raviz par force. Mes se l’en a avant pledié par cele des biens raviz par force, cele de larrecin li doit estre vee ; mes se l’en a pledié par aucion de larrecin, cele ne doit pas estre vee, que l’en ne plede por tant comme l’en en porra plus avoir que par cele de larrecin.

Ulpians dit : li prevoz dit : « se domages est fez à aucun par homes qui sont ensenble par tricherie, ou se li bien à aucun sont ravi par force, je li donrai contre celi qui ce a fet juigement des biens raviz par force à quatre dobles dedanz l’an, et aprés l’an por tant comme la chose vaut. Et se1 sers a ce fet, je en donroi juigement contre son seignor ». ¶ {1} Li prevoz met consoil par cest banissement contre les choses qui sont fetes par force ; car se aucuns puet mostrer que force li ait esté fete, il en puet pledier par le commun juigement de force. Et aucun dient que torz ne doit pas estre fez à commun juigement par privee aucion. Mes il me senble melz que li communs juigemenz soit veez à cez qui eslisent la privee aucion. ¶ {2} L’en puet pledier de tricherie par cest banissement et non pas tant solement contre celui que il ravit, mes contre celui qui asenble homes armz por fere domage ou por ravir. ¶ {3} Se aucuns assenble donc homes ou il use de tez que autres a assenblés por ravir aucunne chose, il senble que il l’est fet par tricherie. ¶ {4} Nos entendons homes assenblez qui sont assenblé por fere domage. {5} Ne li prevoz ne fet pas force quex homes ce soient, ou franc ou serf. {6} Et se il ne prant que un home en lui, dirons nos que ce sunt homes assenblé. {7} Et se tu proposes que cil sens ait fet domage, je ne croi pas que cez paroles faillent. [173vA] Et ce que il dit « par homes qui sont assenblé », doit estre issi entendu : se il ravist ou fet domage ou par lui seul ou par homes que il ait assenblez ou armés ou sanz armes. ¶ {8} Mancion de tricherie i est fete, car qui fet force il fet tricherie ; por quant cil qui fet tricherie ne fet pas toz jorz force. Et se aucunne chose est fete par tricherie sanz force, ele est contenue en cest banissement. ¶ {9} Cist banissemenz comprent totes manieres de dommages. Me je ne croi pas que li domage qui sont fet en repost i soient compris, mes cil qui sont fet par force ; et se aucuns seuls hom fet aucun domage sanz force, il n’est pas contenuz en cest banissement. Et se il i a assenblé homes, ja soit ce que il n’i a fet nule force, neporquant, desque il l’a fet par tricherie, il apartient à cest bannissement. {10} Mes aucion de larrecin ne de la loi qui fet restorer les domages ne sont pas donnees en cest banissement ; car Julians dit que cil qui ravist par force est plus engrés lerres que autres. Et se aucuns fet domage par homes que il ait assenblez, il puet estre tenuz par la loi qui fet restorer les domages à celui à qui il a tolu ses biens. ¶ {11} Ce que li prevoz dit « des biens raviz » doit estre entendu : se une sole chose est ravie. ¶ {12} Se aucuns n’a pas assenblé les homes, mes il meismes a esté entre cez qui sont assenblez et il a ravi aucunne chose ou fet domage, ceste aucion a leu. Mes l’en demande se cist bannissement comprent ce sanz plus qui a esté ravi, ou le domage qui a esté fez par tricherie par les homes que aucuns a assenblés, ou ce qui a esté ravi ou fet par sa tricherie, ja soit ce que uns autres ait assenblé les homes. Et il est melz que l’en die que tuit li domage i soient contenu, et cil qui a assenblé les homes, et cil qui i sont assenblé. ¶ {13} Li verais pris de la chose qui est raviz est doublez en quatre dobles par ceste aucion quant ele est meüe dedanz l’an que l’en en puet pledier, et non pas li preuz que cil a qui la chose est ravie i eust se ele ne fut pas ravie. ¶ {14} Ceste aucion apartient contre aucun el non de sa mesnie, ne cil qui la muet n’a pas besoign de mostrer li quel de la mesnie [173vB] ont ravi ses biens ou fet domage. Li nons de la mesnie contient les sers et toz cez qui servent, quique il soient ou franc home ou autrui serf qui servent par bone foi. ¶ {15} Je ne croi pas que cil qui demande par ceste aucion puisse pledier contre le seignor el non à chescun de ses sers ; car il soffist bien que li sires offre une foiz à rendre la chose à quatre dobles. ¶ {16} Par ceste aucion ne doivent tuit li serf estre abandoné à soffrir poine, mes cil sanz plus qui ont fet le mesfet ou par qui tricherie il a esté fez. ¶ {17} Ceste aucion est apelee comunement « des biens raviz par force ». ¶ {18} Cil est tenuz par ceste aucion qui i fet tricherie. Se aucuns a donques ravi par force la chose qui estoi soe propre, il n’est pas tenuz par ceste aucion, car la chose sera muee autrement. Et se aucuns ravist par force son serf fuitif que uns autres porsivet par bone foi, il n’est pas tenuz par ceste aucion, car il prant sa chose meisme. Mes se ele estoit obligee à aucun et cil qui qui ele estoit la ravist par force, il sera tenuz par ceste aucion. ¶ {19} Ceste aucion ne sera pas donee contre celui qui a mains de .xiiii. anz, qui ne set encore que tricherie est, se uns de ses sers ou de sa mesnie ne l’a fet ; mes lors pledera l’en à lui par ceste aucion por le mesfet à son serf ou à sa mesnie. ¶ {20} Se uns serganz enmoine mes betes por ce que il cuide que je aie mesfet aucunne chose, ja soit ce que il est deceuz en ce, neporquant Labeo cuide que je ne puis pas pledier o lui par aucion des biens raviz par force, car il le fet sanz tricherie. Mes se il les enclot que eles ne pessent et por les fere morir de fain, Labeo dit que il est tenuz par la loi qui fet restorer les domages. ¶ {21} Se aucuns enclot mes bestes que il a mises hors par force, il est tenuz par aucion des biens raviz par force. ¶ {22} Nos ne regardons pas en ceste aucion se la chose est es biens au demandeur ; car se ele i est, ou ele n’i est pas, desque ele est ‹…› de ses biens, ceste aucion avra leu. ¶ Et por ce, se il a prestee sa chose ou baillie à loage ou engagie, ou il l’a mal baillie à garder, si que ce soit mes preuz que ele ne soit pas perdue, ou je la porsiee par bone foi, ou je i a l’usaire [174rA] ou aucunne autre droiture, si que ce soit mis preuz que ele ne soit pas perdue, l’en doit dire que ceste aucion m’apartient ; si que l’en tiegne par seignor en cest cas non pas tant solement celui à qui la proprieté de la chose est, mes celui qui en avoit la possession. {23} Et l’en doit dire generaument que por les causes par coi aucion de larrecin m’apartient, por cele meisme m’apartient ceste aucion por chose qui est fete en repost. Mes nos n’avons pas aucion de larrecin por chose baillie en garde. Et por ce, ajoste l’en ci, se ce est nostre preu que la chose ne soit pas ravie. {24} Car se une chose m’a esté baillie en garde et je ai promis que ele ne sera pas perdue en mes corpes, se ele m’est enblee, je ai aucion de larrecin, ou se j’é pris loer de garder la. Et l’en puet dire plus profitablement que, ja soit ce que aucion de larrecin cesse por la chose baillie en garde, neporquant l’en en puet pledier par aucion des biens raviz par force. Car il n’a pas pou2 de difference entre celui qui enble en repost et celui qui ravist ; car li uns celle son mesfet et li autres non celle pas, ainz fet commun crime. ¶ Se aucuns motre donc que il ait eu un pou de domage, il doit avoir aucion des biens raviz par force. ¶ {25} Se mes sers fuitis achete aucunnes choses por garnir soi et eles li sont tolues por ce que eles sont de mes biens, il a esté respondu que je en puis pledier par aucion des biens raviz par force. ¶ {26} L’en puet pledier el non des choses qui sont ravies par aucion de larrecin et de domage et de tort fet ; et chascune des choses puet estre demandee arriere. ¶ {27} Ceste aucion est donee à toz les oirs à celui à qui la chose est ravie, mes ele n’est pas donnee contre les hoirs à celui qui la ravi ; car aucion qui est meüe por paine, n’est pas donnee contre les oirs. Neporquant, voions se ele doit estre donee contre les hoirs por tant comme il en sont fet plus riche. Et je croi que li prevoz ne la donna pas contre les oirs por tant comme il en vint à els ; car ce est assez que ce que il en ont leur puisse estre demandé arriere.

Ulpians dit : li prevoz dit : « se aucuns domages est fez en une torbe de genz par la tri[174rB]cherie à aucun, je en donroi contre lui juigement dedanz l’an que l’en en porra pledier par le doble de la chose ; et aprés l’an, por tant comme ele valoit ». ¶ {1} Cist bannissemenz est proposez do domage que aucun fet en torbe de gent. {2} Et Labeo dit que torbe est dite de tumulte ; {3} car tumulte n’est pas fez se il n’i a pluseurs genz. Se dui home donc font un poi de noise, ce n’est pas fet en torbe, car dui home ne sont pas torbe. Mes se il en i a pluseurs, si comme .x. ou .xv., ce est torbe ; et se il en i a trois ou quatre, ce n’est pas torbe. Et Labeo dit par droit que il a molt grant difference entre torbe et noise, car torbe est troblement de moltitude d’omes et noise est de deus. ¶ {4} Par cest bannissement est tenuz non pas tant solement cil qui a fet domage en la torbe, mes cil par qui tricherie il i a esté fez, comment que il soit ou s’il fu presanz ou non ; car cil qui n’est pas presanz i puet bien avoir neu par tricherie. ¶ {5} L’en doit dire que par ce bannissement est cil tenuz qui vint en la torbe et fu achoison del domage qui i a esté fez. Se il fu en la torbe quant li domages i fut fez, il i fu par tricherie, car lors ne puet l’en pas voer que li domages n’ait esté fez par sa tricherie. {6} Se aucuns a torbe, la torbe, par sa venue, ou escommeue par aucun cri ou par aucun fet, ou por ce que il blasme aucuns ou que il le corroce se domages a esté fez par sa tricherie, ja soit ce que il n’en avoiz nule pensee ; neporquant, il i est tenuz, car il est voirs que li domages a esté fez en la torbe par sa tricherie ; ne il ne convient pas que il ait esmeüe la torbe, mes que li domage ait esté fez par sa tricherie. Et ce est la difference qui est fete en cest banissement et cez desus, que li prevoz parole en cel devant del domage qui est fez ou de la chose qui est ravie par homes qui sont assenblé ; et en cest, domage qui est fez en une torbe de gent par tricherie à aucun, ja soit ce que il ne l’a pas fet mes il a escommeu la torbe par son cri ou par ses paroles, ou aucuns autres a escommeue la torbe et il en estoit, si a fet le domage. {7} Et por ce le banissement devant promet paine de quatre dobles et cist de doble, {8} dedinz l’an que cil à qui le domages est fez a poir de pledier en, et aprés ce que li anz est [174vA] passz por tant sanz plus comme la chose vaut. ¶¶ {9} Cist bannissemenz parole de domages qui ont esté fez et ne mie de chose ravie, mes par cel devant puet l’en pledier des biens qui sont raviz par force. ¶ {11} Ceste aucion est por le fet et est donnee por le doble de tant comme la chose vaut ; et cist condempnemenz est raportez à verai pris de la chose et au tens presant, et est toz jorz por le double dedanz l’an. {12} Et li demanderres doit prover que li domages a esté fez en la torbe ; car, se il est allors que en la torbe, ceste aucion cessera. ¶ {13} Se une grant torbe s’asenbla quant Tyces batoit mon serf et li sers perdi aucunne chose en cele torbe, je puis pledier de ceste aucion contre celui qui le batoit ; car li domages fut fez en la torbe par sa tricherie se il le commença à batre por fere li domage. Mes se il ot autre cause de batre le, ceste aucion cesse. {14} Mes se il apela la torbe por batre le serf par devant li por fere li tort et ne mie par corage de fere li domage, cist bannissemenz a leu ; car il est voirs que cil qui le bat por fere le tort fet tricherie, et cil qui donne cause de domage fet le domage. {15} Li prevoz donne ceste aucion contre le serf et contre la mesnie. {16} Ce que nos avons dit des oirs en l’aucion devant des biens raviz par force doit estre gardee en ceste.

Gaius dit : ce ne vaut rien à celui qui ravist à eschever poine se il rent, ainz que li juigemenz en soit receuz, la chose que il a ravi.

Renulcius dit : la loi deffant que ce qui est porsis à force ou ravi ne soit pas gaagnie par longue tenue devant que ele reviegne en la poesté son seignor, ou en cele à son hoir.