XXV. De communs juigemenz1.
§ 1.
Il convient que juigemenz communs ne soient pas governé par actions ; ne il n'ont rien senblable as autres juigemenz, de quoi nos avons parlé ; il est greigneur diversité en movoir les, et en maintenir les. Il sont apelé commun, porce que il est ostroié à chescun dou pueple que il la mantaigne2.
§ 2.
Li uns des communs juigemenz sont capital, et li autre ne sunt pas capital.
Nos apelons cex capital qui tormentent de trop grief torment : si comme quant l'en deffant à aucun la commune de feu et d'eue, ou se il est envoiez en essil, ou condempnez à paine de métaill.
Li autre qui donnent mauvese renomée, ou domage de deners ne sont pas capital ; jà soit ce que il soient commun3.
§ 3.
Li commun juigement sunt cil :
La loi que li enpereres fist de crime qui est fez contre le mestre l'enpereor ou contre la chose commune : la poine de cest crime est que cil qui en est copables en pert l'âme, et sa mémoire est dampnée après sa mort4.
§ 4.
La loi que li enpereres fist des avotires, est des communs juigemenz, par coi non pas tant solement cil qui bannissent aucun mariage sont puni par glaive ; mès cil qui font lor desléal tricherie o [p. 284] homes ; et par cele meisme loi est puniz li vices, quant aucuns conpoigne charnelment o virge ou à veve.
La loi que li enpereres fist de homescides, est des communs juigemenz, qui prant vengance, ou glaive do homecide ; et de cex qui portent darz por ocirre homes. Darz est communémant tout ce qui est tret d'arc, si comme Gaïus escrit, ès l'excepcion de loi des douze tables ; mès darz est généraument tot ce que aucuns gite o sa main. Il s'ensiet donc que pierre, et bâtons, et fers soit contenuz par cest non ; et il est apelez darz, selonc le grieu, por ce que il est envoiez en loig. Et ceste significacion poons-nos trover ou non de grieu5.
§ 5.
Par ceste meisme loi sont li envénimeur condempné, qui ocient homes par venins ou par enchantemenz ; ou qui vendent communément mauveses médecines6.
Une autre loi porsiet par novele paine un très aspre crime, qui est apelée la loi que Ponpeius fist de cex qui ocient leur pères ; en quoi il est contenu que se aucun apareille la mort à son père, ou à sa mère, ou à son fill, ou à aucun de ses autres, ou en apert ou en repost ; cil par qui tricherie ce est fet ou qui est consantanz de cel crime, jà soit ce que il soit estranges, soient puniz par la paine à cex qui ocient leur pères. Ne ne soit pas sozmiz à olme, ne à feu, ne à autre painne solempne, ainz soit liez en un sac o un chien, et o un coc, et o une serpant, et o une singesse ; soit gitez o elx en la mer, et en une eue, selonc ce que la région le requiert, si que il perde s'âme, l'usage de toz les élémenz, et li ceaux li soit devez en sa vie, et la terre à sa mort.
Et se aucuns ocist les autres persones, cil qui sunt jointes à lui par lignage ou par affinité, il soffrera paine qui est establie des homecides7.
§ 6.
Et la loi que Cornelius fist des faus hoirs, enjoint painne à celui qui escrit faus instrument, ou faus testament, à celui qui le saèle, et à celui qui le recète, et à celui qui i met faus séel, et à celui qui le fet, et qui l'entaille, qui le prant à son esciant par tricherie. Et la poine d'icele loi est li derreniers tormanz, et contre les sers (autresi est-il des homicides et des envénimeurs), se il sont franc, il doivent estre envoié en essill8.
§ 7.
[p. 285] Et la loi que Julius fist por force commune ou privée, est contre ceus qui font force ou armes ou sanz armes. Cil qui la fet doit estre envoiez en essil, par la loi que Julius fist de force commune. Et se ele est fete sanz armes, la tierce part des biens à celui qui le fet, est puploïe.
Mès se aucuns a jéu par force o virge, ou o veve, ou o nonains, cil qui ce font, et qui eust en consoil, et en aide, soient puni par capital, selonc nostre establissement, par quoi l'en puet ce savoir plus apertement9.
§ 8.
La loi que Julius fist de larrecin, punist ceus qui enblent deners, ou chose commune, ou sainte, ou religiose. Et se li juige enblent les communs deniers el tens que sont en baillie, il doivent soffrir poine capital ; et ne mie tant seulement, mès cil qui les ont serviz et aidiez à ce fere, et ceux qui à lor esciant les ont receuz, quant il les orent enblez. Et li autre qui encharront en ceste loi, seront envoiez en essil10.
§ 9.
Et la loi que Flavius fist de ceux qui navrent les homes, est entre les communs juigemenz : qui donne aucune foiz paine capital par les sainz establissemenz, et aucune foiz plus ligière.
Pardesus ce, sunt communs juigemenz les lois que Julius fist, de pluseurs articles, qui parolent des certains chapitres, por coi cil qui sont corpables ne sont pas tretié à mort ; ainz sozmetent à autres painnes ceux qui les despisent.
Et nos avons ce dit des communs juigemenz, que vos les puisiez estachier, autresi comme au bout del doi, ce est que vos en puissiez avoir aucun peu de la quenoissence. Mès plus diligenz enseignemenz vos sera donez el livre de Digestes, se Deu plest11.
